«بۇگىن تمد باقىلاۋشىلارىنىڭ ميسسياسى سايلاۋ ناۋقانىنا مونيتورينگ جۇرگىزۋگە كىرىستى. سونداي-اق بۇگىن ۇيىمداستىرۋشىلىق ماسەلەلەردى شەشۋمەن اينالىساتىن ميسسيا شتابى قۇرىلادى. شتاب وڭىرلەر بويىنشا قىسقا مەرزىمدى, ۇزاق مەرزىمدى باقىلاۋشىلاردى ءبولىپ, قازاقستاننىڭ سايلاۋ زاڭناماسىن باعالاۋ ماسەلەلەرىمەن اينالىسادى. ميسسيانى تمد اتقارۋ كوميتەتىنىڭ توراعاسى سەرگەي لەبەدەۆ باسقارادى. ماعان ميسسيامىزدىڭ اشىلۋىنا قاتىسۋ تاپسىرىلدى. ميسسيا قۇرامىنا بارلىق تمد ەلدەرىنىڭ وكىلدەرى, تمد پارلامەنتارالىق اسسامبلەياسىنىڭ, وداقتاس رەسەي-بەلارۋس مەملەكەتىنىڭ پارلامەنتتىك اسسامبلەياسىنىڭ وكىلدەرى, استانادا اككرەديتتەلگەن ديپلوماتتار جانە تمد اتقارۋ كوميتەتىنىڭ قىزمەتكەرلەرى كىرەدى», دەدى وسك بريفينگىندە تمد اتقارۋ كوميتەتى باسشىسىنىڭ ورىنباسارى يلحوم نەماتوۆ.
سپيكەردىڭ ايتۋىنشا, ەلدەگى سايلاۋعا جۇزدەن استام ادام كەلەدى. 10 ادام ۇزاق مەرزىمدى باقىلاۋشىلار جانە 100-دەن استام قىسقا مەرزىمدى باقىلاۋشىلار. ۇزاق مەرزىمدى باقىلاۋشىلار ەلگە كەلىپ, اككرەديتاتسيادان ءوتتى. قىسقا مەرزىمدى باقىلاۋشىلار قازاقستانعا سايلاۋ باستالاردان ەكى-ءۇش كۇن بۇرىن كەلەدى.
يلحوم نەماتوۆ ميسسيا بارلىق ايماقتار مەن سايلاۋ ۋچاسكەلەرىن قامتۋعا تىرىسادى دەپ مالىمدەدى. باقىلاۋشىلار ۋچاسكەلەرگە, اۋماقتىق سايلاۋ كوميسسيالارىنا بارىپ, سايلاۋ ناۋقانىنا دايىندىق بارىسىن تالقىلايدى.
«بۇگىن ورتالىق سايلاۋ كوميسسياسىنىڭ توراعاسى نۇرلان ابدىروۆپەن كەزدەسۋ ءوتتى. ول سايلاۋ ناۋقانىنا دايىندىق بارىسى تۋرالى ەگجەي-تەگجەيلى حاباردار ەتتى. سايلاۋشىلاردىڭ ەركىن داۋىس بەرۋىنە بارلىق قولايلى جاعداي جاسالىپ جاتىر», دەپ تولىقتىردى ي. نەماتوۆ.
