«وبلىستىڭ كولىك-لوگيستيكالىق جانە ينۆەستيتسيالىق الەۋەتىن ارتتىرۋ كەرەك. ماڭعىستاۋ – گەوگرافيالىق تۇرعىدان ۇتىمدى جەردە ورنالاسقان ءوڭىر. ءبىز بۇل ولكەنى الەمدىك دەڭگەيدەگى كولىك-ترانزيت تورابىنا اينالدىرۋىمىز كەرەك», دەدى پرەزيدەنت.
قاسىم-جومارت توقاەۆتىڭ ايتۋىنشا, بۇگىندە كاسپي تەڭىزىنىڭ ماڭىزى ارتا ءتۇستى.
«پورتتى قالا اقتاۋ – قازاقستاننىڭ تەڭىزگە شىعاتىن قاقپاسى. جاھاندىق لوگيستيكالىق جۇيە قايتا قالىپتاسىپ جاتقان قازىرگى كەزدە كاسپي تەڭىزىنىڭ ماڭىزى كۇرت ارتا ءتۇستى. پورتتىڭ ينفراقۇرىلىمىن دامىتۋ ءۇشىن ينۆەستيتسيا تارتۋدى, كونتەينەرلىك جانە كولىك-لوگيستيكالىق حاب قۇرۋدى كوزدەپ وتىرمىز. ءبىز ءۇشىن قازىرگى الەمدىك نارىقتاعى احۋالدى ەسكەرىپ, ترانسكاسپي باعدارىن ودان ءارى دامىتۋ وتە ماڭىزدى. وسى ماسەلە بويىنشا سەرىكتەس ەلدەرمەن ءوزارا تۇسىنىستىك بار. اقتاۋ جانە قۇرىق پورتتارىنىڭ قۋاتىن ارتتىراتىن بولدىق. بۇل ولاردىڭ وتكىزۋ مۇمكىندىگىن جەتىلدىرىپ, مۇناي تاسىمالداۋ كولەمىن جىلىنا 20 ميلليونعا دەيىن جەتكىزۋ ءۇشىن قاجەت», دەپ قوستى قازاقستان پرەزيدەنتى.
