توعىزقۇمالاق ءتۋرنيرى

دودا وسىمەن 14-ءىنشى مارتە وتۋدە. 300-دەن استام ويىنشى جەڭىستەن دامەلى بولىپ كەلىپ وتىر. بيىل تۋرنير جىلداعىداي جاس ەرەكشەلىكتەرى بو­يىنشا 5 توپقا جىكتەلىپ، ەر جانە قىز بالالار اراسىندا وتۋدە. رەسپۋب­ليكانىڭ 10 وبلىسىنان قاتىسۋشىلار كەلىپ، جارىستىڭ كورىگىن قىزدىرۋدا. سولاردىڭ اراسىندا باتىس قازاقستان، قوس­تاناي، جەتىسۋ، اباي، ۇلىتاۋ، شى­عىس قازاقستان، اقتوبە، اقمولا، قارا­عاندى وبلىستارىنان جانە ءوزىمىز­دىڭ پاۆلودار ءوڭىرىنىڭ اۋدان-قالا­لارىنان سپورتشىلار باق سىناۋدا.

– شىنىن ايتايىق، گازەتىمىزدىڭ ءداستۇرلى تۋرنيرىنە دەگەن قىزىعۋ­شىلىق جوعارى دەڭگەيدە. بيىلعى جارىسقا 8 سپورت شەبەرى، 30 سپورت شە­بەر­لىگىنە كانديدات، ودان بولەك، ءارتۇر­لى ساناتتاعى سپورتشىلار قاتىسىپ، اقىل-وي جىلدامدىعىمەن جارىسۋدا. جىل سايىن كەمى 300-400 سپورتشى تۋرنيرگە قاتىسادى. باسەكەنى وتكىزۋدەگى نەگىزگى ماقساتىمىز – توعىزقۇمالاقتىڭ بۇقا­را اراسىندا كەڭىنەن تانىلىپ، ونىمەن شۇعىلدانۋشىلار سانىن ەسەلەۋ. 2008 جىلدان بەرى ۇزبەي جالعاسقان تۋرنير ءوزىنىڭ كوزدەگەن مەجەسىن باعىندىرىپ كەلە جاتىر، – دەيدى «Saryarqa samaly» گازەتىنىڭ باس رەداكتورى نۇربول جا­يىق­باەۆ.

جارىس راپيد ءتۇرى بويىنشا، 9، 11، 13، 15، 16 جاس جانە ودان جوعارى جاس­تاعى سپورتشىلار اراسىندا جالعاسۋدا. بيىلعى دوداعا باتىس قازاقستان وبلىسىنان سول وڭىردەگى توعىزقۇمالاق فەدەراتسياسىنىڭ پرەزيدەنتى دانيار ورىنباساروۆ 6 شاكىرتىن ەرتىپ كە­لىپتى. باپكەر كەرەكۋگە ءبىرىنشى رەت كە­لىپ وتىرعاندارىن جەتكىزدى. ال اق­سۋ قالاسىنىڭ كوماندا جەتەكشىسى گۇل­جان ساپاروۆا 18 بالانى ۇكىلەپ قوسقانىن باياندادى. «جىل سايىن وتەتىن بۇل ءتۋرنيردىڭ بىردە-ءبىر ويى­نىن قالدىرعان ەمەسپىز. وسى تۋر­نيرگە 18 بالا دايىنداپ الىپ كەل­­دىم. ولاردىڭ ىشىندە 3 سپورتشى – رەسپۋبليكالىق، حالىقارالىق دەڭگەيدە وتكەن تۋرنيرلەردىڭ جەڭىم­پازى. تالىمگەرلەرىمە ۇلكەن ءۇمىت ارتىپ وتىرمىن»، دەيدى ول.

پاۆلودار وبلىستىق توعىزقۇمالاق فەدەراتسياسىنىڭ ۆيتسە-پرەزيدەنتى ارىستان قاپاەۆ بۇگىندە وڭىردە 2 مىڭ ادام ۇلتتىق سپورتپەن تۇراقتى اينالىساتىنىن ايتادى. ايماعىمىزدا 2 حالىقارالىق دارەجەدەگى سپورت شەبەرى، 20-دان استام سپورت شەبەرى جانە كوپ­تە­گەن سپورت شەبەرلىگىنە كانديداتتار بار. جۋىقتا رينات كەرەيباەۆ ەل چەمپيوناتىن ۇتىپ، ەندى الدا وتەتىن الەم بىرىنشىلىگىنە دايىندالۋدا. ال جانات قايمولدين مەن ءجاميلا بايالداشەۆا - حالىقارالىق تۋرنيرلەردىڭ جۇلدەگەرى. اياجان ەگىمباي ەسىمدى بويجەتكەن جاس­تار اراسىنداعى بىرىنشىلىكتەردە ال­دىڭعى ورىنداردان كورىنۋدە. ايماق توعىز­قۇمالاقشىلارى رەسپۋبليكالىق رەي­تينگتە ۇزدىك ۇشتىكتەن ءتۇسىپ كور­مەگەن.

جارىستىڭ باس تورەشىسى ءشارىپ قاش­كەنوۆتىڭ ايتۋىنشا، «شاحمات ءۇيىنىڭ» سىيىمدىلىعى مۇنداي شاما­داعى ويىنشىلاردى بىردەن قابىل­داۋعا قاۋقارسىز. جىل سايىن ءدال وسى تۋرنيرگە قاتىسۋشىلار كوپ جينالا­تىندىعى سەبەپتى، ورىن جەتكىزە الماي قىسىلىپ قالامىز، دەيدى. سوندىقتان توعىزقۇمالاقشىلارعا ارنالعان سپورت سارايى الداعى ۋاقىتتا كەڭەيتىلسە نەمەسە جاڭادان سالىنىپ بەرىلسە دەگەن تىلەگىن جەتكىزدى.

پاۆلودار