ەلىمىزدە شاعىن جانە ورتا بيزنەستى دامىتۋ كەرەك دەپ ۇرانداتا ايتىلادى. ءتىپتى بۇل سالاداعى كاسىپورىن سانى دا كوبەيىپ جاتىر. بىراق سان كوبەيگەننەن ساپا ارتىپ كەتكەن جوق. شوب-تىڭ اياعىنا وراتىلىپ جاتقان كەدەرگى كوپ. 2022 جىلى تامىزدىڭ سوڭىنداعى دەرەك بويىنشا 178,7 مىڭ شاعىن بەلسەندى كاسىپورىن بار. بىلتىرعى كورسەتكىشتەن 9,7 پايىزعا كوپ. ال جەكە كاسىپكەرلىكتى تىركەگەندەر سانى 24,8 پايىزعا ارتىپ, 1 ملن-نان اسقان. بىراق ىشكى جالپى ونىمدەگى شاعىن كاسىپكەرلىك ۇلەسى 26,8 پايىزدى, شاعىن جانە ورتا بيزنەس ۇلەسى 33,5 پايىزدى قۇرايدى.
Ranking مالىمەتى بويىنشا, كورشى وزبەكستاندا شوب-تىڭ ىشكى جالپى ونىمدەگى ۇلەسى 50 پايىزدان اسادى. دامىعان ەلدەردە ءتىپتى 50 مەن 60-تىڭ ار جاعىندا. ارينە, ولارمەن سالىستىرار بولساق, ءبىزدىڭ جاعداي ونشا ەمەس. ءارى وسى 30 پايىزدىڭ اينالاسىندا ۇيەلەپ قالعانىمىزعا دا ءبىراز جىل بولدى.
«شاعىن جانە ورتا بيزنەستىڭ دامۋىن تەجەپ تۇرعان ماڭىزدى فاكتور – جەتكىلىكتى دەڭگەيدە قارجىلاندىرۋدىڭ بولماۋى. مىسالى, بانكتەر نەگىزىنەن ءىرى مەگاپوليستەردەگى شاعىن بيزنەستەرگە نەسيە بەرەدى. الماتى مەن استانانىڭ جالپى ۇلەسى 68 پايىزدى قۇرايدى. سايكەسىنشە, وزگە قالالارداعى وركەن جايعىسى كەلەتىن شاعىن جانە ورتا كاسىپكەرلىك سۋبەكتىلەرىنىڭ بانك زايمىنا قولى جەتە بەرمەيدى. ال الىس ەلدى مەكەندەردە تىرشىلىك ەتىپ جاتقان بيزنەستىڭ احۋالى ءتىپتى قيىن», دەپ ءمالىم ەتەدى Ranking.
مۇندايدا ميكروقارجى ۇيىمدارى الدىڭعى قاتارعا شىعادى. بانك مۇرنىن شۇيىرگەن كەڭىستىككە مقۇ-نىڭ مەيىرىمى تۇسسە, كانەكەي. سەكتورداعى ليدەر سانالاتىن KMF-ءتىڭ بۇكىل وڭىردە, ونىڭ ىشىندە الىس اۋدانداردا 114 بولىمشەسى بار ەكەن. بۇل مقۇ-نىڭ كليەنت بازاسىنىڭ 68 پايىزىن اۋىل تۇرعىندارى الىپ وتىر. سونداي-اق KMF قارىز پورتفەلىنىڭ تولىمدىلىعى بويىنشا دا ليدەر: 191,3 ملرد تەڭگە. كومپانيا شوب سۋبەكتىلەرى مەن ميكروكاسىپكەرلەرگە – ميكروقارجىلاندىرۋدى, تۇتىنۋشىلىق جانە توپتىق ميكروكرەديتتەۋدى, اۆتوكرەديتتەۋدى جانە ەقدب-نىڭ GEFF «جاسىل» ەكونوميكانى قارجىلاندىرۋ باعدارلاماسى شەڭبەرىندە «جاسىل» قارجىلاندىرۋدى ۇسىنادى. ول ميكروكرەديت سوماسىنىڭ 10 پايىزىنا دەيىن كەشبەك الۋ مۇمكىندىگىمەن ءتيىمدى جانە ەنەرگيا ۇنەمدەيتىن جابدىقتاردى ساتىپ الۋعا باعىتتالعان. ەنەرگيانى ۇنەمدەيتىن تەحنولوگيانىڭ كومەگىمەن تۇرعىن ءۇيدى نەمەسە بيزنەستى جاڭارتۋعا بولادى. ەكىنشى ورىندا – قارىز پورتفەلىنىڭ سوماسى 124,5 ملرد تەڭگەنى قۇرايتىن MyCar Finance. ءۇشىنشى ورىندا «تويوتا فاينانشل سەرۆيسەز كازاحستان» (123,1 ملرد تەڭگە). سوڭعى ەكى كومپانيانىڭ تىكەلەي اۆتونەسيەلەۋ سەگمەنتىندە بەلسەندى جۇمىس ىستەيتىنىن ايتا كەتكەن ابزال.
ۇلتتىق ەكونوميكا ءمينيسترى الىبەك قۋانتىروۆ ۇسىنعان دەرەك بويىنشا 2012 جىلدان بەرى شوب شىعاراتىن ءونىم كولەمى 42,8 ترلن تەڭگەگە جەتكەن. ءىجو 82,2 ترلن تەڭگەنى قۇراپ, جۇمىس ىستەپ تۇرعان شوب-تىڭ جالپى سانى 1,4 ملن سۋبەكتىگە جەتكەن. شوب-تا جۇمىسپەن قامتىلعانداردىڭ جالپى سانى – 3,5 ملن. ال سەكتوردى نەسيەلەۋ سوماسى 5,7 ترلن تەڭگەدەن استى.
«سوڭعى 10 جىلدا مەملەكەتتىك قولداۋ شارالارىن الۋشىلاردىڭ ءونىم شىعارۋ كولەمى 53 ترلن تەڭگەنى قۇرادى. كاسىپكەرلىكتى دامىتۋ جونىندەگى ۇلتتىق جوبا شەڭبەرىندە مەملەكەتتىك قولداۋ شارالارىن الۋشىلار شامامەن 118 مىڭ ادامدى جۇمىسپەن قامتىدى», دەيدى ءا.قۋانتىروۆ.
جالپى, ۇلتتىق جوبا اياسىندا كرەديتتەر بويىنشا سۋبسيديالاۋ جانە كەپىلدىك بەرۋ; جاڭا بيزنەس-يدەيالاردى ىسكە اسىرۋ ءۇشىن گرانتتار بەرۋ; قاجەتتى ينفراقۇرىلىممەن قامتاماسىز ەتۋ; شوب ءۇشىن اقپاراتتىق-كونسۋلتاتسيالىق قىزمەتتەر كورسەتۋ جوسپارلانىپ وتىر.
