اقسۋداعى كرەاتيۆتى جاستار ورتالىعىنىڭ جەتەكشىسى ناريمان وسكەنباەۆ ەسكيزدى تاڭداۋ ءۇشىن «Young patriot» دەپ اتالاتىن ارنايى بايقاۋ ۇيىمداستىرىلعانىن ايتادى. كەلىپ تۇسكەن جۇمىستاردىڭ ىشىندە 17 جاستاعى ارۋجان ابجاتوۆانىڭ سۋرەتى ۇزدىك دەپ تانىلعان. «جاستاردان مۋرال» دەپ اتالاتىن جوبا جوعارىدا ايتقانىمىزداي قارۋلى كۇشتەردىڭ مەرەيتويىنا ارنالدى.
– بايقاۋ تۋرالى اقپاراتتى وقىعانىمدا ونىڭ يدەياسى كوڭىلىمە بىردەن ۇيالادى. ەڭ اۋەلى حالقىمىزدىڭ جاۋىنگەرلىك رۋحىن ءبىر سۋرەتتە قالاي بىرىكتىرسە بولادى دەگەنگە باس قاتىردىم. ويىما جوڭعار شاپقىنشىلىعىنداعى قازاقتىڭ باس قولباسشىسى بوگەنباي باتىر ورالا بەردى. ودان سوڭ ەسىمى تىرىسىندە اڭىزعا اينالعان اتاقتى پانفيلوۆشى, پولكوۆنيك باۋىرجان مومىش ۇلىنىڭ ەرلىك ىستەرىن بۇگىنگى جاس ۇرپاق بىلۋگە ءتيىس دەپ شەشتىم. ال مۋرالداعى ءۇشىنشى بەينە – زاماناۋي قازاق اسكەرىنىڭ ساربازىن تابۋ قيىن بولمادى, – دەيدى جاس كەسكىندەمەشى.
ارۋجان بيىل وبلىس ورتالىعىنداعى باۋىرجان مومىش ۇلى اتىنداعى ورتا مەكتەپتى ءتامامداپتى. بولاشاق ماماندىعىن ساۋلەت سالاسىمەن بايلانىستىرماق ويى بار. قازىرگى كۇنى تۇركيانىڭ انكارا قالاسىندا ءبىلىمىن جالعاستىرىپ جاتىر.
بۇل كەسكىندەمە «My Style» اەروگرافيالىق ستۋدياسى سالعان اقسۋ قالاسىنداعى ءۇشىنشى مۋرال بولىپ سانالادى. ستۋديا باسشىسى انتون تولچين توعىز قاباتتى ءۇيدىڭ سىرتقى قابىرعاسىنا مۇنداي كەڭ اۋقىمداعى سۋرەتتى ءتۇسىرۋ تاجىريبەدە ءبىرىنشى رەت بولدى دەيدى. قازاق باتىرلارىن زاماناۋي ۇلگىدە بەينەلەۋ ءۇشىن قىزمەتكەرلەر 60 كيلوگرامم بوياۋ جۇمساپتى. اۆتوكوتەرگىشتىڭ كومەگىمەن مۋرال 18 ساعات ىشىندە سالىنىپ شىقتى.
پاۆلودار وبلىسى,
اقسۋ قالاسى
