«سامارقاندتا وتكەن تۇركى مەملەكەتتەرى ۇيىمىنىڭ بۇگىنگى سامميتىندە بارلىق مەملەكەتتىڭ تەرريتوريالىق تۇتاستىعىن قولداۋ جانە بۇۇ جارعىسىن ساقتاۋ تۋرالى پرەزيدەنتتىڭ بۇگىنگى مالىمدەمەسىنە قاتىستى باق-تان سۇراقتار كەلىپ ءتۇسىپ جاتىر. وسىعان بايلانىستى مەملەكەت باسشىسى بۇل مالىمدەمەنى سولتۇستىك كيپر تۇرىك رەسپۋبليكاسىنا تۇركى مەملەكەتتەرى ۇيىمىندا باقىلاۋشى مارتەبەسىن بەرۋ تۋرالى وتىنىشىنە وراي جاساعانىن اتاپ وتكىم كەلەدى.
قازاقستان بۇۇ جارعىسىن جانە حالىقارالىق قۇقىقتىڭ نەگىزگى قاعيداتتارىن دايەكتى تۇردە ۇستانادى. پرەزيدەنت بۇل جونىندە بىرنەشە رەت ايتقان», دەپ جازدى ر.جەلدىباي Facebook الەۋمەتتىك جەلىدەگى پاراقشاسىندا.
ايتا كەتسەك, پرەزيدەنت قاسىم-جومارت توقاەۆ سامارقاندتا وتكەن جيىندا قازاقستان بارلىق مەملەكەتتىڭ تەرريتوريالىق تۇتاستىعىن ءسوزسىز قولدايتىنىن ايتقان بولاتىن.
«تۇركى مەملەكەتتەرى ۇيىمىنىڭ قىزمەتىن بۇقارالىق اقپارات قۇرالدارى ارقىلى بەلسەندى تۇردە دارىپتەۋىمىز كەرەك. بۇل – وتە قاجەت نارسە. وسى جۇمىستى ەلدەرىمىزدىڭ ىشىندەگى اقپارات قۇرالدارى جانە بەلگىلى حالىقارالىق اگەنتتىكتەر اياسىندا جۇرگىزۋگە بولادى. سەبەبى الەم قاۋىمداستىعى ءبىزدىڭ تۇركى الەمىندەگى ىقپالداستىقتى نىعايتۋ ءۇشىن جاساپ جاتقان اۋقىمدى جۇمىسىمىز تۋرالى ءبىلۋى قاجەت. شىندىعىن ايتساق, جاھان جۇرتشىلىعى ءبىزدىڭ ۇيىمنىڭ جۇمىسى تۋرالى ءالى دە جاقسى بىلە بەرمەيدى. دەگەنمەن, قازىر تۇركى ىنتىماقتاستىعى يدەياسى بۇكىل الەمنىڭ نازارىن وزىنە اۋدارا باستادى. تۇركى وركەنيەتى تۋرالى حابار بەرەتىن قۇندى دەرەكتەر جەر شارىنىڭ ءتۇرلى ايماقتارى مەن قۇرلىقتارىنان تابىلىپ جاتىر. بۇل – ءبىزدىڭ ەلدەرىمىزگە ورتاق قۇندىلىقتار. سوندىقتان, قولدا بار تاريحي جانە تىلدىك دەرەكتەردى جۇيەلەپ, رەتكە كەلتىرۋ ماڭىزدى مىندەت دەپ ويلايمىن. عىلىمي ينستيتۋتتاردىڭ جانە مەكەمەلەردىڭ اياسىندا بەلسەندى جۇمىس ۇيىمداستىرىپ, ونى الەم جۇرتشىلىعىنا كەڭىنەن تانىستىرۋىمىز كەرەك. ۇيىمنىڭ جۇمىسى ديپلوماتيالىق سامميتتەر مەن قورىتىندى قۇجاتتارى بار كەزدەسۋلەرمەن عانا شەكتەلىپ قالماعانى ءجون. تۇركى مەملەكەتتەرى ۇيىمى بارشا تۇركى الەمىندەگى حالىقتاردى جاقىنداستىراتىن ىقپالدى ورتالىققا اينالۋى قاجەت دەپ سانايمىن. قازاقستان بارلىق مەملەكەتتىڭ تەرريتوريالىق تۇتاستىعىن ءسوزسىز قولدايدى, سونداي-اق بۇۇ جارعىسىن مۇلتىكسىز ساقتاۋ قاجەت دەپ ەسەپتەيدى. بۇل – ءبىزدىڭ ەلىمىزدىڭ نەگىزگى مۇددەسىنە تولىق ساي كەلەتىن ماڭىزدى قاعيدات. سوندىقتان ءبىز وسى قاعيداتقا ءاردايىم باسىمدىق بەرەتىن بولامىز», دەپ تۇيىندەدى ءسوزىن قاسىم-جومارت توقاەۆ.
