رەسەي پرەزيدەنتى ۆلاديمير پۋتين مەملەكەت باسشىسىن جانە قازاقستان حالقىن رەسپۋبليكا كۇنىمەن قۇتتىقتاپ, بەيبىتشىلىك جانە باق-بەرەكە تىلەدى.
«قازاقستان ەكونوميكالىق, الەۋمەتتىك, عىلىمي-تەحنيكالىق جانە باسقا دا سالالاردا تاڭعالارلىق ناتيجەلەرگە قول جەتكىزدى, حالىقارالىق ىستەردە ماڭىزدى ءرول وينايدى. مەملەكەتتەرىمىز اراسىنداعى ستراتەگيالىق سەرىكتەستىك جانە وداقتاستىق قارىم-قاتىناستار تابىستى دامىپ كەلەدى», دەلىنگەن جەدەلحاتتا.
قىتاي حالىق رەسپۋبليكاسىنىڭ توراعاسى سي تسزينپين جەدەلحاتىندا پرەزيدەنت قاسىم-جومارت توقاەۆتىڭ ادىلەتتى قازاقستان قۇرۋ جولىنداعى رەفورماعا بەلسەنە كىرىسكەنىن اتاپ ءوتىپ, قىركۇيەك ايىنداعى قازاقستانعا مەملەكەتتىك ساپارى مازمۇندى ءارى جەمىستى بولعانىن جەتكىزدى.
«ەكىجاقتى قارىم-قاتىناستىڭ دامۋىنا نازار اۋدارا وتىرىپ, مەن سىزبەن بىرگە قىتاي جانە قازاقستان اراسىنداعى ماڭگىلىك جان-جاقتى ستراتەگيالىق سەرىكتەستىكتى دامىتۋعا ءازىرمىن», دەپ جازىلعان جەدەلحاتتا.
تۇركيا پرەزيدەنتى رەجەپ تايپ ەردوعان مەملەكەت باسشىسىن ۇلتتىق مەرەكەمىزبەن قۇتتىقتاي كەلە, دوستاس ءارى باۋىرلاس قازاقستاننىڭ تاۋەلسىزدىگىن العاش مويىنداعان ەل رەتىندە تۇركيا وتكەن 30 جىل ىشىندە قازاقستاننىڭ بارلىق سالادا قول جەتكىزگەن جەتىستىكتەرىنە كۋا بولىپ كەلە جاتقانىن ايتتى.
«ورتاق ءتىل, مادەنيەت جانە تاريحي بايلانىستاردان ءنار الىپ, «كەڭەيتىلگەن ستراتەگيالىق سەرىكتەستىك» دەڭگەيىنە جەتكەن قارىم-قاتىناسىمىز بەن ىنتىماقتاستىعىمىزدى ەكى ەلدىڭ مۇددەسىنە ساي ودان ءارى دامىتۋعا جانە تەرەڭدەتۋگە نيەتتىمىز», دەپ جازىلعان جەدەلحاتتا.
فرانتسيا پرەزيدەنتى ەممانۋەل ماكرون ەكى ەل اراسىندا ديپلوماتيالىق قارىم-قاتىناس ورناعانىنا 30 جىل تولعان وسىناۋ ايرىقشا كەزەڭدە ەكىجاقتى ديالوگتىڭ قارقىندى دامىپ كەلە جاتقانىنا قۋانىشتى ەكەنى جازىلعان.
ء«بىز ءسىز جۇرگىزىپ جاتقان ساياسي, ەكونوميكالىق جانە الەۋمەتتىك رەفورمالاردى ايرىقشا قىزىعۋشىلىقپەن باقىلاپ وتىرامىز, فرانتسيا ولاردىڭ جۇزەگە اسىرىلۋىن ارقاشان قولداۋعا ءازىر ەكەنىنە سەنىم بىلدىرگىم كەلەدى», دەپ جازىلعان جەدەلحاتتا.
تاجىكستان پرەزيدەنتى ەمومالي راحمون جەدەلحاتىندا ءوزارا سىيلاستىق پەن سەنىمنىڭ بەرىك تاريحي داستۇرىنە نەگىزدەلگەن قازاق-تاجىك قارىم-قاتىناسى جان-جاقتى دامىپ كەلە جاتقانىنا ريزاشىلىعىن بىلدىرگەن.
تۇرىكمەنستان پرەزيدەنتى سەردار بەردىمۇحامەدوۆ پەن تۇرىكمەنستاننىڭ ميللي گەنگەشى حالق ماسلاحاتىنىڭ توراعاسى گۋربانگۋلى بەردىمۇحامەدوۆ قۇتتىقتاۋ جەدەلحاتتارىندا تۇرىكمەن-قازاق ستراتەگيالىق سەرىكتەستىگى ەكى ەل حالقىنىڭ يگىلىگى ءۇشىن قارقىندى دامي بەرەتىنىنە سەنىم ءبىلدىردى.
سونداي-اق بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش قازاقستان حالقىن جانە قاسىم-جومارت توقاەۆتى رەسپۋبليكا كۇنىمەن قۇتتىقتادى.
«وسىناۋ ايرىقشا كۇنى بىرىككەن ۇلتتار ۇيىمى قازاقستاننىڭ بارشا ازاماتى سىن-قاتەرگە توتەپ بەرىپ, تۇراقتى دامۋ ماقساتتارىنا جەتۋ جولىنداعى پروگرەستى جەدەلدەتىنىنە جانە الەمنىڭ بارلىق حالقىنىڭ يگىلىگى ءۇشىن ادىلەتتى ءارى بەيبىت الەمدى قۇرۋدان تىس قالمايتىنىنا سەنىم بىلدىرەدى», دەپ اتاپ ءوتتى بۇۇ باس حاتشىسى.
سونىمەن قاتار يران يسلام رەسپۋبليكاسىنىڭ پرەزيدەنتى يبراحيم رايسي, موڭعوليا پرەزيدەنتى ۋحنااگين حۇرەلسۋح, اۆستريا پرەزيدەنتى الەكساندر ۆان دەر بەللەن, حورۆاتيا پرەزيدەنتى زوران ميلانوۆيچ, پورتۋگاليا پرەزيدەنتى مارسەلۋ رەبەلۋ دە سوۋزا, سەربيا پرەزيدەنتى الەكساندر ۆۋچيچ, سينگاپۋر پرەزيدەنتى حاليما ياكوب, تمد اتقارۋشى كوميتەتىنىڭ توراعاسى – اتقارۋشى حاتشىسى سەرگەي لەبەدەۆ, يسلام ىنتىماقتاستىعى ۇيىمىنىڭ باس حاتشىسى حيسسەين براحيم تاحا وزدەرىنىڭ قۇتتىقتاۋ جەدەلحاتتارىن جولداعان.
قۇتتىقتاۋ جەدەلحاتتارى ءالى دە كەلىپ جاتىر.
