قارجى ورتالىعىنىڭ باسشىلىعى سەنات دەپۋتاتتارىنا احقو سوتىنىڭ, حالىقارالىق تورەلىك ورتالىعىنىڭ, قارجىلىق قىزمەتتەردى رەتتەۋ كوميتەتىنىڭ, ەكسپات-ورتالىقتىڭ جانە احقو بيزنەستى دامىتۋ توبىنىڭ جۇمىسى تۋرالى ايتىپ بەردى.
سونىمەن قاتار سەناتورلارعا ۇيىمنىڭ ەلگە ءىرى شەتەلدىك كاپيتالدى تارتۋ, ادامي الەۋەتتى جانە كرەاتيۆتى ەكونوميكانى دامىتۋ جونىندەگى نەگىزگى جوبالارى مەن باستامالارى, سونداي-اق, احقو يۋريسديكتسياسىن ودان ءارى دامىتۋ جونىندەگى ورتالىقتىڭ قىزمەتى تانىستىرىلدى.
ماۋلەن اشىمباەۆ ۇلتتىق ەكونوميكانى جانە حالىقارالىق ىنتىماقتاستىقتى دامىتۋدا قارجى ورتالىعىنىڭ ءرولى ماڭىزدى ەكەنىن اتاپ ءوتتى.
«استانا» حالىقارالىق قارجى ورتالىعى ءىرى ينۆەستيتسيالار مەن كومپانيالاردى جۇمىلدىرۋ, قارجى نارىعىن دامىتۋ جانە باسقا دا تەتىكتەر ارقىلى ۇلتتىق ەكونوميكانىڭ نەگىزگى درۆايۆەرلەرىنىڭ بىرىنە اينالىپ كەلەدى. بۇگىن بىرقاتار ماڭىزدى باستامالار تۋرالى ءسوز بولدى. ءبىز ولاردى بىرلەسىپ پىسىقتاۋعا, قاجەت بولسا, قارجى ورتالىعىنىڭ جۇمىسى مەن باستامالارىن زاڭنامالىق تۇرعىدان قامتاماسىز ەتۋگە دايىنبىز», دەگەن سەنات توراعاسى احقو-نىڭ ينۆەستيتسيالىق قىزمەتىنە جانە سالىق ماسەلەلەرىن رەتتەۋگە, سونداي-اق ءتيىستى زاڭنامانى جەتىلدىرۋ قاجەتتىلىگىنە نازار اۋداردى.
ءوز كەزەگىندە احقو باسقارۋشىسى قايرات كەلىمبەتوۆ ورتالىقتىڭ دامۋ ستراتەگياسىن ىسكە اسىرۋدىڭ ناتيجەلەرىنە توقتالدى. سونداي-اق ولاردى جۇزەگە اسىرۋ جونىندەگى الداعى جوسپارلار تۋرالى ايتىپ, پارلامەنتپەن ءوزارا ءىس-قيمىلدى ودان ءارى نىعايتۋ قاجەتتىگىن تىلگە تيەك ەتتى.
كەزدەسۋگە پارلامەنت سەناتىنىڭ ۆيتسە-سپيكەرى ولگا پەرەپەچينا, ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى داۋرەن ادىلبەكوۆ جانە قارجى جانە بيۋدجەت كوميتەتىنىڭ توراعاسى سەرىكباي ترۇموۆ قاتىستى.
