قالامگەردىڭ مەرەيتويىنا وراي جازۋشى لەۆ تولستويدىڭ «اننا كارەنينا» رومانىنىڭ قازاق تىلىندەگى نۇسقاسى قايتا جارىققا شىقتى. اتالعان تۋىندى جەتىسۋ وبلىسى اكىمدىگىنىڭ قولداۋىمەن «مازمۇنداما» باسپاسىندا جارىق كوردى. العاشىندا 500 دانامەن شىققان ەڭبەك كەيىننەن وقىرمانداردىڭ سۇرانىسى بويىنشا 2000-عا جەتكەن.
«بيىل قالامگەردىڭ 115 جىلدىعى اتالىپ ءوتىلدى. «اننا كارەنينا» اۋدارماسىنىڭ تۇساۋكەسەرى – الماتى قالاسىنداعى العاشقى ءىس-شارانىڭ ءبىرى. ارينە, بۇگىنگى كەشكە شاقىرىلعاندار اقىننىڭ تۋعان جەرى اقسۋ اۋدانىنداعى قاپال, قوڭىر اۋىلدارىنان, جالپى جەتىسۋدان ارنايى دەلەگاتسيا كەلىپ وتىر. سونىمەن قاتار استاناداعى اقىن اتىنداعى مەكتەپتەن دە دەلەگاتسيا كەلدى. اتا جايلى ەستەلىكتەر ايتىلدى», دەيدى ع.ورمانوۆتىڭ جيەن نەمەرەسى ايدار قىرىقباي ۇلى.
ايتا كەتەيىك, اقىننىڭ اۋدارما سالاسىنا سىڭىرگەن ەڭبەگى وراسان زور. ول قىرعىزدىڭ «ماناس» ەپوسىنىڭ ءبىرىنشى كىتابىن, ا.پۋشكيننىڭ «مىس سالت اتتى» تۋىندىسىن قازاق تىلىنە تارجىمالاعان.
ءىس-شارا بارىسىندا «سىرلى سەزىم اقىنى» اتتى عالي ورمانوۆتىڭ شىعارماشىلىعى مەن ومىرىنە ارنالعان كىتاپ كورمەسى ۇيىمداستىرىلدى. اقىننىڭ قىزى جاميعا ورمانوۆا, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى كاكەن حامزين, «جاس الاش» گازەتىنىڭ باس رەداكتورى قايرات ماتىرەكوۆ, «قازاقستان» ۇلتتىق تەلەارناسىنىڭ الماتى قالاسىنداعى فيليالىنىڭ جەتەكشىسى ساۋلە جيرەنشينا, فيلولوگيا پروفەسسورى گۇلجاھان وردا, بەلگىلى اقىن باقىت بەدەلحان قالامگەر تۋرالى كەڭىنەن اڭگىمە قوزعاپ, اتقارعان ەڭبەكتەرىن سارالاپ ءوتتى.
«عالي ورمانوۆ شىعارمالارىنىڭ جاستارعا بەرەرى كوپ. ءبىرىنشى كەزەكتە وتاندى سۇيۋگە, پاتريوتيزمگە تاربيەلەيدى. ونىڭ شىعارمالارىنداعى تۋعان جەر, ادامگەرشىلىك تاقىرىبى وقىرماندى ەلەڭ ەتكىزبەي قويمايدى. ول ءوز ءداۋىرىنىڭ اقىنى عانا بولىپ قويعان جوق, قازاققا بىتپەس رۋحاني مۇرا قالدىرىپ كەتتى», دەيدى م.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى گۇلجاحان وردا.
جيىن سوڭىندا قاتىسۋشىلار ەستەلىك سۋرەتكە ءتۇسىپ, تارقادى.
