نوبەل فەستيۆالى - ەڭ ءىرى حالىقارالىق ءىس-شارا.
باعدارلامانىڭ ميسسياسى – جاھاندىق ءبىلىم مەن عىلىمدى الەمنىڭ كەز كەلگەن بۇرىشىندا قولجەتىمدى ەتۋ. فەستيۆالگە جىل سايىن نوبەل سىيلىعىنىڭ لاۋرەاتتارى, «سەرپىلىس» سىيلىعىنىڭ يەگەرلەرى (عىلىمي وسكار), الەمدىك يننوۆاتورلار, 155 ەلدەن 500 ۋنيۆەرسيتەت جانە 500 مىڭنان استام ادام قاتىسادى.
V Nobel Fest ءبىر مەزگىلدە قازاق, اعىلشىن, تۇرىك, قىتاي, اراب, وزبەك جانە ورىس تىلدەرىندە 6 ستۋديادا - ازەربايجان, گەرمانيا, تۇركيا, پاكىستان, قىتاي, وزبەكستان جانە قازاقستاندا وتەدى.
تەلەكوپىر جۇمىسىنا قر عىلىم جانە جوعارى ءبىلىم ءمينيسترى ساياسات نۇربەك, 2017 جىلعى نوبەل سىيلىعىنىڭ لاۋرەاتى راە كۆونگ چۋنگ, CEO Nobel Fest نەگىزىن قالاۋشى ماقسات قۇربەنوۆ, جاستار اگەنتتىگىنىڭ (وزبەكستان) ديرەكتورى الىشەر سادۋللاەۆ, COMSTECH, يسلام ىنتىماقتاستىعى ۇيىمىنىڭ باس ۇيلەستىرۋشىسى دوكتور يكبال چوۋدحاري, Coca-Cola-نىڭ ەۋرازيا مەن تاياۋ شىعىستاعى ۆيتسە-پرەزيدەنتى كلاۋديا ناۆاررو قاتىسادى.
«نوبەل فەستيۆالىنىڭ ماقساتى - ءبىلىم بەرۋدى بارلىعىنا قولجەتىمدى ەتۋ. بۇل اۋقىمدى ءىس-شارا وفلاين فورماتتا وتەدى. بەلگىلى سپيكەرلەر استانادا ءۇش كۇن بويى لەكتسيا وقيدى. نوبەل سىيلىعىنىڭ لاۋرەاتى اياسىندا تۇڭعىش رەت قازاقستاندا كليماتتىق ەكونوميكا ورتالىعىنىڭ اشىلۋى ماڭىزدى وقيعالاردىڭ ءبىرى بولماق. ورتالىق ءوز ەسىگىن م.اۋەزوۆ اتىنداعى وڭتۇستىك قازاقستان ۋنيۆەرسيتەتىندە اشادى», دەدى V نوبەل فەستيۆالى باعدارلاماسىنىڭ جەتەكشىسى جۇلدىز ادامزاتوۆا.
سونداي-اق Nobel Fest اياسىندا 31 قازان مەن 4 قاراشا ارالىعىندا نوبەل دارىستەر اپتالىعى ۇيىمداستىرىلادى. الەمنىڭ تۇكپىر تۇكپىرىنەن كەلگەن نوبەل سىيلىعىنىڭ لاۋرەاتتارى جانە الەمدەگى ەڭ بەدەلدى ماراپاتتاردىڭ يەگەرلەرى ۋنيۆەرسيتەتتەر مەن ستۋدەنتتەر ءۇشىن ءدارىس وقيدى. دارىستەر Nobel Fest باس سەرىكتەستەرى – م.اۋەزوۆ اتىنداعى وڭتۇستىك قازاقستان ۋنيۆەرسيتەتى مەن س.سەيفۋللين اتىنداعى قازاق اگروتەحنيكالىق ۋنيۆەرسيتەتى ءۇشىن ارنايى ۇيىمداستىرىلادى.
