جالاۋلى جارىستار

ۆەلوسپورت. كەشە «سارىارقا» ۆەلو­ترەگىندە ترەكتەگى جا­رىستاردىڭ سوڭعى كۇنى ءوتتى. ال بۇگىن ازيا چەم­پيونا­تىن­دا تاس جولداعى جا­رىستار باستالادى. فۋتبول. دەمالىس كۇندەرى قازاق­ستان چەم­پيوناتى پرەمەر-ليگاسىنىڭ 13-تۋرى ءوتتى. بۇل تۋردا قىزىلوردانىڭ «قاي­سار» كومانداسى ماڭىزدى جەڭىسكە جەتتى. ولار ءوز الاڭىندا «استانانى» 1:0 ەسەبىمەن ۇتىپ, ەكىن­شى ورىنعا شىقتى. ال ءۇش تۋردان بەرى جەڭىلىستىڭ ءدامىن كورمەي كەل­گەن الماتىنىڭ «قايراتى» شىم­­­­كەنتتە «ورداباسىدان» ۇتىل­دى. كەز­دەسۋدىڭ 84-مينۋتىندا مي­­حايل باكاەۆ ءوز قاقپاسىنا گول سو­عىپ الدى. «اتىراۋ» ءوز الاڭىندا «ەر­تىس­تەن» جەڭىلدى. بۇل ويىندا كونستانتين دۋدچەنكو جال­عىز دوپ­تىڭ اۆتورى اتاندى. قارا­عان­دىدا «شاحتەر» «تارازدى» ۇتتى. بۇل ماتچتا دا جالعىز گول سوعىلدى. «اقتوبە» ويىنشىلارى سىرت الاڭدا سەمەيدىڭ «سپارتاگىن» 1:0 ەسە­بىمەن جەڭدى. ال «جەتىسۋ» ءوز الا­­ڭىندا «توبىلدان» 1:2 ەسەبىمەن ۇتىلىپ قال­دى. تەننيس. قازاقستاندىق تەننيس­شى زارينا دياس ستراسبۋرگتە ءوتىپ جاتقان Tennis Internationaux de Strasbourg ءتۋرنيرىنىڭ شيرەك فينالىنا شىقتى. بىراق, ول اقتىق سىن كەزدەسۋى ۇستىندە ويىننان باس تارتتى. ونىڭ سەبەبى بىزگە ازىرگە بەلگىسىز. زارينا ەكىنشى اينالىمدا 21 جاستاعى حورۆات ايلي ءتومليانوۆيچتى ۇتقان بولاتىن. بۇل ماتچ ەكى سەتكە سوزىلىپ, 6:4, 7:6 ەسەبىمەن زاري­نانىڭ پايداسىنا شەشىلدى. ەندى دياس شيرەك فينالدا امەريكالىق كريستينا ماكحەيلمەن كەزدەسەدى. تۋرنيردە قازاق تەننيس­شىسى ءبىرىنشى اينالىمدا الەمنىڭ 22-راكەتكاسى 28 جاسار بەلگيالىق كريستەن فليپكەنستى 2 ساعات 2 مينۋتقا سوزىلعان تارتىستى كەزدەسۋدە 6:2, 6:7, 6:3 ەسەبىمەن ۇتقان ەدى. بوكس. جاقىندا استانادا قا­زاقستان بوكس فەدە­را­تسياسىنىڭ كۋبوگى جولىنداعى ءتۋرنيردىڭ شيرەك فينالدىق كەزدەسۋلەرىنىڭ جەرەبەسى تارتىلدى. جەرەبە بويىنشا «ا» توبىن ماڭعىستاۋ, شىعىس قازاقستان, پاۆلودار وبلىستارى مەن الماتى قالاسى قۇراسا, «ۆ» توبىندا استانا قالاسى, جامبىل, اقتوبە, باتىس قازاقستان وبلىستارى وينايتىن بولدى «س» توبىنا وڭتۇستىك قازاقستان, اقمولا, قوستاناي مەن قىزىلوردا وبلىستارى ءتۇستى. «D» توبىندا قارا­عاندى, الماتى, اتىراۋ جانە سول­تۇستىك قازاقستان وبلىستارى كۇش سىناسادى. وسى شارادا جارتىلاي فينالدىق جەكپە-جەكتەردە قاي توپتىڭ كوماندالارى كەزدەسەتىنى دە بەلگىلى بولدى. ءسويتىپ, جەرەبە بويىنشا «ا» جانە «س», «B» جانە «D» توپتارىندا ءبىرىنشى ورىن العان كوماندالار كۇش سىناساتىنى انىقتالدى. شيرەك فينالدا «ا» توبى­نىڭ كەز­­دە­سۋلەرى الماتىدا, «س» توبىنىڭ جەكپە-جەكتەرى كوك­شەتاۋدا 1-3 تامىز كۇندەرى وتەدى. «ۆ» توبىنىڭ ايقاستارى اقتو­بە­دە, «D» توبىنىڭ جارىستارى قا­راعاندىدا 8-10 تامىز كۇندەرى جالا­ۋىن كوتەرەدى. جار­تىلاي فينال مەن فينال قا­­­لىپ­تاسقان ءداستۇر بويىنشا استانادا 14-15 جەلتوقسان كۇندەرى وتەدى. داستان كەنجالين, «ەگەمەن قازاقستان».