«اۆتوموبيل جولدارىنىڭ ساپاسىن جاقسارتۋعا ەرەكشە ءمان بەرەمىز. مەن بۇعان دەيىن «بەينەۋ-شالقار» تاس جولى قۇرىلىسىنىڭ ماڭىزدىلىعى جونىندە ايتتىم. جۇمىس وتە باياۋ ءجۇرىپ جاتىر. ۇكىمەتكە قۇرىلىستى باستاۋ ءۇشىن قاجەتتى قۇجاتتاردى جەدەل دايىنداۋدى تاپسىرامىن.
ءوڭىر تۇرعىندارى وبلىستىق دەڭگەيدەگى جولدىڭ ساپاسى جونىندە ءجيى شاعىم ايتادى. ۇكىمەت اكىمدىكپەن بىرلەسىپ, «اقتاۋ – فورت-شەۆچەنكو», «تاۋشىق-شەتپە» جولدارىن جوندەۋگە كەلەسى جىلدان باستاپ كىرىسۋى كەرەك. جول ساپاسى – ءار ايماقتىڭ دامۋ دەڭگەيىن ايقىندايتىن باستى كورسەتكىشتىڭ ءبىرى», دەپ اتاپ ءوتتى پرەزيدەنت.
سونداي-اق ول ازاماتتار دامۋدىڭ ناتيجەسىن جينالىستاردا ەمەس, كۇندەلىكتى ومىردە كورىپ, سەزىنۋى كەرەكتىگىن ايتتى.
«ەكونوميكانىڭ تۇراقتى دامۋىنا تىڭ سەرپىن بەرۋ ءۇشىن وبلىستىڭ ينۆەستيتسيالىق الەۋەتىن ارتتىرعان ءجون. «اقتاۋ تەڭىز پورتى» ارنايى ەكونوميكالىق ايماعىنىڭ قىزمەتى بۇعان مول مۇمكىندىك تۋعىزىپ وتىر. بۇل ايماق – ينۆەستيتسيا تارتۋ, ءونىم ءوندىرۋ, سالىق تولەۋ كورسەتكىشتەرى بويىنشا رەسپۋبليكادا ەڭ ۇزدىك ءۇش ايماقتىڭ ءبىرى. بۇعان دەيىن مەن ارنايى ەكونوميكالىق ايماقتاردا بوس جاتقان جەر تەلىمدەرىن ينفراقۇرىلىممەن قامتاماسىز ەتۋدى تاپسىردىم. وسى جۇمىستى جانداندىرامىز», دەدى مەملەكەت باسشىسى ءوز سوزىندە.
سونداي-اق ول ەلىمىزدىڭ شەتەلدىك ارىپتەستەرمەن ينۆەستيتسيالىق ىنتىماقتاستىقتى دامىتىپ كەلە جاتقانىن العا تارتتى. سونىڭ ءبىرى – «جاسىل» سۋتەگىن ءوندىرۋ جانە تاراتۋ ورتالىعىن» سالۋ جوباسى» ەكەنىن ايتىپ, ۇكىمەت ارنايى ەكونوميكالىق ايماقتاردىڭ جۇمىس ىستەۋ مەرزىمىن ۇزارتۋى كەرەك دەپ تۇيىندەدى.
