دەپارتامەنت باستىعىنىڭ اتىنان بارلىعى 73 اناعا «ۇزدىك وفيتسەردىڭ اناسى» مەدالى تاعايىندالسا, 10 پوليتسەيدىڭ اناسىنا گەنەرال قايرات دالبەكوۆ ماراپاتتى ءوز قولىمەن تاپسىردى. وسىنداي ماراپاتقا يە بولعانداردىڭ ءبىرى – №4 بالالار ءۇيىنىڭ ديرەكتورى نۇرساۋلە تاستىباەۆا. ونىڭ قامقورلىعىنداعى 3 تاربيەلەنۋشى – ءىىم قاراعاندى جوعارى مەكتەبىنىڭ كۋرسانتى.
سونداي-اق پوليتسيا لەيتەنانتى اقجان التىنبەك, پوليتسيا اعا لەيتەنانتى ەرلان جانىسباەۆ, پوليتسيا كاپيتاندارى باتىيحان پەرنەباي مەن ەلامان ابدۋاليەۆ ەسىمدى باتىر پوليتسەيلەردىڭ, الەمدىك پوليتسيا ويىندارىنىڭ بىرنەشە دۇركىن چەمپيوندارى پوليتسيا مايورى عالىمجان كاتباەۆ پەن پوليتسيا كاپيتانى دامير تاشانوۆ سىندى سپورتشى-پوليتسەيلەردىڭ انالارىنا ارنايى مەدال تابىستالدى.
«اراعا 13 جىل ۋاقىت سالىپ سىزدەرمەن بىرگە رەسپۋبليكا كۇنىن اتاپ ءوتۋ باقىتى بۇيىرىپتى. وسى ءساتتى پايدالانا وتىرىپ, شىمكەنت قالاسى پوليتسيا دەپارتامەنتىنىڭ قالىپتاسىپ, دامۋىنا زور ۇلەس قوسقان اڭىز ادام, ميليتسيا گەنەرال-مايورى قۇلاحمەت قالمەنوۆتىڭ ەڭبەگى جايىندا ايتا كەتكەن ءجون. ول ەڭ قيىن شاقتاردا وڭتۇستىكتەگى پوليتسيا سالاسىنا 12 جىل تاباندىلىقپەن باسشىلىق ەتتى. قازىرگى تاڭدا قاتارىمىزدا اتالعان نار تۇلعانىڭ ىزىمەن كەلە جاتقان قىراعى ساقشىلارىمىز جەتەرلىك. ءبىز ولارمەن ارقاشان ماقتانامىز. سونىمەن قاتار ءبىزدىڭ جۇمىسىمىزداعى ءاربىر جەتىستىكتىڭ ارتىندا دەپارتامەنتتىڭ جەكە قۇرام قىزمەتكەرلەرىنىڭ ۇلكەن ەڭبەگى جاتقانىن اتاپ وتكىم كەلەدى. بارشاڭىزعا جانقيارلىق ەڭبەكتەرىڭىز ءۇشىن العىس ايتا وتىرىپ, باق-بەرەكە, دەنساۋلىق, قاجىرلى قىزمەتتە بيىك جەڭىستەر تىلەيمىن!», دەدى دەپارتامەنت باستىعى, پوليتسيا گەنەرال-مايورى قايرات دالبەكوۆ.
سونداي-اق رەسپۋبليكا كۇنىنىڭ قۇرمەتىنە قىزمەتتىك مىندەتتەرىن ادال اتقارىپ, جۇمىستا جوعارى ناتيجەلەرگە قول جەتكىزگەنى ءۇشىن 60-تان اسا پوليتسيا قىزمەتكەرى العىسقا بولەندى. ىشكى ىستەر ءمينيسترى مارات احمەتجانوۆتىڭ بۇيرىعىمەن پوليتسيا دەپارتامەنتىنىڭ 15 قىزمەتكەرى ماراپاتتالدى. ونىڭ ىشىندە پوليتسيا پودپولكوۆنيگى ماكسيم سيدوروۆتىڭ شەنى ءبىر ساتى جوعارىلادى.
ايتا كەتۋ كەرەك, بيىل ەل پرەزيدەنتى قاسىم جومارت توقاەۆ ۇلتتىق قۇرىلتايدىڭ ءبىرىنشى وتىرىسىندا رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىنعان ەدى. وسىعان وراي ەلدىگىمىز بەن ەگەمەندىگىمىزدى بىلدىرەتىن ايتۋلى كۇن پارلامەنتتە بەكىتىلدى.
مەرەكەلىك ءىس-شارا سوڭىندا ەسترادا انشىلەرىنىڭ قاتىسۋىمەن دۋماندى كونتسەرت ۇيىمداستىرىلدى.
شىمكەنت
