مەرەكەلىك داتا كىتاپحانالاردىڭ جۇمىسىن جانداندىرىپ, سالا ماماندارىنىڭ بەدەلىن ارتتىرۋ ماقساتىندا مادەنيەت جانە سپورت مينيسترلىگىنىڭ باستاماسىمەن بەكىتىلدى. سالتاناتتى ءىس-شارا اياسىندا مادەنيەت جانە سپورت ءمينيسترى داۋرەن اباەۆ كىتاپحاناشىلارعا «مادەنيەت سالاسىنىڭ ۇزدىگى» توسبەلگىسىن تابىستادى جانە قازاقستان رەسپۋبليكاسى مادەنيەت جانە سپورت ءمينيسترىنىڭ قۇرمەت گراموتاسىمەن جانە العىس حاتتارىمەن ماراپاتتادى.
«مەن ەلىمىزدەگى 70 ميلليون دانا كىتاپ قورىنا قامقورلىق تانىتىپ جۇرگەن بارشا كىتاپحاناشىلاردى كاسىبي مەرەكەمەن قۇتتىقتايمىن. مەنىڭ ويىمشا, كىپتاپحانا ءىسىنىڭ قاجەتتىلىگىنە جانە كىتاپحانا ءىسىنىڭ كۇردەلىلىگىنە ەشكىم كۇمان كەلتىرمەيدى. دەگەنمەن قوعام اراسىندا «كىتاپحانالاردىڭ عاسىرى اياقتالدى, ولاردىڭ قىزمەتى قاعاز تاسىعىشتار داۋىرىندەگى اتاۆيزم رەتىندە ەسكىرەدى, ينتەرنەت پەن تسيفرلىق ترانسفورماتسيا ارقاسىندا قوعامدىق كىتاپحانانىڭ ورنىن ءبىر عانا سمارتفون باسا الادى» دەگەن سىندى تەرىس پىكىرلەر بار. مەن مۇنداي پىكىرمەن تۇبەگەيلى كەلىسپەيمىن. جالپى, تەحنولوگياعا كوزسىز تابىنۋ مەن تسيفرعا دەگەن سوقىر سەنىم ءبىزدىڭ ۇرپاقتىڭ ساناسىن قۇندىلىقتارعا تەرەڭ بويلاۋعا مۇمكىندىك بەرمەي, اداستىرادى دەپ سانايمىن», دەدى داۋرەن اباەۆ.
ءمينيستردىڭ ايتۋىنشا, قازىرگى زامانعى كوپشىلىك كىتاپحانانىڭ فۋنكتسيونالدىعى كىتاپتاردى ساقتاۋ, جۇيەلەۋ, تسيفرلاندىرۋ جانە وقىرماندارعا ۇسىنۋ شەڭبەرىنەن الدەقايدا كوپ باعىتتى قامتيدى. بۇل رەتتە مسم كىتاپحانالار جۇمىسىنىڭ جاڭا قاعيداتتارى مەن ستاندارتتارىن كەزەڭ-كەزەڭىمەن ەنگىزۋمەن اينالىسۋعا دايىن.
«كىتاپحانا – بۇل بىلىمگە ءۇڭىلىپ, سانالى تۇردە, جايلى ورتادا وقۋعا كەلەتىن عيباداتحانا. ءبىز كۇندەلىكتى كۇيبەڭ تىرلىك قاربالاستان ارىلىپ, رۋحانيات الەمىنە ەنۋگە مۇمكىندىك تۋعىزاتىن قاستەرلى ورىن. سوندىقتان ءبىز كىتاپحانا ءىسىن قولدايتىن بولامىز. بۇل ءبىزدىڭ بەرىك ۇستانىمىمىز», دەپ تۇيىندەدى مينيستر.
ايتا كەتەيىك, ەلىمىزدە 11 مىڭنان استام كىتاپحانا جۇمىس ىستەيدى. ونىڭ 7 مىڭنان استامى ءبىلىم بەرۋ جۇيەسىنە ءتيىستى بولسا, 3 مىڭنان استامى مەملەكەتتىك كىتاپحانا.
