بولاشاق چەمپيوندار بەلدەسۋى

امانگەلدى اعانىڭ ەسىمى ايماقتىڭ سپورتسۇيەر قاۋىمىنا جاقسى ءمالىم. كەڭەس وكىمەتى تۇسىندا ەركىن كۇرەستىڭ شەبەرى اتانىپ، تالاي مارتە بايراقتى دودالاردا توپ جارعان سپورتشى اكەدەن ەرتە قالعان. اكەسى 37-ءشى جىلى «حالىق جاۋى» دەگەن جالامەن ۇستالىپ كەتكەن سوڭ بالالار ۇيىنە ءوز ەركىمەن بارادى. وندا ءوزى قاتارلاس بالالارمەن الىسىپ-ءجۇرىسىپ ءجۇرىپ كۇرەستىڭ نەگىزگى تاسىلدەرىن العاشقى مۇعالىمدەرىنەن ۇيرەنە باستايدى. كەيىن پاۆلودار قالاسىنا كەلىپ، جوعارى سپورتتىق ءبىلىم الادى. سپورتتاعى ورلەۋ جولىن ءبىزدىڭ وبلىستا باستاعان اعامىز شەبەرلىگىنىڭ ارقاسىندا ءدۇيىم رەسپۋبليكاعا تانىمال بولىپ، قازاقستان سپورتىنىڭ تاريحىندا وشپەس ءىز قالدىردى. 1959 جىلى ايماقتار اراسىندا وتكەن الاماندا جارتىلاي اۋىر سالماقتا سىنعا ءتۇسىپ، فينالدا اتاقتى ابىلسەيىت ايحانوۆپەن بەلدەسكەن. ودان ۇپاي سانىمەن ۇتىلسا دا امانگەلدى اعا پاۆلودار وبلىسىنىڭ پايداسىنا كۇمىس جۇلدەنى ولجالايدى.

بيىل 17-ءشى رەت وتكىزىلگەن ءداستۇرلى دوداعا استانا، پەتروپاۆل، قوستاناي، كوكشەتاۋ، سەمەي، وسكەمەن، ستەپنوگور قالالارىنان جانە پاۆلودار وڭىرىنەن 350-گە جۋىق جاس بالۋان جينالىپ، ەر بالالار 14، قىزدار 9 سالماق دارەجەسىندە كۇش سىناستى.

– ءتۋرنيردىڭ ويداعىداي ۇيىم­داستىرىلۋىنا وبلىسىمىزداعى گرەك-ريم، ەركىن جانە ايەلدەر كۇرەسى فەدەراتسياسى، اعايىندى كاسىپكەر سادۋاقاسوۆتار، وبلىس­تىق كاسىپوداق ۇيىمدارى دەمەۋ­شىلىك جاسادى. مەنىڭ داڭقتى شا­كىرت­تەرىم، كۇرەس باپكەرلەرى ورازالى مۇحامەتالىنوۆ، نۇرلان ورازالينوۆ قۇرمەتتى مەيمان رەتىندە لوندون وليمپياداسىنىڭ قولا جۇلدەگەرى داۋلەت شابانباي اشىلۋ سالتاناتىنا قاتىسىپ، ابىرويىمدى اسىرعانى ءۇشىن العىسىم زور. جاس ۇلاندار جاقسى دايىندىقپەن كەلگەنى كورىنىپ تۇر، اسىرەسە، جوعارعى سالماقتاعى سپورتشىلاردىڭ اياق الىسى ۇنادى. بۇل ءتۋرنيردى رەسپۋبليكالىق دەڭگەيگە كوتەرگىمىز كەلەدى، – دەيدى ارداگەر سپورتشى.

سايىس جەڭىمپازدارى مەن جۇلدەگەرلەرى ەستەلىك سىيلىق­تارمەن، كۋبوكتارمەن، مەدالدارمەن جانە گراموتالارمەن ماراپاتتالدى. جارىستىڭ باس تورەشىسى ەرنازار قاسقىرباي ۇلى ولاردىڭ بارلىعى ەكىباستۇز قالاسىندا وتكىزىلەتىن رەسپۋبليكالىق تۋرنيرگە جولداما الاتىنىن اتاپ ءوتتى.  جالپى، ايماقتارداعى سپورت مەكتەپتەرىندە جاتتىعاتىنداردىڭ دەنى اۋىل بالالارى ەكەنى ايقىن.  مۇنداي ايماقتىق اشىق باسەكەلەر ارقىلى جاسوسپىرىمدەردىڭ اراسىنان مىقتىلارى ىرىكتەلەدى.

پاۆلودار