تيمۋر رۇستەموۆ وبلىس ورتالىعىنىڭ ىرگەسىندەگى ميچۋرين اۋىلىندا تۇرادى. جاسى 13-تەن اسقان ول ەشكى شارۋاشىلىعىن قۇرىپ, ساۋىلعان ءسۇتتى وڭدەۋمەن اينالىسادى. كۇنىنە 12-15 ليتر ەشكى ءسۇتىن ساۋىپ, ودان ىرىمشىك پەن يوگۋرت, سۇزبە ازىرلەپ ساتادى. بۇگىندە جاس فەرمەردىڭ ءونىمىن ساتىپ الۋشىلار كوبەيىپ كەلەدى. كىشكەنە كەزىنەن ءۇي جانۋارلارىنا ۇيىرسەك ەكەنىن بايقاعان اكەسى جاسۇلان بالاسىن مال شارۋاشىلىعىنا باۋلۋ كەرەك ەكەنىن ەرتە تۇسىنگەنىن جەتكىزدى.
– وسىدان ءتورت جىل بۇرىن بولۋى كەرەك, اكەم تيمۋرعا ق ۇلىن سىيلادى. بالام ونىڭ اينالاسىنان شىقپاي قويدى. كەيىن ميچۋريندە «جاس تۇلپار» اتتى كەمپينگ قۇرىپ, كەلۋشىلەرگە جىلقىعا ءمىنىپ سەرۋەندەۋ قىزمەتىن ۇسىنا باستادىم. بايقايمىن, بۇل كاسىپتى كورگەن تيمۋر دە ىزدەنىپ, ءوز الدىنا ءبىر ءىس باستاماققا ارەكەتتەنىپ ءجۇر. ءبىر كۇنى سيىر ءوسىرۋدىڭ شىعىنىن, ونىڭ سۇتىنەن تۇسەتىن تابىستى ەسەپتەپ وتىر. زەڭگى بابا تۇقىمىن ۇستاۋ, ونى جەم-شوپپەن قامتاماسىز ەتۋ اسا قىمباتقا تۇسەتىنىن ءتۇسىندىردىم. ءارى مالدىڭ دا مالى بولادى. ونى جايلايمىن دەپ ءجۇرىپ وقىستان جاس بالاعا تۇياعى ءتيىپ كەتە مە دەپ جۇرەكسىندىم. سوندىقتان ەشكىدەن باستا دەگەن ۇسىنىس ايتتىم. ءارى ەشكى – ءوسىمتال. وزگە ت ۇلىككە قاراعاندا تەز كوبەيىپ, كەز كەلگەن جاعدايعا بەيىمدەلىپ كەتەدى. ازىقتى دا كوپ تالعاي بەرمەيدى. جوڭىشقا, س ۇلى, ارپا, ءتۇرلى ءشوپ قوسپاسىن جانە ءسابىز بەن قىزىلشا بەرسەڭ جەتكىلىكتى. ونىڭ ۇستىنە ەشكى ءسۇتىنىڭ مايلىلىعى 4,6-9 پايىزدى قۇرايدى. قۇرامى جاعىنان انا سۇتىنە جاقىن, اسقازان اۋرۋلارىنا, اللەرگياعا تاپتىرماس ەم ەكەنىن ايتتىم. ۇلىم ۇسىنىسىمدى بىردەن قابىلدادى, – دەيدى وتاعاسى جاسۇلان رۇستەموۆ.
تيمۋر عالامتوردان ەشكى باعۋدىڭ قىر-سىرىن, ودان ءسۇت ساۋىپ, وڭدەۋ جولدارىن ۇيرەنىپ الدى. ەشكىنىڭ «زاانەن» تۇقىمى ءسۇتتى ءارى تەز كوبەيگىش كەلەدى. تاڭداۋ سوعان ءتۇستى. ءسويتىپ, اكەسى مەن ۇلى العاشىندا ءتورت باس ەشكى مەن ءبىر تەكەنى پەتروپاۆل قالاسىنان ساتىپ اكەلەدى. بيىل كوكتەمدە وعان قوراجاي تۇرعىزىپ, ەشكى ساۋاتىن ورىن ازىرلەيدى. زاانەن ەشكىلەرىنىڭ باعاسى قىمباتتاۋ بولادى. ونىڭ ەرەكشەلىگى سۇتىندە. ءبىر ەشكى ءۇش-ءتورت ليتر ءسۇت بەرەدى. سونىمەن قاتار ەگىزدەپ تولدەيدى. جالپى, ەشكى ءسۇتى جۇرەكتىڭ جۇمىسىنا جاقسى اسەر ەتەدى دەيدى ماماندار. ۆ2 جانە ۆ12 دارۋمەندەرىنە, امينقىشقىلدارعا باي, بۇيرەك پەن باۋىردىڭ جۇمىسىن رەتتەپ, حولەستەريننىڭ دەڭگەيىن تۇسىرەدى. سيىر مەن ەشكى سۇتىنەن جاسالعان ونىمدەر قۇرامى جاعىنان ۇقساس بولعانىمەن, ەشكى سۇتىنەن دايىندالعان تاعامدار جىلدام ءارى تولىق قورىتىلادى. اعزانى اقۋىزبەن بايىتادى, سول سەبەپتى ەمشەكتەگى سابيلەرگە جانە قاتتى اۋىرعان سىرقاتتارعا بەرەدى. ەشكىنىڭ ەتى دە جەڭىل.
اۋەل باستا بيزنەس يدەياسىن ويلاستىرعاندا جاس فەرمەر زاانەن ەشكىلەرى بەرەتىن ءسۇتتىڭ ءيىسسىز كەلەتىنىن ءارى ودان ىرىمشىك جاساۋعا بولاتىنىن نەگىزگە الىپتى. ياعني ءسۇتتى جاس بالالارعا دا بەرۋگە بولادى. قازاقستاندا دامي قويماعان ەشكى شارۋاشىلىعىن كەرەكۋ جەرىندە وركەندەتسەم دەگەن بالا ارمانى بۇگىندە اقيقاتقا اينالىپ ۇلگەردى. قازىر تيمۋردىڭ شارۋاشىلىعىندا 7 ەشكى بار.
«جانۋارلارعا ەرەكشە كۇتىم كەرەك. ولارعا ءتۇرلى اۋرۋلاردىڭ الدىن الاتىن ەكپە جاساتىپ, دارۋمەندەر بەرەمىن. ەركەلەتكەندى جاقسى كورەدى. ۇنەمى سىلاپ-سيپاپ جۇرسەڭ, ءسۇتتى دە جاقسى بەرەدى ەكەن. تاڭەرتەڭ ەرتە تۇرىپ, اۋەلى ولاردىڭ الدىنا جەم-ءشوبىن جەتكىزەمىن. ال ساباقتان كەلگەن سوڭ ساۋىلعان سۇتتەن ىرىمشىك پەن جۇمساق سۇزبە دايىندايمىن. ينستاگرامدا پاراقشا اشقانمىن, ادامدار سول جەردەن تاپسىرىس بەرىپ جاتادى. ونلاين-تاپسىرىستاردى ۋاقتىلى ورىنداۋعا تىرىسامىن», دەيدى جاس كاسىپكەر.
جۋىقتا تيمۋر مەن ونىڭ اكەسى قايتارىمسىز گرانتتار كونكۋرسىنا قاتىسىپ, جەڭىمپاز اتاندى. 5 ملن تەڭگەگە جۋىق قاراجاتتى جەڭىپ العان اكەلى-بالالى فەرمەرلەر قاراجاتتى كونتەينەرلى مودۋل ساتىپ الۋعا جۇمساماق. مودۋلدە ەشكى ءسۇتىن تولىق وڭدەۋ پروتسەسى, ياعني سۇزگىدەن وتكىزۋ, پاستەرلەۋ, ىرىمشىك پەن سۇزبە, يوگۋرت ءوندىرىسى قاراستىرىلعان. كەلەسى جىلى فەرماداعى ەشكى سانى 50-گە دەيىن كوبەيتىلىپ, تيمۋر ازىرلەيتىن ونىمدەر كادىمگىدەي برەندتىك قاپتاماعا سالىنىپ ساتىلا باستاماق.
تيمۋر – وتباسىنداعى ەكى بالانىڭ ۇلكەنى. ءوز كاسىبىنە مۇقيات قاراپ وتىرعان ءجاسوسپىرىم قازىر پاۆلودارداعى №16 مەكتەپ-ليتسەيىندە 7-سىنىپتا ءبىلىم الىپ ءجۇر. اكەسى جاسۇلاننىڭ ويىنشا, جاس ۇرپاقتىڭ بارلىعى IT-ماماندىقتى نەمەسە اقپاراتتىق سالاعا قاجەت كاسىپتى تاڭداۋى مىندەتتى ەمەس. اۋىل شارۋاشىلىعىنا دا بولاشاق كادرلار قاجەت. «سوندىقتان ۇلىمدى بۇل باعىتقا قازىردەن باۋلىپ ءجۇرمىن», دەدى وتاعاسى.
پاۆلودار وبلىسى,
پاۆلودار اۋدانى,
ميچۋرين اۋىلى
