ەلورداداعى Start بيليارد كلۋبىندا جالاۋى جەلبىرەگەن تاستاياق جارىسىنا قالامگەرلەر قاۋىمى سىنعا ءتۇستى. سونداي-اق تۋرنير جەڭىمپازىنان بولەك, قاتىسۋشىلار ءۇش اتالىم بويىنشا, ياعني ۇلت ۇستازى احمەت بايتۇرسىن ۇلى, حالىق جازۋشىسى, قوعام قايراتكەرى شەرحان مۇرتازا جانە بەلگىلى جۋرناليست, ەتنوگراف-عالىم اقسەلەۋ سەيدىمبەك اتىنداعى ارنايى سەرتيفيكاتتارمەن ماراپاتتالدى.
ال دوداعا بيلياردتىڭ ەركىن پيراميدا تۇرىنەن ەكى دۇركىن الەم چەمپيونى (2010, 2021), حالىقارالىق دارەجەدەگى سپورت شەبەرى قازاقستاندىق ەرنار شىمباەۆ تورەلىك ەتتى.
جارىستىڭ اشىلۋ سالتاناتىندا «Elorda Aqparat» مەدياحولدينگىنە قاراستى «استانا اقشامى» گازەتىنىڭ باس رەداكتورى ەركىن قىدىر ءسوز سويلەپ, كوپ جىل بويى تاسادا قالعان تۋرنير بۇدان بىلاي قايتادان جانداناتىنىن ايتتى.
«25 قازان – قايتادان ەلىمىزدىڭ ەڭ باستى مەرەكەسىنە اينالىپ جاتىر. سونىڭ قۇرمەتىنە وراي ءبىرازدان بەرى ءۇزىلىپ قالعان قالامگەرلەر اراسىنداعى ءداستۇرلى ءتۋرنيردى قايتادان جاڭعىرتىپ جاتىرمىز. بۇل يگى ءداستۇر بۇدان كەيىن دە جالعاسىن تابادى دەگەن سەنىمدەمىن. قالامگەرلەردىڭ تاستاياق ءتۋرنيرىن ساعىنىپ قالعانى كورىنىپ تۇر. مىنە, وزدەرىڭىز بايقاعانداي, «Elorda Aqparat» ۇيىمداستىرىپ جاتقان تۋرنيرگە باس قالاداعى بەدەلدى قالامگەرلەر, ۇلكەن جازۋشى اعالارىمىز, جاس جۋرناليستەر قاتىسىپ, جارىستىڭ مارتەبەسىن كوتەرىپ جاتىر», دەدى ەركىن قىدىر.
«Elorda Aqparat» مەدياحولدينگىنىڭ ديرەكتورى ولجاس سىدىقبەك جازۋشى, قوعام قايراتكەرى تولەن ابدىككە قۇرمەت كورسەتىپ, قازاقى ءداستۇر بويىنشا جۋىردا عانا مەرەيلى 80 جاسقا تولعان اقساقالعا شاپان جاپتى. سونداي-اق جارىس قورىتىندىسى بويىنشا ت.ابدىك ۇلت ۇستازى احمەت بايتۇرسىن ۇلى اتىنداعى ارنايى جۇلدەمەن ماراپاتتالدى.
ال جازۋشى ءۋاليحان قاليجان شەرحان مۇرتازا اتىنداعى ارنايى جۇلدەگە يە بولسا, جازۋشى, عالىم, تاريحشى قويشىعارا سالعارا ۇلىنا اقسەلەۋ سەيدىمبەك اتىنداعى ارنايى جۇلدە تابىستالدى. سونىمەن قاتار سەناتور نۇرتورە جۇسىپكە «مەرگەن» ارنايى جۇلدەسى بۇيىرسا, اقىن نەسىپبەك ايت ۇلى «ەڭ مادەنيەتتى ويىنشى» جۇلدەسىن قانجىعالادى.
جارىستىڭ قورىتىندىسى بويىنشا, تانىمال جۋرناليست ءنۇردىلدا وراز توپ جارىپ, قارجىلاي 200 مىڭ تەڭگە سىياقىعا يە بولدى. ەكىنشى ورىندى جۋرناليست احمەت قايرات ۇلى يەمدەنسە (150 مىڭ تەڭگە), ۇزدىك ۇشتىكتى پارلامەنت ءماجىلىسىنىڭ دەپۋتاتى, جۋرناليست جاناربەك ءاشىمجان مەن جۋرناليست ەربول ەردەنبەك (100 مىڭ تەڭگە) تۇيىندەدى.
