قۇجاتتىڭ ماقساتى - سايلاۋ جۇيەسىن جەتىلدىرۋ, زاڭ شىعارۋ پروتسەستەرىن نورماتيۆتىك قۇقىقتىق رەتتەۋدى دامىتۋ, بيلىكتىڭ مەملەكەتتىك تارماقتارى اراسىنداعى تەجەۋ مەن تەپە-تەڭدىك جۇيەسىن كۇشەيتۋ, سالالىق زاڭداردىڭ ەرەجەلەرىن كونستيتۋتسيانىڭ نوۆەللالارىمەن كوررەلياتسيالاۋ.
بۇل رەتتە زاڭ جوباسىندا 15 كودەكسكە, 46 زاڭعا وزگەرىستەر مەن تولىقتىرۋلار ەنگىزىلەدى.
زاڭ جوباسىنىڭ نەگىزگى مىندەتتەرى:
- جەرگىلىكتى اتقارۋشى ورگاندارعا قاتىستى ەل پرەزيدەنتىنىڭ جەكەلەگەن وكىلەتتىكتەرىن جويۋ;
- قازاقستان حالقىنىڭ جەرگە مەنشىك قۇقىعىن زاڭنامالىق بەكىتۋ;
- ساياسي پارتيالاردىڭ قىزمەتىن دامىتۋدىڭ باسەكەلەستىك مۇمكىندىكتەرىن كەڭەيتۋ;
- قۇقىق قورعاۋ تەتىكتەرىن نىعايتۋ جانە تاۋەلسىزدىكتى كۇشەيتۋ;
- سايلاۋ پروتسەسىن جاڭعىرتۋ;
- زاڭ شىعارۋ راسىمدەرىندەگى ۇكىمەتتىڭ وكىلەتتىكتەرىن وزگەرتۋ.
بۇل رەتتە زاڭ جوباسىن ىسكە اسىرۋ مەملەكەتتىڭ دەموكراتيالىق ينستيتۋتتارىنىڭ سەرپىندى دامۋىن قامتاماسىز ەتۋگە جانە حالىقتىڭ مەملەكەتتىك ورگاندار مەن ساياسي قۇرىلىمدارعا دەگەن سەنىم دەڭگەيىن ارتتىرۋعا مۇمكىندىك بەرەدى دەپ كۇتىلۋدە.
سەنات دەپۋتاتتارى زاڭ جوباسىن قابىلداۋدى قولدادى. وسىلايشا, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ 2022 جىلعى 16 ناۋرىزداعى جولداۋىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭى قابىلداندى دەپ ەسەپتەلەدى جانە پرەزيدەنتكە قول قويۋعا جىبەرىلەدى.
