امەريكا قۇراما شتاتتارىنىڭ پرەزيدەنتى دجوزەف بايدەن قاسىم-جومارت توقاەۆ پەن قازاقستان حالقىن رەسپۋبليكا كۇنىمەن قۇتتىقتاپ, ورتالىق ازيانىڭ بەيبىتشىلىككە, تۇراقتىلىققا جانە وركەندەۋگە باعىتتالعان جولىنداعى ەلىمىزدىڭ وتىز جىلدىق كوشباسشىلىعىن ەرەكشە اتاپ ءوتتى.
ء«بىزدىڭ قاۋىپسىزدىك, ەنەرگەتيكا جانە ەكونوميكا ماسەلەلەرى جونىندەگى ەكىجاقتى اۋقىمدى ىنتىماقتاستىعىمىز, سونداي-اق قازاقستاندا جۇرگىزىلىپ جاتقان رەفورمالاردى تاباندى تۇردە قولدايتىنىمىز قارىم-قاتىناستارىمىزدىڭ بولاشاعىنا ينۆەستيتسيا سالۋعا دەگەن ءوزارا ۇمتىلىستى جانە ونىڭ ورتاق ماقساتتارعا جەتۋدەگى الەۋەتىن كورسەتەدى. بۇل ۇستانىم ءبىزدىڭ كەڭەيتىلگەن ستراتەگيالىق سەرىكتەستىگىمىزگە تولىق ساي كەلەدى», دەپ جازىلعان دجو بايدەننىڭ قۇتتىقتاۋىندا.
ەۋروپالىق كەڭەستىڭ پرەزيدەنتى شارل ميشەل 1990 جىلدىڭ قازان ايىندا قابىلدانعان ەگەمەندىك تۋرالى دەكلاراتسيادا مەملەكەتتىلىككە, اۋماقتىق تۇتاستىققا, بولىنبەۋشىلىككە جانە شەكارانىڭ مىزعىماستىعىنا قاتىستى نەگىزگى قاعيداتتار بەكىتىلگەنىن ايتتى.
«دەكلاراتسيا 1991 جىلى قازاقستاننىڭ تاۋەلسىزدىگىن جاريالاۋعا جول اشتى. بۇل دەكلاراتسيا بۇگىندە بارلىق بەيبىتسۇيگىش ەل قورعايتىن حالىقارالىق ءتارتىپتىڭ ىرگەلى قۇندىلىقتارى مەن قاعيداتتارىنىڭ ەرەجەلەرىنە نەگىزدەلگەن», دەلىنگەن شارل ميشەلدىڭ جەدەلحاتىندا.
سونىمەن قاتار وزبەكستان پرەزيدەنتى شاۆكات ميرزيوەۆ مەملەكەت باسشىسىنا جانە قازاقستان حالقىنا قۇتتىقتاۋىن جولداپ, ەلىمىزدىڭ تۇراقتى دامۋىنا باعىتتالعان جۇيەلى جانە اۋقىمدى رەفورمالاردىڭ ءتيىمدى جۇزەگە اسىرىلىپ جاتقانىن ەرەكشە اتاپ ءوتتى.
ء«بىزدىڭ تاتۋ كورشىمىز قازاقستان بارلىق سالادا بيىك شىڭداردى باعىندىرىپ كەلەدى. ءسىزدىڭ ايماقتىق جانە جاھاندىق ماڭىزى بار باستامالارىڭىزدىڭ حالىقارالىق ارەنادا بەلسەندى تۇردە قولداۋ تابۋى – ەلىڭىزدىڭ الەمدىك قاۋىمداستىقتا لايىقتى بەدەلگە يە ەكەنىنىڭ ايقىن دالەلى. بىرلەسكەن كۇش-جىگەر مەن جوعارى دەڭگەيدەگى تۇراقتى ديالوگتىڭ ارقاسىندا ەلدەرىمىز اراسىنداعى تاتۋ كورشىلىك جانە دوستىق قارىم-قاتىناستاردىڭ ستراتەگيالىق سەرىكتەستىك پەن وداقتاستىق قاتىناس دەڭگەيىنە كوتەرىلگەنىنە وتە قۋانىشتىمىز», دەپ جازدى وزبەكستان پرەزيدەنتى.
قىرعىزستان پرەزيدەنتى سادىر ءجاپاروۆ وز قۇتتىقتاۋىندا رەسپۋبليكا كۇنى مەرەكەسىن قايتا جاڭعىرتۋ باستاماسىن قاسىم-جومارت توقاەۆتىڭ جۇرگىزىپ وتىرعان ينستيتۋتسيونالدىق رەفورمالار ۇدەرىسىندەگى ماڭىزدى قادام دەپ باعالايدى.
ء«سىزدىڭ دانا ءارى پروگرەسشىل باسشىلىعىڭىزبەن بۇل رەفورمالار قوعامدىق-ساياسي جانە الەۋمەتتىك-ەكونوميكالىق دامۋعا تۇرتكى بولىپ, دوستاس قازاقستاندى وركەندەتۋگە باعىتتالعان بيىك ماقساتتارعا جەتۋگە قىزمەت ەتەتىنىنە كامىل سەنەمىن», دەپ جازىلعان سادىر جاپاروۆتىڭ قۇتتىقتاۋ حاتىندا.
ازەربايجان پرەزيدەنتى يلحام اليەۆ قۇتتىقتاۋىندا ازەربايجان قازاقستاننىڭ قارقىندى دامۋىنا, باۋىرلاس ەلدىڭ جەتىستىكتەرى مەن تابىستارىنا تىلەكتەس ەكەنىن اتاپ ءوتتى.
«ازەربايجان-قازاق قارىم-قاتىناسىنىڭ بۇگىنگى جوعارى دەڭگەيى ورتاق تاريحىمەن, ءمورالدى جانە مادەني قۇندىلىقتارىمەن ءوزارا تىعىز بايلانىستى باۋىرلاس حالىقتارىمىزدىڭ ەرىك-جىگەرىن ايقىن كورسەتەدى. قازىرگى مۇمكىندىكتەردى پايدالانا وتىرىپ, ءبىز ەلدەرىمىز اراسىنداعى ستراتەگيالىق سەرىكتەستىككە نەگىزدەلگەن جان-جاقتى قارىم-قاتىناستاردى نىعايتۋ جولىندا بىرلەسكەن كۇش-جىگەردى جالعاستىرا بەرەتىنىمىزگە سەنىمدىمىن», دەلىنگەن قۇتتىقتاۋ حاتتا.
بەلارۋس پرەزيدەنتى الەكساندر لۋكاشەنكو ەگەمەندىك تۋرالى دەكلاراتسيانى قازاقستان ءۇشىن ماڭىزدى وقيعا ءارى تاۋەلسىزدىك الۋ جولىنداعى العاشقى قادام دەپ اتادى.
«قازىرگى تاڭدا ءسىزدىڭ ەلىڭىز بەيبىت سىرتقى ساياسات قاعيداتىن ۇستانادى, ءوزارا تۇسىنىستىك پەن تاتۋ كورشىلىك قارىم-قاتىناستى نىعايتۋعا جان-جاقتى اتسالىسادى. استانانىڭ مازمۇندى باستامالارى حالىقارالىق قاۋىپسىزدىكتى قامتاماسىز ەتۋدە, ادامزات بالاسىنا ورتاق جاھاندىق ماسەلەلەردى شەشۋدە ماڭىزدى ءرول اتقارادى», دەپ جازدى الەكساندر لۋكاشەنكو.
سونىمەن قاتار قۇتتىقتاۋ جەدەلحاتتارىن ارمەنيا پرەزيدەنتى ۆااگن حاچاتۋريان, ارمەنيا پرەمەر-ءمينيسترى نيكول پاشينيان, كاۆكاز مۇسىلماندارى باسقارماسىنىڭ توراعاسى شەيح-ۋل-يسلام اللاشۇكىر پاشازادە جولدادى.
