«مويىنقۇم اۋدانىنىڭ پوليتسيا قىزمەتكەرلەرى قۇرامىندا باعالى مەتالى بار شيكىزاتتى, تاستاردى زاڭسىز وڭدەۋمەن اينالىساتىن جەراستى تسەحىنىڭ قىزمەتىن توقتاتتى. جەكە تۇرعىن ءۇيدى تەكسەرۋ كەزىندە ەلەكترلىك ۇنتاقتاۋ ديىرمەنى, ۇنتاقتالعان كەننىڭ قالدىقتارى, ەلەك, ماگنيت, تاسيتىن اربالار, كۇرەكتەر, سىناپتى سۇيىقتىق, ەكى ۇلكەن قازاندىق جانە 10 تونناعا جۋىق التىن كەنى تابىلدى», دەپ جازدى ءىىم رەسمي باسىلىمى.
ودان بولەك جالاقىعا جۇمىس ىستەگەن 30 جانە 58 جاستاعى ەكى جۇمىسشى ۇستالعان. سونداي-اق پوليتسەيلەر تسەحتىڭ يەسى بولعان 37 جاستاعى جەرگىلىكتى تۇرعىندى انىقتادى.
بۇگىندە قر قىلمىستىق كودەكسىنىڭ 295-1-بابى 1-بولىگى (باعالى مەتالدار مەن اسىل تاستاردىڭ, قۇرامىندا باعالى مەتالدار بار تاۋارلاردىڭ زاڭسىز اينالىمى) بويىنشا سوتقا دەيىنگى تەرگەۋ باستالدى.
