ەل بيلىگىنىڭ ارنايى شاقىرتۋىمەن كەلگەن حالىقارالىق ۇيىمنىڭ مۇشەلەرى سايلاۋ كۇنى عانا ەمەس, ناۋقانعا دەيىن دە, كەيىن دە جۇمىستارىن جالعاستىرىپ, ناقتى باعاسىن بەرمەك. بيۋرو باسشىسى ۋرشۋلا گاتسەك اتالعان ۇيىم بۇعان دەيىن ەۋروپاداعى قاۋىپسىزدىك جانە ىنتىماقتاستىق ۇيىمىنا مۇشە ەلدەردەگى 400-دەن استام ساياسي ناۋقانعا قاتىسقانىن اتاپ ءوتتى.
– قۇرامدا 11 حالىقارالىق ساراپشى, 30 ۇزاق مەرزىمدى بايقاۋشى بار. سونداي-اق سايلاۋعا بىرنەشە كۇن قالعاندا قاتارعا قوسىلاتىن 300 قىسقا مەرزىمدى بايقاۋشى تىركەلەدى. باستى ماقسات – سايلاۋدىڭ ەقىۇ مىندەتتەمەلەرىنە جانە دەموكراتيالىق سايلاۋ وتكىزۋ جونىندەگى باسقا دا حالىقارالىق مىندەتتەمەلەر مەن ستاندارتتارعا, سونداي-اق قازاقستان زاڭدارىنا سايكەس ءوتۋىن باقىلاۋ. قالا بەردى, ءار كانديداتتىڭ قۇقىعىنىڭ قورعالۋىن نازاردا ۇستايمىز. سايلاۋدان كەيىن دە ءتيىستى جۇمىستى جالعاستىرامىز. سەبەبى, ساياسي ناۋقاننان كەيىن نارازىلىق تۋىنداۋى مۇمكىن. ەقىۇ-عا مۇشە ەلدەردەگى سايلاۋمەن سالىستىرۋعا قۇقىعىمىز جوق. كەيدە ءبىزدى ۇگىت-ناسيحات باعىتىنداعى ۇيىم رەتىندە تانىپ, اقىل-كەڭەس بەرەدى دەپ توپشىلايتىندار بار. ءبىز تەك سايلاۋ بارىسىن, ناۋقانعا دەيىنگى جانە كەيىنگى وقيعالاردى باقىلايتىنىمىزدى ايتقىم كەلەدى, – دەيدى ۋرشۋلا گاتسەك.
بايقاۋشىلاردىڭ باسىم بولىگى بۇعان دەيىن ەلىمىزدە وتكەن پرەزيدەنتتىك سايلاۋلارعا قاتىسقان, ياعني تاجىريبەسى مول ماماندار. ولار ۇگىت-ناسيحاتتىڭ, ونىڭ ىشىندە الەۋمەتتىك جەلىلەردە جۇرگىزىلۋىن, بارلىق دەڭگەيدەگى سايلاۋ اكىمشىلىگىنىڭ جۇمىسىن باقىلاماق. سايلاۋعا قاتىستى زاڭناما جانە ونىڭ ورىندالۋىن, نەگىزگى بوستاندىقتاردى قۇرمەتتەۋ, سايلاۋ داۋلارىن شەشۋ سياقتى سايلاۋدىڭ بارلىق اسپەكتىلەرىن مۇقيات قاداعالايدى. سونداي-اق دەموكراتيالىق ينستيتۋتتار جانە ادام قۇقىقتارى بيۋروسى بۇرىنعى سايلاۋلاردا ايتقان ۇسىنىمداردىڭ ورىندالۋىن باعالاماق.
مەملەكەتتىك ورگاندار مەن ساياسي پارتيالاردىڭ, ازاماتتىق قوعامنىڭ, بۇقارالىق اقپارات قۇرالدارىنىڭ جانە حالىقارالىق قاۋىمداستىقتىڭ وكىلدەرىمەن كەزدەسۋلەر باقىلاۋدىڭ قۇرامداس بولىگى. اتالعان ۇيىم حالىقتى جانە بۇقارالىق اقپارات قۇرالدارىن سايلاۋدى باقىلاۋ ميسسياسىنىڭ قىزمەتى تۋرالى حاباردار ەتۋ ءۇشىن سايلاۋعا شامامەن ەكى اپتا قالعاندا ارالىق ەسەپ بەرۋدى كوزدەپ وتىر.
