بۇگىندە ۋنيۆەرسيتەت كامپۋسى شاعىن قالا كەيپىندە تۇرلەنىپ كەلەدى. قازۇزۋ قالاشىعىندا 7 عىلىمي-زەرتتەۋ ينستيتۋتى, 29 عىلىمي ورتالىق, 2 ۇجىمدىق پايدالانۋ ورتالىعى, 125 عىلىمي جانە وقۋ زەرتتەۋ زەرتحانالارى ورنالاسقان. مۇنىمەن قوسا «كەرەمەت» قىزمەت كورسەتۋ جانە مەديتسينالىق ورتالىعىندا دا ستۋدەنتتەر ءۇشىن قولايلى جاعداي جاسالعان.
بيىل قالاشىقتاعى جاتاقحانالار جەڭىل جانە كۇردەلى جوندەۋدەن ءوتتى. زاماناۋي تالاپتارعا ساي جاراقتالعان №5 جاتاقحانانىڭ اشىلۋىنا ۋنيۆەرسيتەت باسشىلىعى, وقىتۋشى-پروفەسسورلار قۇرامىمەن قاتار قارا شاڭىراقتى ءار جىلدارى بىتىرگەن تۇلەكتەر قاتىستى.
ءال-فارابي اتىنداعى قازۇزۋ-دىڭ باسقارما توراعاسى – رەكتورى جانسەيىت تۇيمەباەۆ ستۋدەنتتەردى جاڭا قونىسىمەن قۇتتىقتاپ, بەس قاباتتى عيماراتتىڭ جايىمەن تانىستىردى. رەكتور اتاپ وتكەندەي, بۇگىندە 26 مىڭ ستۋدەنت ءبىلىم الىپ جاتقان ۇلتتىق ۋنيۆەرسيتەتتە 6 مىڭ ورىنعا ارنالعان جاتاقحانا بار. الداعى ۋاقىتتا قازۇزۋ قالاشىعىندا تاعى دا جاڭا عيماراتتار بوي تۇزەپ, ستۋدەنتتەردىڭ ساپالى ءبىلىم الۋىمەن قاتار, شىعارماشىلىق دامۋىنا دا مۇمكىندىك جاسالاتىن بولادى.
«QS جاھاندىق رەيتينگىندە 150-ورىندا تۇرعان ۋنيۆەرسيتەتتىڭ ىستانبۇل, بىشكەك قالالارىندا فيليالى اشىلىپ, ەندىگى كەزەكتە وزبەكستاندا اشۋ جوسپاردا تۇر. مەملەكەت باسشىسى ءوزىنىڭ سايلاۋالدى باعدارلاماسىندا ەلىمىزدەگى ستۋدەنتتەردى جاتاقحانامەن تولىق قامتاماسىز ەتۋ مىندەتىن قويعانى بەلگىلى. وسى ورايدا پرەزيدەنتتىڭ الماتىعا ساپارى بارىسىندا ستۋدەنتتەرگە قولايلى جاعداي جاساۋ ماقساتىندا ازىرلەنگەن قازۇزۋ باس جوسپارى تانىستىرىلعان بولاتىن. الداعى جىلداردا قالاشىقتا تاعى دا 10-نان استام جاتاقحانا مەن الەۋمەتتىك نىساندار سالۋ كوزدەلىپ وتىر», دەدى رەكتور.
بۇگىندە ۋنيۆەرسيتەتتە 3 مىڭداي شەتەلدىك ستۋدەنت ءبىلىم الۋدا. وتكەن جىلى 100-دەن استام شەتەلدىك پروفەسسور كەلىپ ساباق بەردى. تاياۋ كەلەشەكتە وسى كونتينگەنتتى كوبەيتىپ, قوس ديپلومدى باعدارلامالاردى جەتىلدىرۋ باعىتىنداعى جۇمىس جالعاسادى. بۇگىندە اتالعان وقۋ ورنىنىڭ يسپانيا, فرانتسيا, رەسەيدىڭ وقۋ ورىندارىمەن قوس ديپلومدى باعدارلامالارى جالعاسىن تاۋىپ كەلەدى.
جۋرناليستيكا فاكۋلتەتىنىڭ دەكانى نۇرجان قۋانتاي ۇلى ۋنيۆەرسيتەتتە وقيمىن دەگەن ستۋدەنتكە جايلى جاعدايدىڭ ءبارى جاسالعانىن جەتكىزدى.
«جاڭا تۇرپاتتى جاتاقحانا زاماناۋي بولمەلەرمەن عانا ەمەس, شىعارماشىلىق ورتالىقتارمەن دە قامتاماسىز ەتىلىپ وتىر. وقۋ ورنىندا كاسىپوداق, جاستار ۇيىمدارىنىڭ جۇمىسى جاتاقحاناداعى رۋحاني مادەني كەشتەرگە ۇلاسىپ جاتادى. ءار سەنبى سايىن وتەتەتىن ادەبي كەشتەر, فارابي كلۋبى, جايدارمان ستۋدەنتتىك كلۋبتارىنىڭ جاستار بەلسەندىلىگىن ارتتىرۋداعى ىقپالى زور», دەدى ن.قۋانتاي ۇلى.
جاڭا جاتاقحانانىڭ تۇرعىنى, جۋرناليستيكا فاكۋلتەتىنىڭ 1-كۋرس ستۋدەنتى حامزا ەردەن ءوز اسەرىمەن بولىسە كەلىپ: ء«بىز №5 جاتاقحانادان قازاق جۋرناليستيكاسىنىڭ تاريحى وربىگەن قاسيەتتى مەكەنگە قايتا ورالدىق. بۇل جاتاقحانادا كوپتەگەن زيالى قاۋىم وكىلى تۇرعان. مۇندا ستۋدەنتتەر جايلى ءومىر ءسۇرۋى ءۇشىن بارلىق جاعداي جاسالىپ وتىر», دەپ اتاپ ءوتتى.
سوڭعى بەس جىلدا №5 جاتاقحانادا فيزيكا-تەحنيكالىق فاكۋلتەت ستۋدەنتتەرى تۇرىپ كەلگەن بولاتىن. ۋنيۆەرسيتەت باسشىلىعىنىڭ اتىنا تۇلەكتەر تاراپىنان جاتاقحانانى جۋرناليستيكا فاكۋلتەتىنە قايتا بەرۋ تۋرالى ۇسىنىس تۇسكەننەن كەيىن, ءتيىستى شەشىم قابىلدانىپ, كۇردەلى جوندەۋدەن وتكەن جاتاقحانا بولاشاق جۋرناليستەرگە قايتا پايدالانۋعا بەرىلدى. بۇگىندە جۋىناتىن بولمە, جيھازىنا دەيىن جاڭارعان جاتاقحانا ينتەرنەت جەلىسىنە قوسىلىپ, ءار سەكتسياعا زاماناۋي دۋش كابينالارى قويىلىپ, سانيتارلىق-تەحنيكالىق جابدىقتار اۋىستىرىلدى.
الماتى
