كەنشىلەر قالاسىندا «نۇرلى جەر» تۇرعىن ءۇي-كوممۋنالدىق دامۋ باعدارلاماسى جانە 2025 جىلعا دەيىنگى قالانىڭ كەشەندى دامۋ جوسپارى اياسىندا باسپانا قۇرىلىسى قارقىندى ءجۇرىپ جاتىر. سونىڭ ءبىر ايعاعى – ۇلتتىق مەرەكەگە وراي يگىلىككە بەرىلگەن تۇرعىن ءۇي. بيىل 21-شاعىن اۋداندا 180 پاتەرلى ەكى تۇرعىن ءۇي تاپسىرىلىپ, 144 پاتەرلى ەكى ءۇيدىڭ قۇرىلىسى جالعاسۋدا. 108 وتباسىعا بۇيىرعان جاڭا پاتەرلەردىڭ كىلتىن وبلىس اكىمى ابىلقايىر سقاقوۆ ءوزى تابىس ەتتى. قۋانىشقا كەنەلگەندەر قاتارىندا كوپبالالى انالار, جەتىمدەر, الەۋمەتتىك جاعىنان از قامتىلعاندار بار.
«ەكىباستۇزدىڭ كەشەندى دامۋ باعدارلاماسى, ونىڭ ىشىندە تۇرعىن ءۇي قۇرىلىسى جالعاسىن تابادى. كەيىنگى ءۇش جىلدا ەكىباستۇزدا 16 كوپقاباتتى ءۇي سالىندى, ءتىپتى ءبۇتىن ءبىر شاعىن اۋدان بوي كوتەردى», دەپ اتاپ ءوتتى ايماق باسشىسى.
باسپانالى بولعانداردىڭ ءبىرى – كوپبالالى انا ايدانا مۇحامەديانوۆا. ءتورت بالانى جالعىز اسىراپ وتىرعان وعان وبلىس اكىمى تۇرمىستىق تەحنيكا ساتىپ الۋعا سەرتيفيكات تابىس ەتتى. «تاريحي مەرەكەدە بۇل ءبىز ءۇشىن ايتۋلى كۇن بولدى. پرەزيدەنت پەن وبلىس باسشىلىعىنىڭ قولداۋىمەن جۇزدەگەن وتباسى باسپانالى بولدى. قۋانىشىمىزدى سوزبەن ايتىپ جەتكىزۋ مۇمكىن ەمەس», دەيدى كوپبالالى انا.
ايتپاقشى, ەكىباستۇزدا رەسپۋبليكا كۇنىنە وراي جىلدار بويى ىستەمەگەن بالاباقشا دا ىسكە قوسىلدى. 15 جىل بويى قاڭىراپ بوس تۇرعان عيمارات 2 مەن 5 جاس ارالىعىنداعى بالالارعا لايىقتالعان. عيمارات ءىشى تولىعىمەن جاڭارتىلىپ, زاماناۋي قۇرال-جابدىقتارمەن, جيھازبەن قامتىلعان. جاڭارتۋ جۇمىستارىنا جالپى سوماسى 719,5 ملن تەڭگە جۇمسالىپتى. ەكى قاباتتى عيماراتتا 12 جاتىن بولمە, مەديتسينالىق جانە ازىق-ت ۇلىك بلوكتارى, كىر جۋ بولمەسى, مۋزىكالىق زال, پسيحولوگ جانە لوگوپەد كابينەتتەرى, جىلىتىلاتىن باسسەين بار.
قالالىق ءبىلىم بەرۋ ءبولىمىنىڭ مالىمەتىنە سۇيەنسەك, بۇگىندە شاھاردا 1 مەن 3 جاس ارالىعىنداعى 2 مىڭ بالا بالاباقشا كەزەگىندە تۇر. 3 پەن 6 جاس ارالىعىنداعى بالالار تولىقتاي مەكتەپالدى بىلىممەن قامتىلعان.
پاۆلودار وبلىسى,
ەكىباستۇز قالاسى
