قر پارلامەنتىنىڭ سەناتىندا «2023-2025 جىلدارعا ارنالعان رەسپۋبليكالىق بيۋدجەت تۋرالى», «قازاقستان رەسپۋبليكاسىنىڭ ۇلتتىق قورىنان 2023-2025 جىلدارعا ارنالعان كەپىلدەندىرىلگەن ترانسفەرت تۋرالى» جانە «رەسپۋبليكالىق جانە وبلىستىق بيۋدجەتتەر, رەسپۋبليكالىق ماڭىزى بار قالا, استانا بيۋدجەتتەرى اراسىنداعى 2023-2025 جىلدارعا ارنالعان جالپى سيپاتتاعى ترانسفەرتتەردىڭ كولەمى تۋرالى» زاڭ جوبالارىنىڭ تانىستىرىلىمى بولدى.
جيىن بارىسىندا قارجى ءمينيسترىنىڭ ورىنباسارى تاتيانا ساۆەلەۆا مەن ۇلتتىق ەكونوميكا ءمينيسترىنىڭ ورىنباسارى ازامات امرين بايانداما جاسادى.
قارجى ءمينيسترىنىڭ ورىنباسارى بيىلعى جىلى بيۋدجەت كودەكسىنە قابىلدانعان تۇزەتۋلەردى ەسكەرە وتىرىپ, ءۇش جىلدىق كەزەڭگە ارنالعان رەسپۋبليكالىق بيۋدجەت تۋرالى زاڭ جوباسى بويىنشا ماتەريالدار قۇرامىنا بيۋدجەت تاۋەكەلى مەن مەملەكەتتىك قارجىنىڭ ۇزاق مەرزىمدى تۇراقتىلىعى تۋرالى تالدامالىق ەسەپ العاش رەت ەنگىزىلگەنىن حابارلادى. سونداي-اق الەۋمەتتىك سالانى, ەكونوميكانىڭ ناقتى سەكتورىن جانە ەلىمىزدىڭ الەۋەتتى قۇرىلىمدارىن قارجىلاندىرۋدى كۇشەيتۋ دە جوسپارلانىپ وتىر.
ۇلتتىق ەكونوميكا ءمينيسترىنىڭ ورىنباسارى ۇلتتىق قوردىڭ جيناق فۋنكتسياسىن كۇشەيتۋدىڭ جاڭا تەتىگى مەن 2030 جىلعا قاراي ۆاليۋتالىق اكتيۆتەردى 100 ملرد اقش دوللارىنا دەيىن ۇلعايتۋ جولىمەن قىسقارتۋعا جول بەرمەۋ تۋرالى ايتىپ بەردى. وسىلايشا, 2023 جىلى رەسپۋبليكالىق بيۋدجەتكە كەپىلدەندىرىلگەن ترانسفەرتتىڭ مولشەرى 2,2 ترلن تەڭگە مولشەرىندە بەلگىلەندى, 2024 جىلعا قاراي 2 ترلن-عا دەيىن جانە 2025 جىلعا دەيىن 1,9 ترلن-عا دەيىن قىسقاراتىن بولادى.
جالپى سيپاتتاعى ترانسفەرتتەردىڭ كولەمى تۋرالى زاڭ جوباسىندا بيۋدجەتارالىق قاتىناستاردى جەتىلدىرۋ بويىنشا جەكەلەگەن تاسىلدەر ۇسىنىلدى. ولاردىڭ قاتارىندا وڭىرلەردىڭ دەربەستىگىن ارتتىرۋ, بيۋدجەتتەردىڭ كىرىس بازاسىن نىعايتۋ, بيۋدجەتتىك جوسپارلاۋدا بيۋروكراتتىقتان باس تارتۋ جانە باسقالار بار.
ۇلتتىق بانك وكىلى ەلىمىزدىڭ اقشا-نەسيە ساياساتى سالاسىنداعى احۋال تۋرالى ايتىپ بەردى. ال ەسەپ كوميتەتىنىڭ مۇشەسى تۇساۋكەسەر بارىسىندا «2023-2025 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنا كوميتەتتىڭ قورىتىندىسىن ۇسىندى.
زاڭ جوبالارى سەناتتا كوميتەتتىڭ جۇمىس توپتارى مەن وتىرىستارىندا تالقىلانىپ, كەيىننەن پالاتانىڭ قاراۋىنا ۇسىنىلادى.
