مۇنداي كەلىسىم ساۋدا جانە ينتەگراتسيا ءمينيسترى سەرىك جۇمانعارين باستاعان قازاقستاندىق دەلەگاتسياسىنىڭ يران يسلام رەسپۋبليكاسىنا جۇمىس ساپارى كەزىندە جاسالعان.
كەزدەسۋ بارىسىندا تالقىلانعان ماسەلەلەر - قازاقستاندىق اگرارلىق جانە ونەركاسىپتىك ونىمدەر ءۇشىن جاڭا وتكىزۋ نارىقتارىنا شىعۋ مۇمكىندىكتەرى مەن قولدانىستاعى سولتۇستىك-وڭتۇستىك باعىتتاعى كەدەرگىلەردى جويۋ.
سونداي-اق سەرىك جۇمانعارين ەكىجاقتى كەزدەسۋ بۇل قازاقستان مەن يران اراسىنداعى ءوزارا سىيلاستىق پەن سەنىمدى قارىم-قاتىناستىڭ ايعاعى ەكەنىن ايتتى.
يراننىڭ كولىك جانە قالانى دامىتۋ ءمينيسترى روستام قاسەميمەن كەزدەسۋ بارىسىندا سەرىك جۇمانعارين قازاقستاندىق تاراپتىڭ تاۋارلار كولەمىن جىلىنا 1 ملن توننادان 4 ملن تونناعا دەيىن ۇلعايتۋ نيەتىن ايتتى. ول ءۇشىن 2022 جىلدىڭ سوڭىنا دەيىن «تار» ينفراقۇرىلىمدىق ورىنداردى جويىپ, 2022-2025 جىلدارعا ارنالعان سولتۇستىك-وڭتۇستىك باعىتىنىڭ الەۋەتىن دامىتۋ بويىنشا ۇشجاقتى جول كارتاسىن قابىلداۋعا كەلىستى.
سونىمەن قاتار كەلىسىمنىڭ ىشىندە كەلەسىدەي تارماقتار بار:
– جۇك كولىگى جۇرگىزۋشىلەرى, حالىقارالىق تاسىمالدارعا قاتىسۋشىلار ءۇشىن ارنايى ۆيزالىق رەجيم قۇرۋ. بيزنەس وكىلدەرى ءۇشىن وسىنداي ۆيزالىق جەڭىلدىكتەر الۋ مۇمكىندىگىن قاراستىرۋ;
– بىرىڭعاي تاريف, بىرىڭعاي كولىك قۇجاتىن جانە بىرىڭعاي اقپاراتتىق جۇيەنى ەنگىزۋدى قوسا العاندا, ەكى ەلدىڭ كەدەندىك رەسىمدەۋ پروتسەستەرىن وڭتايلاندىرۋ;
– «قىرعىزستان - قازاقستان - رەسەي» ۇلگىسى بويىنشا ناۆيگاتسيالىق پلومبالاردى پايدالانا وتىرىپ, «قازاقستان - تۇرىكمەنستان - يران» باعىتى بويىنشا جۇكتەردى اۆتوكولىكپەن تاسىمالداۋ بويىنشا پيلوتتىق جوبانى ىسكە قوسۋ.
سونداي-اق لوگيستيكالىق پروتسەستەر مەن ەكىجاقتى ساۋدانىڭ تيىمدىلىگىن ارتتىرۋ ماقساتىندا تاراپتار بىرلەسكەن ەكسپورتتىق-يمپورتتىق كومپانيا قۇرۋ مۇمكىندىگىن پىسىقتاۋعا كەلىسكەن.
كەزدەسۋ ناتيجەسىندە تاراپتار ساۋدا, كولىك جانە لوگيستيكانى دامىتۋ سالاسىنداعى ءوزارا ءىس-قيمىل جونىندەگى ورتاق مەموراندۋمعا قول قويدى.
