بوتوكسپەن سال اۋرۋىن ەمدەيدى

قازاقستاندا كوسمەتولوگياداعى ەڭ كوپ تارالعان پرەپاراتتاردىڭ كەيبىرى مەديتسينادا ءتيىمدى قولدانىلا باستاعان. ماڭدايداعى، قاس پەن كوز اينالاسىنداعى جانە ەرىندەگى اجىم­دەردى كەتىرۋ ءۇشىن كەڭىنەن پايدالانىلاتىن جالپىعا تانىمال بوتۋليكسين ديستونيا، ميگرەن، گيپەرگيدروز، ۆەگەتاتيۆتى بۇزىلۋلار جانە تسەرەبرالدىق سال اۋرۋى سياقتى اۋرۋلاردى ەمدەۋدە تيىمدىلىگىن بايقاتىپ وتىر.

سال اۋرۋىنا شالدىققان بالانىڭ اناسى ينديرا نۇرعاليەۆانىڭ ايتۋىنشا، ديسپورت ەگىلگەننەن كەيىن جەتكىنشەكتىڭ دەنساۋلىق جاعدايى قالپىنا كەلە باستاعان كورىنەدى.

– ەگىزدەردىڭ ۇلكەنى ءبىر ەكپەدەن كەيىن 3-4 قادام جاساي باستادى. قول-اياعىنىڭ سىڭىرلەرى سوزىلىپ، جالپى جاعدايىنىڭ جاقسارعانىن بايقادىق. ءبىز وسى جىلدىڭ قىركۇيەگىندە ەكىنشى ەكپەنى الدىق. قازىر بالامنىڭ جاعدايى وتە جاقسى دەۋگە بولادى. وزدىگىنەن 1-1،5 مەترگە دەيىن جۇرە الادى. بوتوكسقا پايدالانىلاتىن پرەپاراتقا قاتىستى باستاپقىدا سەنىمسىزدىك بولعان. دەگەنمەن ناتيجەسىن كورگەن سوڭ بويىمىزداعى قورقىنىش سەيىلىپ سالا بەردى. قازىر بالاپانىمىزدىڭ دەنساۋلىعىن قالىپتى ۇستاپ، بۇلشىق­ەتتەرىنىڭ جيىرىلۋىن بولدىرماۋ ءۇشىن كوسمەتولوگيالىق ەكپەگە دەگەن سەنىمىمىز نىعايا ءتۇستى، – دەيدى انا.

مەديتسينا وكىلدەرىنىڭ سوزىنە سۇيەنسەك، پرەپارات ادامنىڭ قول-اياعىنداعى بۇلشىقەتتەردىڭ پاتولو­گيالىق تونۋسىن تومەندەتىپ، وڭالتۋ ەمشارالارى مەن بالا كۇتىمىن جەڭىلدەتەدى. تەراپيانى نەعۇرلىم ەرتە باستاساڭىز، وڭالتۋ وڭايىراق بولاتىنىن ايتادى ماماندار.

– ءبىز بۇل پرەپاراتتى اي سايىن بىرنەشە ەمدەلۋشىگە سالامىز. بارىن­شا جاقسى ناتيجە كورىپ وتىرمىز. ەمدەلىپ جاتقاندار مەزگىل سايىن كەلىپ سالدىرۋى كەرەك. سەبەبى ارادا ۇزاق ۋاقىت وتسە، تيىمدىلىگى تومەندەيدى. كەيبىرەۋلەر ءۇشىن بوتۋليكسيننىڭ اسەرى 3-4 ايعا نەمەسە ودان دا كوپ ۋاقىتقا جەتۋى مۇمكىن. مۇنىڭ ءبارى ادام اعزاسىنا تىكەلەي بايلانىستى. ال تەرىس اسەرى ازىرشە بايقالمايدى، – دەيدى ءوڭىردىڭ باس شتاتتان تىس بالالار نەۆروپاتولوگى، وبلىستىق بالالار اۋرۋحاناسىنىڭ نەۆرولوگيا ءبولىمىنىڭ مەڭگەرۋشىسى ارمان يمانوۆ.

بۇل رەتتە ناۋقاس بالالار پرەپاراتتى ءمامس ەسەبىنەن وبلىستىق بالالار اۋرۋحاناسىنان الا الاتىنىن ايتا كەتكەن ءجون.

پاۆلودار وبلىسى