جۇلدە يەگەرلەرىنە 50 اەك كولەمىندە ءبىر رەتتىك (159 مىڭ تەڭگە) سىياقى بەرىلدى. رەسپۋبليكا كۇنى قارساڭىندا وبلىس اكىمى ابىلقايىر سقاقوۆ سىيلىق لاۋرەاتتارىن قۇتتىقتاپ, ەل بولاشاعى جاستار قولىندا ەكەنىن اتاپ ءوتتى.
– وسىدان 32 جىل بۇرىن ەلىمىزدىڭ ەگەمەندىگىن پاش ەتكەن تاريحي كۇن بيىل باستى مەرەكەگە اينالدى. ۇلتتىق مەرەكە قارساڭىندا «تاۋەلسىزدىك ۇلانى» بەلگىسىنىڭ 100 يەگەرى ماراپاتقا يە بولدى. بارشاڭىزدى جەڭىستەرىڭىزبەن قۇتتىقتايمىن. ەلىمىزدىڭ بولاشاعى وزدەرىڭىز سياقتى ورەندەردىڭ قولىندا, – دەدى ءوڭىر باسشىسى.
بايقاۋعا قاتىسۋعا جەتى جۇزدەن استام ءوتىنىش كەلىپ تۇسكەن. جەڭىمپازداردى انىقتاۋ ءۇشىن تاۋەلسىز قازىلار القاسى قۇرىلىپ, ناتيجەسىندە «تاۋەلسىزدىك ۇلانى» سىيلىعىنىڭ 100 لاۋرەاتى انىقتالدى. مىسالى, «الەۋمەتتىك ماڭىزى بار جانە قوعامدىق قىزمەت» نوميناتسياسىندا بەلسەندى ازاماتتىق كوزقاراسى ءۇشىن 4 مەكتەپ وقۋشىسى مەن 1 كوللەدج ستۋدەنتى ماراپاتتالدى, 20-دان استام پاۆلودارلىق ورەن «عىلىمي-تەحنيكالىق شىعارماشىلىق جانە وقۋشىلىق-زەرتتەۋ جۇمىس» نوميناتسياسىندا جەڭىسكە جەتتى. تاعى 20 بالا سپورتتاعى جەتىستىگى, كاسىپتىك جانە شىعارماشىلىق شەبەرلىگى ءۇشىن ماراپاتتالدى.
ءوز كەزەگىندە سىيلىق يەگەرى, پاۆلودار قالاسىنداعى № 8 مەكتەپ-ليتسەي وقۋشىسى انتونينا ستەپانوۆا وسكەلەڭ ۇرپاققا قولداۋ كورسەتكەن وبلىس باسشىسىنا العىس ايتتى.
– رەسپۋبليكا كۇنى قارساڭىندا «تاۋەلسىزدىك ۇلانى» سىيلىعىنا قول جەتكىزۋ مەن ءۇشىن زور مارتەبە. بۇل مەنىڭ عانا ەمەس, ماعان وتاندى ءسۇيۋدى ۇيرەتكەن اتا-انام مەن مۇعالىمدەرىمنىڭ دە جەتىستىگى. بۇل ءساتتى جەتىستىكتەرىم جوعارى دەڭگەيدە باعالانعان كۇن رەتىندە ماڭگى ەستە ساقتايمىن, – دەدى مەرەيى وسكەن وقۋشى.
ال دارىندى بالالارعا ارنالعان اباي اتىنداعى گيمنازيانىڭ 11-سىنىپ وقۋشىسى الىشەر دابىلحان ءوڭىر باسشىسىنا رەسپۋبليكا كۇنىنە وراي چەللەندج باستاۋدى ۇسىندى. ابىلقايىر سقاقوۆ مەكتەپ وقۋشىسىنىڭ باستاماسىن قابىل الىپ, مۇزافار الىمباەۆتىڭ ولەڭىن وقىدى. ءسويتىپ «قادىرلى قازاقستان, وتان-انا» اكتسياسىنا مۇرىندىق بولدى. چەللەندجدى جالعاستىرۋ ءوڭىردىڭ بارلىق مەكتەپ وقۋشىلارى مەن جاستارىنا بەرىلىپ وتىر.
كەش سوڭىندا جاستار «جاسا, قازاقستان» ءانىن بىرگە شىرقادى.
پاۆلودار وبلىسى
