ءوزىنىڭ بالا كۇنگى دوسى قۇمارمەن كەزدەسكەندە ءلايلا وعان دەگەن سەزىمىن جاسىرا المايدى. بىراق ءتانى سالاۋاتتى قۇماردىڭ الدىندا ءوزىنىڭ وسپەي قالعان بويىنان, ۇزىن قولدارىنان قىسىلادى. «مەنى ساعىندىڭ عوي, ءيا, قۇمار؟» دەپ ەركەلەيدى. قۇمار دا بۇكىل شاراپاتىن لايلاعا توگەدى. ءلايلا تاعدىرىنا كۋا بولىپ وتىرىپ ساناڭنىڭ ءبىر ساتكە دە مۇلگىپ كەتۋى مۇمكىن ەمەس. ءلايلا مەن قۇماردىڭ ويىنى ءاربىرىمىزدىڭ ىشىمىزدە ءۇنسىز بۇعىپ جاتقان الدەبىر قۇدىرەتتى قايتا تىرىلتكەندەي, مۇلگىپ جاتقان سەزىمدەرگە جان بىتىرگەندەي بولدى. كەنەت, تالكەك ەتكەن تاعدىردى قايتا الدىڭا تارتادى. سپەكتاكل مۋزىكاسى, ونداعى تراگەديا, ونداعى ادامداردىڭ كوڭىل اۋانى, وي اعىنى, قيمىل-قوزعالىسى قانداي ۇيلەسىم تاپقان دەسەڭىزشى.
اپاسىنىڭ: «قوناقتار كەلگەندە سەن وسى سىقىلىقتاپ كۇلە بەرمەشى, سوسىن باسىڭا بانتيك تاعىپ ال, بالا قالپىڭنان ارىلما, سەن ەسەيگەن جوقسىڭ, سەن ءالى بالاسىڭ», دەپ شەتقاقپاي جاساعانىنا كونبەي, مۇڭ-سىرىن جارىق ايعا ايتادى. ونىڭ جالعىز مۇڭداسى – اي. ودان كەيىنگى بار ءۇمىتى – قۇمار.
سپەكتاكلدىڭ قويۋشى رەجيسسەرى ابزالبەك اسحات ۇلى جاڭاشىل كوزقاراسىمەن, رەجيسسەرلىك شەشىمنىڭ ەرەكشە تەرەڭ, ماعىنالى بولۋىمەن كورەرمەندى تاڭعالدىردى.
پرەمەراعا ءلايلانىڭ ءپروتوتيپى, روزا مۇقانوۆانىڭ «ماڭگىلىك بالا بەينەنى» جازۋىنا تۇرتكى بولعان ەڭلىك تە كەلدى.
«پوليگوننىڭ كەسىرىنەن مۇگەدەك بولىپ قالعان جانداردىڭ سۋرەتتەرى قويىلعان فوتوكورمەدەن العاش رەت ەڭلىكتىڭ سۋرەتىن كوردىم. بالا بەينەدە وسپەي قالعان ءجاسوسپىرىم پەرىشتە قىزدىڭ سۋرەتى ماعان ۇلكەن اڭگىمە جازدىردى. ول سپەكتاكلگە اينالدى, ول كينوفيلمگە اينالدى, ول قۋىرشاق تەاترىندا دا قويىلدى. ەلىمىز تاۋەلسىزدىك الماعاندا مۇنداي جابىق تاقىرىپتاردى جازا الماعان بولار ەدىم. تاۋەلسىزدىكتىڭ ارقاسىندا اشىق جازىپ, جۇرتقا جەتكىزە الدىق. مەن ءوزىم ەڭلىكتى بۇگىن ءبىرىنشى رەت ومىردە كورىپ تۇرمىن, اينالايىن عۇمىر جاسىڭ ۇزاق بولسىن, پەرىشتە قىز», دەدى روزا مۇقانوۆا.
قويىلىمدى تاماشالاعان اقپارات جانە قوعامدىق دامۋ ءمينيسترى دارحان قىدىرالى دە شىعارماشىلىق توپقا ەرەكشە العىسىن جەتكىزدى.
«تەبىرەنىسكە تولى كەرەمەت قويىلىمدى كوردىك. ءبىز قاسىرەتىمىزدى قاسيەتىمىزبەن جەڭگەن حالىقپىز. وسىنداي كەرەمەت شىعارما ءۇشىن روزا اپايعا العىس ايتامىن. وسى تۋىندىنى ورىنداعان «قاناتتىلار» ينكليۋزيۆتى تەاترىنىڭ ونەرپازدارىنا ريزاشىلىعىمدى بىلدىرەمىن. ءبىز سىزدەرمەن ماقتانامىز, سىزدەردىڭ شىن مانىندە قاناتتارىڭىز بار. وسىنداي تازالىقتارىڭىزبەن, شىنايى ونەرلەرىڭىزبەن قالىقتاي بەرىڭىزدەر», دەدى مينيستر.
باستى رولدەگى ءلايلا بەينەسىن سپورتتىق بيدەن حالىقارالىق جارىستاردىڭ چەمپيونى, ەندىگى كەزەكتە عاجاپ اكتريسالىق قابىلەتىمەن تانىلعان ماليكا مۇحتاروۆا سومداسا, قۇمار بەينەسىندەگى دەبيۋتتىك ءرولىن جاس اكتەر ءاليحان نۇرلان ۇلى ۇلكەن ابىرويمەن الىپ شىقتى.
