ءىس-شارانىڭ قوناقتارى اراسىندا قىرعىز رەسپۋبليكاسىنىڭ مەملەكەتتىك قۇرىلىمدارىنىڭ باسشىلارى, بىشكەكتە تىركەلگەن شەتەلدىك ەلشىلىكتەر مەن حالىقارالىق ۇيىمداردىڭ باسشىلارى, قوعام قايراتكەرلەرى, بيزنەس, عىلىمي جانە شىعارماشىلىق زيالى قاۋىم, باق وكىلدەرى, سونداي-اق قازاقستاندىق دياسپورا قاتىستى.
قابىلداۋدا ءسوز العان قازاقستاننىڭ قىرعىزستانداعى ەلشىسى ءراپىل جوشىباەۆ قازاقستاننىڭ تاۋەلسىزدىك جىلدارىنداعى باستى جەتىستىكتەرىنە توقتالدى. ەلىمىزدىڭ ىشكى جالپى ءونىمى وسى جىلدار ىشىندە 18 ەسە وسكەنى, تىكەلەي شەتەلدىك ينۆەستيتسيا كولەمى 350 ميلليارد اقش دوللارىنان استامعا جەتكەنى ايتىلدى. ەلىمىزدىڭ ەۋرازيالىق ەكونوميكالىق وداق, ۇجىمدىق قاۋىپسىزدىك شارتى ۇيىمى, شانحاي ىنتىماقتاستىق ۇيىمى, تۇركى مەملەكەتتەرى ۇيىمى, ازياداعى ءوزارا ءىس-قيمىل جانە سەنىم شارالارى كەڭەسى سياقتى ۇيىمداردى قۇرۋداعى شەشۋشى ءرولى ەرەكشە اتاپ ءوتىلدى.
ءوزىنىڭ قۇتتىقتاۋ سوزىندە قىرعىز رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى ن.نيازاليەۆ قازاقستان رەسپۋبليكاسىنىڭ الەۋمەتتىك-ەكونوميكالىق دامۋداعى, كەلىسىمدى قوعام مەن تۇراقتىلىقتى قالىپتاستىرۋداعى, ونىڭ حالىقارالىق ارەناداعى ورنى مەن بەدەلىن نىعايتۋداعى تاڭعالارلىق تابىستارىن اتاپ ءوتتى.
قىرعىزستاننىڭ بىرقاتار مەملەكەتتىك, قوعامدىق-ساياسي جانە مادەني قايراتكەرىن, بيزنەس جانە باق وكىلدەرىن ەكىجاقتى ىنتىماقتاستىقتى دامىتۋعا قوسقان ۇلەسى ءۇشىن ناگرادالارمەن ماراپاتتاۋ شارا باعدارلاماسىنىڭ ەرەكشە بولىگى بولدى.
سونداي-اق قوناقتار نازارىنا قازاقستاننىڭ جەتىستىكتەرى مەن قازاق-قىرعىز قارىم-قاتىناسىنىڭ دامۋى تۋرالى بەينە جانە فوتوكورمە ۇسىنىلىپ, قازاق جانە قىرعىز حالىق مۋزىكاسىن ورىنداعان ونەرپازداردىڭ ونەر كورسەتۋى, قازاقتىڭ ۇلتتىق تاعامدارى دا ۇسىنىلدى.
