قىزىل كىتاپقا ەنگەن قۇس كوكتەمگە دەيىن پرەزيدەنتتىڭ ءىس باسقارماسىنا قاراستى «بۋراباي دامۋ» جشس باعىپ-قاعادى.
السىرەپ, ۇشا الماي قالعان قۇستى كوكشەتاۋ قالاسىنىڭ تۇرعىندارى كورىپ, جەرگىلىكتى پوليتسيانى شاقىرعان. پوليتسەيلەر تابيعات قورعاۋشى اىپتەستەرىنە حابارلاعان. ءسويتىپ, وقا جاعالىلار مەن اقمولا وبلىسىنىڭ ورمان شارۋاشىلىعى جانە جانۋارلار دۇنيەسى ينسپەكتسياسىنىڭ قىزمەتكەرلەرى اققۋدى بۋرابايداعى زوولوگيالىق باققا جەتكىزگەن.
– بالاپان اققۋدى ۆەتەريناريالىق تەكسەرۋدەن وتكىزىپ, قابىلداپ الدىق. قاتتى قورقىپ قالعانى بولماسا, زاقىمدانعان جەرى جوق. سۇيەگى ساۋ, بۇلشىقەتى ءبۇتىن. بيىل بىزدە قىستاپ شىقسا, كوكتەمدە ەركىنە جىبەرەمىز, – دەيدى ۆەتەرينار يلدار فايزۋلين.
ايتا كەتەيىك, «بۋراباي» مەملەكەتتىك ۇلتتىق پاركىندە قۇستىڭ 197 ءتۇرى بار, ولاردىڭ 14-ءى قىزىل كىتاپقا ەنگەن. سۇڭقىلداق اققۋ دا سيرەك كەزدەسەتىن قاناتتىلاردىڭ ءبىرى. بۇل - ماقتاداي اپپاق, تەك تۇمسىعىنىڭ ۇشى عانا سارعىلت بولىپ كەلەتىن ەرەكشە قۇس. بۋرابايداعى زووباققا اكەلىنگەن اققۋ ەسەيمەگەندىكتەن, قانات-قاۋىرىسىندارى ءالى تولىق اعارا قويماعان.
