ونىڭ ايتۋىنشا, كەلىسسوزدەرگە رەسەي, تۇركيا, يران, سيريا ۇكىمەتى مەن سيريا وپپوزيتسياسىنىڭ دەلەگاتسيالارى قاتىسادى. باقىلاۋشىلار رەتىندە بۇۇ, يوردانيا, ليۆان جانە يراك وكىلدەرى كەلەدى دەپ كۇتىلۋدە.
«2022 جىلعى 22-23 قاراشادا استانا قالاسىندا سيريا بويىنشا كەزەكتى 19-شى حالىقارالىق كەزدەسۋ وتەدى», دەدى قر ءسىم رەسمي وكىلى.
كۇن تارتىبىنە كەلەسى ماسەلەلەر ەنگىزىلەدى:
- سيرياداعى گۋمانيتارلىق جانە الەۋمەتتىك-ەكونوميكالىق جاعداي;
- ساياسي پروتسەستى كەشەندى ىلگەرىلەتۋ;
- سەنىم شارالارى, سونىڭ ىشىندە كەپىلگە الىنعانداردى بوساتۋ جانە حابار-وشارسىز كەتكەندەردى ىزدەۋ;
- سيريانى جانجالدان كەيىن قالپىنا كەلتىرۋ جانە سيريالىق بوسقىنداردىڭ وتانىنا ورالۋىنا جاعداي جاساۋ ماقساتىندا حالىقارالىق قوعامداستىقتىڭ كۇش-جىگەرىن جۇمىلدىرۋ.
ءسىم رەسمي وكىلى اتاپ وتكەندەي, ءبىرىنشى كۇنى كەپىلگەر ەلدەردىڭ ەكىجاقتى جانە ۇشجاقتى كونسۋلتاتسيالارىن وتكىزۋ, سيريالىق تاراپتارمەن كەلىسسوزدەر جۇرگىزۋ, بايقاۋشى تاراپتاردىڭ دەلەگاتسيالارىمەن بايلانىس ورناتۋ كۇتىلۋدە.
ەكىنشى كۇنى كونسۋلتاتسيالاردى جالعاستىرۋ, پلەنارلىق وتىرىس جانە ءباسپاسوز كونفەرەنتسياسى جوسپارلانۋدا.
بۇدان باسقا, كەلىسسوزدەر شەڭبەرىندە بۇۇ-نىڭ كەپىلدىك بەرۋشى ەلدەرى مەن ساراپشىلارىنىڭ, سونداي-اق حالىقارالىق قىزىل كرەست كوميتەتىنىڭ قاتىسۋىمەن كۇشتەپ ۇستالاتىن ادامدار بويىنشا جۇمىس توبىنىڭ وتىرىسىن وتكىزۋ جوسپارلانعان.
