ۇلتتىق پارك ديرەكتورىنىڭ ورىنباسارى باۋىرجان ماحمەتوۆتىڭ ايتۋىنشا, قاراعاي ءبۇرىن جيناۋ جانە وڭدەۋ ماشاقاتى كوپ جۇمىس. پارك قىزمەتكەرلەرى ونى قاراشا مەن ناۋرىز ارالىعىندا تەرەدى.
«ۇلتتىق پارك – ەمگە ءدارۋ اۋاسىمەن ايگىلى قاراعايلى ورمان. القاپتىڭ فيتونتسيدتەرى ءارتۇرلى وكپە اۋرۋلارىنا تاپتىرمايتىن شيپا. بىراق ورماندى كۇتىپ-باپتاۋدىڭ قانشالىقتى بەينەتى مول شارۋا ەكەنىن كوپشىلىك بىلە بەرمەيدى. اعاشتارعا ءتۇرلى زاقىم كەلەدى, ورتتەن زارداپ شەگەدى, بارا-بارا كارى اعاشقا اينالادى. ورماننىڭ تابيعي قالپىن ساقتاۋ ءۇشىن ۇلتتىق پارك قىزمەتكەرلەرى كوكتەم سايىن تالىمباقتا ەكى جىل وسىرىلگەن كوشەتتەردى ورمانعا وتىرعىزادى», دەدى ديرەكتوردىڭ ورىنباسارى, باس ورمانشى باۋىرجان ماحمەتوۆ.
تەرىپ العاننان كەيىنگى وڭدەۋدىڭ تولىق تسيكلى سۇرىپتاۋ, تۇقىمىن الۋ, تازارتۋ, بەلگىلى ءبىر دەڭگەيگە دەيىن كەپتىرۋ (12-15% ىلعال) سىندى كەزەڭدەردەن تۇرادى. سودان سوڭ عانا دايىن تۇقىمدار تالىمباققا ەگىلىپ, تۇتاس كوشەت وسىرىلەدى. كەيىنىرەك بۇل وسكىندەر ورمان ۋچاسكەلەرىنە وتىرعىزىلادى.
وسىلايشا, كىشكەنتاي بۇردەن قاراعايلى ورمان پايدا بولادى. الايدا كەيبىر تۇرعىندار جاڭا جىل قارساڭىندا ورمانداعى شىرشالاردى كەسىپ, تابيعاتقا نۇقسان كەلتىرىپ جاتاتىنى دا جاسىرىن ەمەس.
ء«بىز ماڭداي تەرىمىزبەن وسىرگەن قاراعايلاردى وتاۋعا جول بەرمەيمىز! «بۋراباي» ۇلتتىق ساياباعىنىڭ بۇكىل اۋماعى تاۋلىك بويى تەپلوۆيزورمەن جابدىقتالعان تسيفرلى SMART جۇيەسىنىڭ باقىلاۋىندا ەكەنىن براكونەرلەردىڭ ەسىنە سالعىم كەلەدى. اكىمشىلىك قۇقىق بۇزۋشىلىق تۋرالى كودەكسكە سايكەس, ەرەكشە قورعالاتىن تابيعي اۋماقتاردا وسەتىن اعاشتار مەن بۇتالاردى زاڭسىز كەسكەنى نەمەسە بۇلدىرگەنى ءۇشىن جەكەلەگەن ادامدارعا – 30 اەك مولشەرىندە, شاعىن كاسىپكەرلىك سۋبەكتىلەرىنىڭ زاڭدى تۇلعالارىنا – 70 اەك مولشەرىندە ايىپپۇل سالىنادى. وعان قوسا زاڭسىز كەسىلگەن اعاشتارى, كولىك قۇرالدارى مەن براكونەرلىك قۇرالدارى تۇگەل تاركىلەنەدى», دەپ ەسكەرتتى ب. ماحمەتوۆ.
