يگىلىكتى ءىس-شارانىڭ بەتاشارى بيكەن ريموۆا اتىنداعى تالدىقورعان دراما تەاترى عيماراتىنىڭ الدىندا باستاۋ الدى. كۇرە جولعا دەيىن توسەلگەن قىزىل كىلەم ۇستىمەن قازاق كينو جانە تەاتر ونەرىنىڭ تارلانى, قازاقستاننىڭ حالىق ءارتىسى تۇڭعىشباي جامانقۇلوۆ, مەملەكەتتىك سىيلىقتىڭ لاۋرەاتى, كورنەكتى اقىن, دراماتۋرگ يرانبەك (يران-عايىپ) ورازباەۆ, بەلگىلى دراماتۋرگ ءسۇلتانالى بالعاباەۆ باستاعان تۇلعالار ءجۇرىپ ءوتتى. سونىمەن قاتار ءىس-شاراعا كەلگەن حالىق بيكەن, شولپان اپالارىمىزدىڭ ۇرپاقتارى مەن تۋىستارىن, ب.ريموۆا اتىنداعى تالدىقورعان تەاترىنىڭ العاشقى قارلىعاشتارى مەن اعا, ورتا, جاس بۋىن وكىلدەرىن ەرەكشە ىقىلاسپەن قارسى الدى.
ونەردىڭ قارا شاڭىراعىنداعى مۋزەيدى كوپشىلىك تاماشالاسا, تۇڭعىشباي جامانقۇلوۆ, يرانبەك ورازباەۆ, حالىقارالىق «الاش» ادەبي سىيلىقتىڭ لاۋرەاتى امىرە ءارىن, تەاتر سىنشىسى, م.اۋەزوۆ اتىنداعى ادەبيەت جانە ونەر ينستيتۋتى تەاتر ءبولىمىنىڭ مەڭگەرۋشىسى, ونەرتانۋ كانديداتى امانگەلدى مۇقان, كينو جانە تەاتر اكتەرى ساعىندىق ءجۇمادىل باستاعان زيالى قاۋىم وكىلدەرى ءباسپاسوز ءماسليحاتىنا قاتىسىپ, قوس تۇلعانىڭ ومىرىنەن سىرلى ەستەلىكتەر ايتتى.
ءوز كەزەگىندە تۇڭعىشباي جامانقۇلوۆ پەن يرانبەك ورازباەۆ 100 جىلدىق مەرەيتويعا وراي باسىلىپ شىققان «بيكەن ريموۆا» البومى مەن «شولپان-جۇلدىز» كىتابىنىڭ لەنتاسىن قيدى.
جۋرناليستەر قاۋىمىنا تەلقوڭىر تاعدىر يەلەرى تۋرالى تەبىرەنە تەرمەلەگەن زيالى قاۋىم وكىلدەرىنەن كەيىن بيكەن ريموۆانىڭ قىزى مەرۋەرت قۇسايىنوۆا ءسوز الىپ, عازيز جۇرەكتى اناسى جايلى جىلى ەستەلىگىن جەتكىزدى. سونىمەن قاتار ساحناداعى ارىپتەسى راحيليام ماشۋروۆا بيكەن اپانىڭ «قوزى كورپەش-بايان سۇلۋ» قويىلىمىندا بايان سۇلۋ وبرازىن سومداعاندا تاققان بەلبەۋىن بۇگىنگە دەيىن ساقتاپ كەلگەنىن, ءوزى دە سان قويىلىمدا كوزىندەي كورىپ تاعىنعانىن ايتىپ, اتالعان جادىگەردى ونەر وشاعىنىڭ مۋزەيىنە تابىس ەتتى.
ءدۇبىرلى سالتانات بارىسىندا ساحناعا كوتەرىلگەن وبلىس اكىمىنىڭ ورىنباسارى رۋستام ءالي ءسوز الىپ, عۇمىرىندا 200-دەن استام ايەل وبرازىن سومداعان ايگىلى ءارتىستىڭ ونەگەلى ءومىرىن, شەجىرەلى عۇمىر-بەلەسىن ايشىقتاي كەلە:
«بۇل توي بۇكىل ەلدىڭ ءدۇبىرلى دۋمانى. سوندىقتان الداعى جىلى بيكەن اپامىزدىڭ تويىن ەرەكشە اتاپ وتەمىز. سونىمەن قاتار ابزال انا, الىپ جۇرەكتى تەاتر مايتالمانى بيكەن ريموۆانىڭ ەڭسەلى ەسكەرتكىشىن قالامىزدا تۇعىرىنا قوندىرامىز», دەپ ونەرسۇيەر ەلگە ەرەكشە قۋانىشتى حاباردى جەتكىزدى.
وبلىس باسشىسىنىڭ ورىنباسارى ايتقان قۋانىشتى لەپەستەن كەيىن «اباي» تەلەارناسى دايىنداعان ب.ريموۆا تۋرالى «بىرەگەي» دەرەكتى ءفيلمى مەن ش.جانداربەكوۆا جايىندا سىر شەرتەتىن بەينەفيلم جۇرتشىلىق نازارىنا ۇسىنىلدى.
عاسىرلىق عۇمىر عيبراتىنا شومعان كورەرمەن ءوز كەزەگىندە قازاقستاننىڭ ەڭبەك سىڭىرگەن ءارتىسى مۇرات احمانوۆتىڭ رەجيسسەرلىگىمەن جاڭا باعىتتا ساحنالانعان بيكەن اپامىزدىڭ «قوس مۇڭلىق» دراماسىن تاماشالادى.
ءسوز اياعىندا ەل اعالارى بيكەن اپامىزدىڭ قىزى مەرۋەرت قۇسايىنوۆا مەن «قوس مۇڭلىق» دراماسىندا باستى ءرولدى (كۇنزيپا) سومداعان حالىق ءارتىسى الماحان كەنجەبەكوۆانىڭ يىعىنا زەرلى كامزول جاپتى.
