ەلىمىزدىڭ بارلىق قيىرىن قامتىعان بايقاۋدان جامبىلدىق بالدىرعاندار دا تىس قالعان جوق. وبلىستىق ءبىلىم باسقارماسىنا قاراستى «جامبىل دارىنى» ايماقتىق عىلىمي-پراكتيكالىق ورتالىعىنىڭ باستاماسىمەن قولعا الىنعان ءىس-شارا تاراز قالاسىنداعى №13 ورتا مەكتەپتىڭ بازاسىندا ءوتتى. وعان تاراز قالاسىنداعى ورتا ءبىلىم بەرەتىن مەكتەپتەردىڭ 50 وقۋشىسى قاتىسىپ, وزدەرىنىڭ ىزدەنىس ىزىنە تۇسكەندەرىن بايقاتتى.
جالپى العاندا, 3-10 سىنىپ وقۋشىلارىن قامتىعان بايقاۋدا ءبىلىم الۋشىلار جاس ەرەكشەلىكتەرىنە قاراي باق سىنادى. ولار «ادەبيەت» پورتالى ينتەرنەت جوباسىندا جاريالانعان قازاقستاندىق جانە شەتەلدىك ادەبي كىتاپتاردى سىلتەمەلەر ارقىلى وقىدى, جاڭا تۇرپاتتاعى ادەبيەتتى كوڭىلدەرىنە توقىدى. وزدەرى وقىعان كىتاپتار بويىنشا ۇستازدار تاراپىنان بەرىلگەن تاپسىرمالاردى تاس-ءتۇيىن ورىنداعان ۇزدىك وقۋشىلار جۇلدەلى ورىندارعا يە بولدى.
كوركەم ادەبيەتكە دەن قويعان 27 بالا جۇلدەگەرلەر قاتارىنان كورىندى. اتاپ ايتار بولساق, 4 وقۋشى قاتارىنان وزا شاۋىپ, جەڭىمپاز اتانسا, 8 وقۋشى ەكىنشى ورىنعا, 15 وقۋشى ءۇشىنشى ورىنعا لايىق دەپ تانىلدى.
«كوركەم ادەبيەت قاي كەزدە دە ءبىزدى قاناتتاندىرادى. ءاربىر شىعارماداعى كەيىپكەرلەردىڭ مىنەز-قۇلقى, قالامگەرلەردىڭ جازۋ شەبەرلىگى, تاقىرىپتىڭ وزەكتىلىگى ءبىزدىڭ زامانداستاردى ويلاندىرماي قويمايدى. بارلىق ءبىلىم اتاۋلى كىتاپتا ەكەنىن جاقسى تۇسىنەمىز. ءبىلىم ىزدەگەننىڭ وزاتىنىن, ب ۇلىك ىزدەگەننىڭ توزاتىنىن سەزىنەمىز. سوندىقتان دا وسىنداي بايقاۋلار ءجيى ۇيىمداستىرىلىپ تۇرسا ودان ەشكىم ۇتىلمايدى», دەيدى بايقاۋدا جۇلدە العان ۇزدىك وقۋشىلار جۇزدەرى بال-بۇل جانىپ.
جامبىل وبلىسى
