كاسپي ەندەميگىنىڭ جاپپاي قىرىلعانى تۋرالى حابارلاما كاسپي يتبالىعىن زەرتتەۋ جانە وڭالتۋ ورتالىعىنا 7 قاراشا كۇنى ساعات 19.30-دا كەلىپ ءتۇستى. ماماندار وقيعا ورنىنا باردى.
قازىر جاعالاۋ سىزىعىن زەرتتەۋ جالعاسۋدا. وبلىس اكىمدىگى مەن ەكولوگيا, گەولوگيا جانە تابيعي رەسۋرستار مينيسترلىگىنىڭ بالىق شارۋاشىلىعى كوميتەتى ءولى يتبالىقتاردى جيناۋ ءۇشىن قىزمەتكەرلەر مەن كولىكتەر ءبولدى.
«8 قاراشاداعى جاي-كۇي بويىنشا ءبىر-بىرىنەن شالعاي جەرلەردە ورنالاسقان 101 ءولى يتبالىقتىڭ ءولى دەنەسى تابىلدى. يتبالىقتاردىڭ نەلىكتەن قىرىلىپ قالعانىن انىقتاۋ ءۇشىن ءتىن ۇلگىلەرىنىڭ زەرتحانالىق ساراپتامادان ءوتۋ مۇمكىندىگى انىقتالۋدا. ويتكەنى تابىلعان جانۋارلاردىڭ دەنەلەرى ىدىراۋعا ۇشىراعان», دەپ ءتۇسىندىردى كاسپي يتبالىعىن زەرتتەۋ جانە وڭالتۋ ورتالىعىنىڭ ديرەكتورى ءادىلحان توۆاساروۆ.
قازىر ورتالىق ماماندارى بالىق شارۋاشىلىعى كوميتەتىمەن بىرلەسىپ كاسپي تەڭىزىنىڭ باسقا دا ايماقتارىندا بارلاۋ جۇمىستارىن جۇرگىزىپ جاتىر.
زەرتحانالىق زەرتتەۋلەر ءۇشىن ءولى يتبالىقتار تابىلعان جەردەن سۋ مەن توپىراق ۇلگىلەرى الىنادى.
