مەملەكەت باسشىسى ۇلتتىق قوردىڭ اكتيۆتەرى 100 ملرد دوللارعا دەيىن ۇلعايتىلاتىنىن اتاپ ءوتتى.
«قازاقستان حالقىنا تيەسىلى بارلىق نارسە ونىڭ مۇددەلەرىنە قىزمەت ەتەدى. ول ءۇشىن ءبىز قوردى ءتيىمدى باسقارۋدى قامتاماسىز ەتەمىز, ونىڭ ينۆەستيتسيالىق تابىسىن ارتتىرامىز», دەدى قاسىم-جومارت توقاەۆ.
پرەزيدەنتتىڭ ايتۋىنشا, ەلىمىزدە وڭدەۋ سەكتورىن نىعايتۋ, ينفراقۇرىلىمدى جاڭعىرتۋ, ەنەرگەتيكالىق قۋاتتاردى ارتتىرۋ ءبىرىنشى كەزەكتەگى مىندەت بولماق.
ء«بىز اگرارلىق سالاعا قۋاتتى سەرپىن بەرەمىز, ونەركاسىپتىڭ بازالىق سالالارىن كۇشەيتەمىز جانە جوعارى قايتا ءبولۋ ونىمدەرىن شىعاراتىن جاڭا سالالار قۇرامىز. ءبىز تەڭگەرىمدى جانە اشىق سالىق, بيۋدجەت, اقشا-نەسيە جانە تاريفتىك ساياساتتى جۇرگىزەتىن بولامىز. ينفلياتسيانى تەجەۋ ءۇشىن جۇيەلى شارالار قابىلداۋىمىز كەرەك», دەپ اتاپ ءوتتى مەملەكەت باسشىسى.
قاسىم-جومارت كەمەل ۇلى اتاپ وتكەندەي, ءدال وسىنداي ەكونوميكا حالقىمىزدىڭ ءال-اۋقاتىنىڭ تۇراقتى ءوسۋىنىڭ نەگىزى بولادى.
سونداي-اق پرەزيدەنت 2025 جىلدان باستاپ ينفلياتسيا دەڭگەيىنە بايلانىستى ەڭ تومەنگى جالاقىنى ۇلعايتۋ تەتىگى ەنگىزىلەتىنىن قوسا ايتتى.
«شاعىن جانە ورتا بيزنەستە جۇمىسپەن قامتىلعاندار سانى 4,7 ملن ادامعا جەتەدى», دەدى ق. توقاەۆ.
