تىل ەڭبەككەرى بيسۇلۋ ۋاليەۆا بيىل 93 جاستا. اقسۋ اۋىلىنىڭ تۋماسى, قازىرگى تاڭدا نەمەرەسىنىڭ قولىندا تۇرادى. بيسۇلۋ اجەنىڭ بالالىق شاعى سوعىس جىلدارىنا تۇسپا-تۇس كەلگەندىكتەن وقۋشىلارعا سوعىس كەزىندەگى قيىن-قىستاۋ زاماندا قالاي ءومىر سۇرگەنىن, وتباسىن اسىراۋ ءۇشىن ءبىر ۋىس بيدايدى كومىر استىنا تىعىپ ءجۇرىپ اكەلەتىنىن ايتىپ بەردى. وسى قيىندىقتارعا قاراماستان, بيسۇلۋ اجە بۇگىنگى توقساننىڭ تورىندەگى جاسقا جەتكەن.
«ەلىمىز تىنىش بولسىن. مەنىڭ ومىرىمدە بولعان قيىندىقتاردى جاس ۇرپاق كورمەسە ەكەن دەپ تىلەيمىن. تاۋەلسىزدىگىمىز ماڭگىلىك بولسىن!» دەپ وقۋشىلارعا اق باتاسىن بەردى قاريا.
جالعىزباستى زەينەتكەر ءبيبىنۇر يبرايموۆاعا زياتكەر ەرىكتىلەردىڭ ىقىلاسى قاتتى اسەر ەتتى. ءبيبىنۇر اجە – 72 جاستا, پەداگوگيكا سالاسىنىڭ ارداگەرى. قازمۋ-ءدى بىتىرگەن, وبلىستىق مۇعالىمدەردى جەتىلدىرۋ ينستيتۋتىندا قازاق ءتىلى مەن ادەبيەتى كابينەتىنىڭ مەڭگەرۋشىسى بولىپ جۇمىس ىستەگەن. سونىمەن قاتار قالالىق ءبىلىم بولىمىندە كينوتەكانىڭ ديرەكتورى بولىپ قىزمەت اتقارعان.
«اعا ۇرپاققا مەيىرىمدىلىك وتە قاجەت. اتا-اپالار ءبىزدى ەڭبەكسۇيگىشتىككە, وتباسىنا, وتانعا ادال بولۋعا تاربيەلەيدى. بىراق, وكىنىشكە قاراي, ءبىز كەيدە ەگدە ادامدار ءۇشىن مەملەكەت تاراپىنان قولداۋ عانا ەمەس, قاراپايىم كوڭىل ءبولۋ دە ماڭىزدى ەكەنىن ۇمىتىپ كەتەمىز», دەيدى NIS وقۋشىلارى.
وقۋشىلار زەينەتكەر ءلاززات اجەنىڭ ۇيىنە دە كىرىپ شىقتى. ولار وسى ءىس-شارا اياسىندا ءبىر جاعىنان قايىرىمدىلىق جاساعاندارىنا قۋانعانىمەن, ەكىنشى جاعىنان زەينەتكەرلەردىڭ قانداي جاعدايدا ءومىر ءسۇرىپ جاتقانىنا الاڭداۋشىلىق تانىتتى. ومىرىندەگى قيىن جاعدايعا بايلانىستى ءلاززات اجە باسپاناسىز قالعان. بىراق اۋىل اكىمدىگىنىڭ كومەگىمەن كوكتال اۋىلىنان جاڭا ءۇي سالۋعا جەر تەلىمى بەرىلگەن. قازىرگى ۋاقىتتا تۇرعىنداردىڭ كۇشىمەن ىرگەتاسى كوتەرىلىپتى.
نازارباەۆ زياتكەرلىك مەكتەبىنىڭ وقۋشىلارى مەن اتا-انالارى جىل سايىن ارداگەرلەرگە, قاريالارعا كومەك قولىن سوزادى.
جەتىسۋ وبلىسى
