وسكەلەڭ ۇرپاقتى ءسوز قۇدىرەتىن تانۋعا باۋليتىن شەشەندىك ونەر بايقاۋىنا ەلىمىزدىڭ 4 وڭىرىندەگى 8 ۋنيۆەرسيتەت پەن 1 كوللەدجدەن 16 ستۋدەنت قاتىسىپ, قوس ءبولىم مەن ءتورت كەزەڭ بويىنشا ءسوز دوداسىنا ءتۇستى. جۇپتار اراسىندا وتكەن جەكپە-جەك تۇرىندەگى شەشەندىك سايىس قاتىسۋشىلاردىڭ كوركەمدىك دەڭگەيى مەن ءبىلىمىن, وي ۇشقىرلىعى مەن سوزدىك قورىن, ءتىل تازالىعى مەن سۇراق قويۋ قابىلەتىن سىننان وتكىزدى. قالعان ەكى بولىمدە شەشەندىك سوزدەر مەن تولعاۋلاردى جاتقا ءبىلۋ, جۇمباقتاپ, استارلاپ ايتىلعان ويدىڭ ءتۇيىنىن شەشىپ, ءمانىن ءتۇسىنۋ دەڭگەيى انىقتالدى. قازىلار مەن قاتىسۋشىلار ۇپاي سانى بويىنشا جەڭىمپازدار بەلگىلى بولعان سوڭ عانا حابارلاندى.
جاس دىلمارلارعا «الەۋمەتتىك جەلىنىڭ الەۋەتى كۇشتى مە؟», ء«بىز ءوزى جالقاۋمىز با؟!», «عىلىممەن اينالىسىپ ەلگە پايدا كەلتىرە الار ما ەدىڭىز؟» قاتارلى بىرقاتار تاقىرىپتار ۇسىنىلىپ, ويدى قۋاتتاپ نەمەسە تەرىستەي وتىرىپ قورعاپ شىعۋ, ناقتى دالەل, دايەكپەن ويدى ىقشام ءارى كوركەم وبرازدى جەتكىزە الۋ تالاپتارى قويىلدى.
امانجان ەڭسەباي ۇلى, راقىمعالي ابرار ۇلى, بەرەكە جۇماقاەۆا, سەرىك قاليەۆ, جارقىن سالەن ۇلى سىندى ءتىل جاناشىرلارى قازىلىق ەتكەن بايقاۋ قورىتىندىسى بويىنشا باس جۇلدەنى الماتى مەملەكەتتىك سەرۆيس جانە تەحنولوگيا كوللەدجىنىڭ ستۋدەنتى رامازان نۇرلان ۇلى جەڭىپ الدى. جۇلدەلى 1-ورىنعا ءال-فارابي اتىنداعى قازۇۋ-دىڭ 1-كۋرس ستۋدەنتى داۋلەتبەك دۋمان لايىق بولسا, قوس بىردەي 2-ورىن ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ ستۋدەنتى تالشىن تالعاتقىزى مەن م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ ستۋدەنتى گۇلاي قاليحانوۆانىڭ قانجىعاسىنا بايلاندى. قازاق ۇلتتىق قىزدار پەداگوگيكالىق ۋنيۆەرسيتەتىنىڭ 1-كۋرس ستۋدەنتتەرى نۇراي ابدىبەك, قاراقات نۇرلىجان جانە ءال-فارابي اتىنداعى قازۇۋ-دىڭ ستۋدەنتى باعجان بولاتبەكوۆ 3-ورىنعا يە بولدى. ودان بولەك ءسوز سايىسىندا وزگەشە ونەرىمەن كوزگە تۇسكەن ءۇش قاتىسۋشىعا ارنايى جۇلدە تابىستالدى.
– جۇيەلى سويلەي الۋ ادامنىڭ تۇلعا رەتىندە قالىپتاسقانىنىڭ ءبىر بەلگىسى. «سوزىنە قاراپ كىسىنى ال, كىسىگە قاراپ ءسوز الما» دەگەن حاكىم تاعىلىمى بۇعان دالەل. جالپى سويلەۋ مادەنيەتى ءومىردىڭ بارلىق سالاسىن قامتيدى دەسەك, سونىڭ ىشىندە شەشەن سويلەي الۋ – ادامنىڭ رۋحاني بولمىسى مەن تابىسىنىڭ دا كىلتى. سەبەبى ءبارىمىز قوعامدا ءومىر ءسۇرىپ, كۇنبە-كۇن كوممۋنيكاتسياعا تۇسەتىن جاندارمىز. جۇيەلى سويلەي بىلەتىن ادامنىڭ ءبىلىمى, كىسىنى تىڭداي الۋى, ءوزىن-ءوزى ۇستاۋى, قيسىندى وي جۇيەسى, ءسوز مادەنيەتى ەرەكشەلەنىپ تۇرادى. وكىنىشتىسى, ەكى اۋىز ءسوزدىڭ باسىن قۇراپ, ءوز ويىن ەركىن جەتكىزە الاتىن جاستاردىڭ ازايىپ كەلە جاتقانى جاسىرىن ەمەس. سەبەبى نەدە دەسەك, ءبىلىم بەرۋ سالاسىنداعى جۇيەسىز رەفورمالار مەن شاتقاياقتاپ تۇرعان ءتىل ساياساتىنا تىرەلەمىز. وعان قوسا تەحنوكراتتىق زاماندا گۋتەنبەرگ ونەر تابىسىن مىسە تۇتپاي, تسۋكەربەرگ الەمىنە شۇعىل كوشىپ كەتۋىمىزدىڭ دە سالدارى بار. بىلىمگەرلەرىمىزدىڭ كوركەم شىعارما وقۋدان شەكتەلۋى وسىنى بايقاتادى. بۇل بايقاۋدىڭ بىرنەشە ماقساتى بولدى. الدىمەن, تىلىمىزگە جاناشىرلىق, ءسوز ونەرىمىزگە قۇرمەت, حالقىمىزدا امانات بولىپ كەلە جاتقان رۋحاني مۇرامىزدى ۇلىقتاۋعا دەگەن قۇلشىنىس دەسەك, سونىمەن قاتار جاستارىمىزدى دامىتۋعا, تۇلعا بولىپ قالىپتاسۋىنا ىقپال ەتۋ دەپ تۇسىنگەن ورىندى. بايقاۋعا قازىلىق ەتە وتىرىپ, قاتىسۋشىلار تاراپىنان ءبىراز ىزدەنىستىڭ, تىڭ تالپىنىستىڭ بولعانىن اڭعاردىق. «جۇيەلى ءسوز قيسىندى ويدان تۋادى» دەيدى. شەشەندىك ونەردە ءسوز ۇتقىرلىعى, وي قيسىندىلىعى اسا ماڭىزدى ءارى شۇبالتپاي ءسوزدى انىق دىتتەگەن نىساناعا ءدوپ تۇسىرە الۋ دا شەبەرلىك. «كوپ ويلاپ جاقسى سويلە نۇسقا بولسىن, قايتارار جاۋابىڭ دا قىسقا بولسىن» دەيتىن بابامىز ءار ءسوزدىڭ قادىرىن ءبىلۋدى مەڭزەيدى. بايقاۋ بارىسىندا ءسوز دوداسىن قولما-قول, تالداپ-تارازىلاپ, ءاربىر قاتىسۋشىنىڭ ءار كەزەڭدەگى ءسوز ساپتاسىنا اشىق ءبىلدىرىلدى, اسىرەسە ءسوز قولدانىستارىنا, ءتىل تازالىعىنا, كوركەمدىگىنە باعا بەرىلىپ وتىردى. ءوز ورايىندا قازىلار تاراپىنان ايتىلعان سىن-پىكىر قاتىسۋشىلارمەن قوسا تۇتاس كورەرمەندەرگە دە ايتارلىقتاي ونەگە-ساباق بولدى. سويلەۋ ارەكەتىمەن قاتار, تىڭدارمانىن يگەرۋ, ساحنا مادەنيەتى دەگەندەر دە نازاردان تىس قالمادى. مۇنداي ءىس-شارالاردىڭ جاندانۋى, ءداستۇرلى دوداعا اينالۋى اسا ماڭىزدى. ءوز ۇلتىمىزدىڭ ەرەكشەلىگى ايشىقتاپ, ۇلتتىق كودىمىزدىڭ قۇنىن تانىتۋدىڭ بولاشاق ءۇشىن قاجەتتىگى اسا زور, – دەيدى ءدىلمارلار دوداسىنا قازىلىق ەتكەن پ.ع.ك, سدۋ پروفەسسورى بەرەكە جۇماقاەۆا.
ۇيىمداستىرۋشىلار كورەرمەننىڭ ايىزىن قاندىرىپ, رۋحاني مۇرامىزدىڭ مەرەيىن ۇستەم ەتكەن بايقاۋدى داستۇرگە اينالدىرۋدى كوزدەيدى. «اتامۇرا» كورپوراتسياسى دەمەۋشىلىك تانىتقان جوبادا جۇزدەن جۇيرىك شىققاندار قوماقتى قارجىلاي سىيلىققا يە بولدى.
الماتى
