جىلۋ ورتالىعىنان تارتىلاتىن تراسسانىڭ ۇزىندىعى – 22 شاقىرىم. جوباعا 22,7 ملرد تەڭگە بولىنگەن. بۇگىندە اتالعان قارجىعا شاقتالعان جۇمىس تولىق اتقارىلدى. الداعى ۋاقىتتا تاعى قاراجات بەرۋ جوسپاردا تۇر. بىلتىر – 8, بيىل 6 شاقىرىمى توسەلدى. 4 سورعى ستانساسىنىڭ 3 ستانساسى سالىنىپ ءبىتتى. قاراجات ۋاقتىلى بولىنسە, جەرگىلىكتى بيلىك وكىلدەرى 1,5 جىل ىشىندە جوبانىڭ ءساتتى اياقتالارىنا سەنىمدى.
قاراعاندى وبلىسىنا كەلگەن ساپارىندا پرەزيدەنت قاسىم-جومارت توقاەۆتىڭ دا نازارىنان قالانىڭ جىلۋ جۇيەسى قالىس قالماعان-تىن. پرەزيدەنت قاراعاندىنىڭ قارقىندى دامۋىن ەسكە سالىپ, قالانى ودان ءارى وركەندەتۋ ءۇشىن قوسىمشا جىلۋ كوزدەرى كەرەكتىگىن ايتقان ەدى. وسى رەتتە ۇكىمەتكە قاراعاندى قالاسىنىڭ ءۇشىنشى جىلۋ جەلىسىنىڭ قۇرىلىسىنا قاجەتتى قاراجاتتى شۇعىل ءبولۋدى مىندەتتەگەن بولاتىن.
قاراعاندى قالاسىنىڭ بۇرىنعى جىلۋ بەرەتىن جەلىلەرىنىڭ شاماسى قازىرگى قۇرىلىسقا توتەپ بەرە المايدى. جاڭا ماگيسترال ىسكە قوسىلعاندا ودان جەتەتىن جىلۋدىڭ قۋاتى ساعاتىنا 523 گيگاكالوريانى قۇرايدى. سۋ جاڭا جىلۋ ماگيسترالى شاھاردىڭ وڭتۇستىك-شىعىس بولىگىن قامتاماسىز ەتەدى.
– جوبا 2020 جىلى باستالدى. قازىرگى ۋاقىتتا 3-جەو-دان №1 سورعى ستانساسىنا جەلى تارتىلدى. جەلى – ەكى قاتار. №1 سورعى ستانساسىنىڭ دايىندىعى – 90 پايىز. №2 سورعى ستانساسى – 60 پايىز, №3 سورعى ستانساسى – 90 پايىزعا ءازىر. №4 سورعى ستانساسى سالىنىپ جاتىر. بۇگىندە رەسپۋبليكا داڭعىلىنان باستاپ, تاتتىمبەت كوشەسىنە دەيىن جەلى توسەلدى. سەبەبى وزدەرىڭىزگە ءمالىم, قالانىڭ بۇل بولىگىندە قۇرىلىس قارقىندى, – دەيدى قالالىق قۇرىلىس ءبولىمىنىڭ باسشىسى مۇرات كاماليەۆ.
ماگيسترال قۇرىلىسىندا باس مەردىگەر – «نس سيستەما» جشس-ءى. كومپانيانىڭ اتقارۋشى ديرەكتورى قانات بوتباەۆ اتقارعان جۇمىستارىنا 5 جىل كەپىلدىك بەرىلەتىنىن جەتكىزدى. 20 جىلدان بەرى ينجەنەرلىك جەلى سالاسىنداعى كومپانيا كوپتەگەن جوباعا قاتىسقان. بۇعان دەيىن وڭتۇستىك-شىعىستى جىلۋمەن قامتيتىن م-10 تراسساسىن كەڭەيتۋگە, م-3, م-5 جىلۋ جەلىسىن رەكونسترۋكتسيالاۋعا دا ۇلەس قوستى.
– جوبانى ىسكە اسىرۋدا ەشقانداي پروبلەما جوق. بارلىعى كەستەگە جانە قارجىلاندىرۋعا سايكەس جۇزەگە اسىپ كەلەدى. جۇمىستىڭ 70 پايىزى اياقتالدى. رەسەيلىك جانە وتاندىق قۇبىرلار توسەلدى. جوبانىڭ اياقتالۋى قارجىلاندىرۋعا تىكەلەي بايلانىستى, – دەيدى قانات بوتباەۆ.
جوبا بويىنشا 40 شاقىرىم قۇبىر توسەلەدى. 4 سورعى ستانساسىمەن بىرگە 3 پاۆيلون قاراستىرىلعان. سورعى ستانساسىنىڭ نەگىزى مىندەتى – قاجەتتى قىسىم الۋ ءۇشىن سۋ جىبەرۋ.
«قاراعاندى-تەپلوترانزيت» جشس باس ينجەنەرى يۆان ۆىتكيننىڭ مالىمدەۋىنشە, ءۇشىنشى جىلۋ جەتكىزۋ ماگيسترالىنىڭ قۇرىلىسى شەشىمىن تابۋعا سۇرانىپ تۇرعان ماسەلە. بۇعان سەبەپ – جوعارىدا اتاپ وتكەنىمىزدەي, قارقىندى قۇرىلىس.
– قازىرگى ۋاقىتتا جىلۋمەن جابدىقتاۋدا پروبلەما جوق. الايدا جاڭا ۇيلەر مەن عيماراتتاردىڭ قولدانىسقا بەرىلۋى الداعى ۋاقىتتا جىلۋعا تاپشىلىق تۋدىرادى. جاڭادان سالىنىپ جاتقان جىلۋ ماگيسترالى سونىڭ الدىن الادى. سونىمەن قاتار جىلۋ جۇيەسىنىڭ جەتكىزىلۋىنە سەنىمدى كۇشەيتەدى. جوبادا ماگيسترالدىڭ قازىرگى قولدانىستاعى م-3, م-5, م-10 ماگيسترالىمەن بايلانىسى قاراستىرىلعان. ياعني جەلىدە قانداي دا ءبىر قيىندىقتار ورىن السا, بۇل قۇبىرلاردى جىلۋ بەرۋگە قوسا الامىز, – دەيدى يۆان ۆىتكين.
قاراعاندى جىلۋ جۇيەسىنىڭ 70 پايىزدان استامى توزعان. سوندىقتان دا جاڭا جەلىلەردىڭ ءبىر-بىرىمەن بايلانىسى جىلۋ جۇيەسىندە ورىن الۋى مۇمكىن قيىندىقتاردى ەڭسەرۋگە ىقپال ەتپەك. ال جاڭا جىلۋ ماگيسترالىنىڭ قۋاتى ءدال وسىنداي كولەمدەگى ءبىر شاعىن اۋداندى جىلىتۋعا جەتەدى.
قاراعاندى
