قازاقستان تاراپىنان اتالعان ءىس-شاراعا قازاقستاننىڭ كۋباداعى ەلشىسى اندريان ەلەمەسوۆ, قر ءسىم امەريكا دەپارتامەنتىنىڭ ديرەكتورى نۇرعالي ارىستانوۆ, قازاقستان سىرتقى ساۋدا پالاتاسى توراعاسىنىڭ كەڭەسشىسى رۋستام تاجەنوۆ جانە ۇلتتىق كومپانيالاردىڭ وكىلدەرى قاتىستى. كۋبا تاراپىنان وسى ەلدىڭ قازاقستانداعى ەلشىسى وسكار سانتانا لەون, ساۋدا پالاتاسىنىڭ ۆيتسە-پرەزيدەنتى رۋبەن راموس, بيوتەحنولوگيالىق جانە فارماتسەۆتيكالىق, سونداي-اق تۋريستىك كومپانيالاردىڭ وكىلدەرى قاتىستى.
قاتىسۋشىلار بيوفارماتسەۆتيكا جانە مەديتسينا سالاسىنداعى, اتاپ ايتقاندا, الەمدە تانىمال كۋبالىق «بيوكۋبافارما» كومپانياسىمەن, سونداي-اق تۋريزم اياسىنداعى ىنتىماقتاستىقتىڭ الەۋەتتى باعىتتارىن تالقىلادى.
قازاقستاندىق تاراپ كۋبامەن تۋريستىك سالادا ءوزارا ىنتىماقتاستىق ورناتۋعا قىزىعۋشىلىق بىلدىرۋدە. وسىعان وراي, قازاقستان مەن كۋبانىڭ تۋريستىك اگەنتتىكتەرى اراسىندا تىكەلەي بايلانىس ورناتىلادى.
