«استانا» – قاسيەتتى ساننىڭ يەگەرى

وتاندىق فۋتبولشى جانە فۋنكتسيونەر ميحايل گۋرماننىڭ قۇرمەتىنە وتكىزىلگەن ەل بىرىن­شى­لىگىنىڭ سوڭعى تۋرىندا چەم­پيون­دىقتان ۇمىتكەر «استانا» قارا­عاندىعا ساپار شەگىپ, جەر­گى­لىكتى «شاحتەر» كلۋبىمەن كەزدەسسە, «اقتوبە» ءوز الاڭىندا الماتىنىڭ «قايراتىمەن» جاسىل الاڭدا جولىقتى. جارىس جەڭىمپازىن انىقتاپ بەرەتىن ەكى ماتچتا دا باس جۇلدەدەن ءۇمىت­تى كوماندالار جەڭىسكە جەت­كە­نىمەن, سوڭعى تۋر الدىندا «اق­تو­بەنىڭ» الدىن وراپ كەتكەن ەلوردالىق ۇجىم قازاقستان بىرىن­شىلىگىنىڭ 30-شى ماۋسىمىندا توپ جاردى. 26-تۋردا «استانا» سىرت الاڭدا «شاحتەردى» 3:2 ەسەبىمەن تىزە بۇكتىرسە, «اقتوبە» جان­كۇيەر­لەرىنىڭ قىزۋ قول­دا­ۋى­نىڭ ار­قا­سىن­دا «قاي­رات­تى» ءىرى ەسەپپەن جەڭدى – 4:1. وسىلايشا, «استانا» – چەمپيون, «اقتوبە» فۋتبولشىلارى كۇمىس جۇلدەنى موينىنا ءىلدى.

«قايراتتىڭ» سوڭعى تۋرداعى جەڭىلىسىن قوستانايدىڭ «توبى­لى» ءتيىمدى پايدالانىپ, تۋرنير كەستەسىندەگى ءۇشىنشى ورنىن ساقتاپ قالدى. ورالدا جەرگىلىكتى «اقجايىقپەن» ويناعان «توبىل» بۇل ماتچتا جەڭىسكە جەتىپ قانا قوي­ماي (3:1), الاڭ يەلەرىن پرەمەر-ليگادان شىعارىپ جى­بەردى. ءسويتىپ, «اقجايىق» كە­لە­سى ماۋسىمدى ءبىرىنشى ليگادا وتكىزەتىن بولدى. يگور سەرگەەۆ پەن سەرج دەبلە دۋبلىنە «اقجايىق» فۋتبولشىسى يليا كوۆالەنكو ءبىر دوپپەن جاۋاپ قايتارعانىمەن, كومانداسىن جوعارى توپتا ساقتاپ قالا المادى. دەي تۇرعانمەن, ورال كلۋبى ءۇشىن بيىلعى فۋتبول ماۋسىمى ءالى اياقتالعان جوق. ولار 12 قاراشادا شىمكەنتتىڭ «ورداباسى» كلۋبىمەن قازاقستان كۋبو­گىن ساراپقا سالادى. جەڭىسكە جەت­كەن ۇجىم كەلەر جىلعى ەۋرو­كۋبوك ويىندارىنا جولداما الادى.

سونداي-اق كەلەسى جىلى «اق­جا­يىقپەن» بىرگە تۇركىس­تان­نىڭ «تۇرانى» دا ءبىرىنشى ليگادا دوپ تەبەتىن بولدى. بىرەر جىل بۇرىن عانا جوعارى توپقا قوسىلىپ, اتاۋىن «تۇران» دەپ وزگەرتكەن وڭتۇستىكتىڭ كومانداسى سوڭعى تۋردا «تارازدان» باسىم تۇسسە دە (3:2), ءبارىبىر پرەمەر-ليگاداعى ورنىن ساقتاپ قالا المادى.

ال ءبىرىنشى ليگادا جەڭىسكە جەتكەن كوكشەتاۋدىڭ «وقجەتپەسى» مەن ەكىنشى ورىنعا تابان تىرەگەن قىزىلوردانىڭ «قايسارى» پرەمەر-ليگاعا جولداما جەڭىپ الدى. «وقجەتپەس» 2019 جىلعى ماۋسىمنىڭ قورىتىندىسى بويىنشا تومەنگى ليگاعا ءتۇسىپ قالعانىن جانكۇيەرلەر جاقسى بىلەدى. ەندى, مىنە, اراعا ەكى جىل سالىپ, جوعارى توپقا قايتا قوسىلدى. «قايسار» ءبىرىنشى ليگادا ءبىر عانا ماۋسىم وتكىزدى. ءسويتىپ, كەلەسى جىلعى ەل چەمپيوناتىندا «وقجەتپەس» پەن «قايسار» «اقجايىق» پەن «تۇراننىڭ» ورنىن باساتىن بولدى.

بيىلعى فۋتبول ماۋسىمىنىڭ ستاتيستيكاسىنا از-كەم توقتالىپ وتەر بولساق, 26 تۋردا 53 ۇپاي جيناپ, چەمپيون اتانعان «استانا» وسىمەن جەتىنشى مارتە قوس قۇ­لاق­تى كۋبوكتى ولجالاپ, ەل بىرىنشىلىگىندە ەڭ كوپ جەڭىسكە جەت­كەن كوماندا رەتىندە رەكورد ورناتتى. بۇعان دەيىنگى رە­كورد تا «استاناعا» تيەسىلى ەدى. قازاقستان چەمپيوناتىندا بەس مارتە توپ جارعان «اقتوبە» ەكىنشى ورىندا كەلەدى. سونداي-اق ەلوردالىق كوماندا 26 تۋردىڭ 16 كەزدەسۋىندە جەڭىسكە جەتىپ, 5 ماتچتا قارسىلاستارىمەن تەڭ تۇسسە, 5 ويىندا جەڭىلىستىڭ كەرمەك ءدامىن تاتۋعا ءماجبۇر بولدى. «استانا» فۋتبولشىلارى قارسىلاستارى قاقپاسىنا جالپى سانى 65 گول سوعىپ, ءوز قاقپالارىنا 24 گول وتكىزىپ الدى.

ءبىر ماۋسىمدا 18 گول سوققان «استانانىڭ» پورتۋگاليالىق فۋتبولشىسى پەدرو ەۋجەنيو ۇزدىك سۇرمەرگەن اتاندى. ەكىنشى ورىندى «استانانىڭ» تاعى ءبىر وكىلى, حورۆاتيالىق مارين تو­ماسوۆ (15) يەلەنسە, ۇزدىك ۇش­تىكتى «اتىراۋدىڭ» شابۋىلشىسى اندريا فيليپوۆيچ (13) تۇيىن­دەدى. بايقاپ وتىرساڭىزدار ءۇش مەرگەن دە لەگيونەر.

چەمپيوناتتىڭ ەڭ ءتارتىپسىز كومانداسى رەتىندە بىرىنشىلىك دەبيۋتانتى «ماقتاارال» كوزگە ءتۇستى. 26 ويىندا تۇركىستان وبلىسى كلۋبىنىڭ جەتى فۋتبولشىسى تورەشى تاراپىنان «قىزىل» قاعازبەن جازالانىپ, الاڭنان قۋىلعان. كەيىنگى ورىندارعا «تۇران» (6), «شاحتەر», «قاي­رات», «تاراز» (5) كلۋبتارى جاي­عاسقان. ال «استانا» مەن «قىزىلجار» فۋتبولشىلارىنا تەك ءبىر-ءبىر مارتە «قىزىل» قاعاز كورسە­تىلگەن. جالپى, وسى ماۋسىمدا 51 فۋتبولشىنىڭ «قىزىل» قاعازبەن جازالانعانىن ايتا كەتەيىك.