كۇن تارتىبىندەگى ماسەلە بويىنشا ورتسايلاۋكوم مۇشەسى شاۆقات وتەمىسوۆ بايانداما جاسادى. ول 2022 جىلدىڭ 4 قازانىندا ورتالىق سايلاۋ كوميسسياسىنا «امانات» قازاقستاننىڭ كاسىپوداقتار ىنتىماقتاستىعى» رەسپۋبليكالىق كاسىپوداقتار بىرلەستىگى م.ز. قاجىكەندى قازاقستان رەسپۋبليكاسىنىڭ پرەزيدەنتتىگىنە كانديدات ەتىپ ۇسىنۋ تۋرالى قۇجاتتاردى ۇسىنعانىن حابارلادى. ورتالىق سايلاۋ كوميسسياسىنا كانديداتتى تىركەۋ ءۇشىن مىناداي قۇجاتتار ۇسىنىلدى:
- پرەزيدەنتتىككە كانديدات م.ز.قاجىكەننىڭ جانە ونىڭ زايىبىنىڭ اكتيۆتەر مەن مىندەتتەمەلەر جونىندە دەكلاراتسيا تاپسىرعانى تۋرالى مەملەكەتتىك كىرىستەر ورگانىنىڭ انىقتاماسى;
- پرەزيدەنتتىككە كانديدات م.ز. قاجىكەننىڭ ونى تىركەۋگە كەدەرگى كەلتىرەتىن اۋرۋلاردىڭ جوقتىعى تۋرالى مەديتسينالىق قورىتىندىسى;
- وبلىستاردىڭ, رەسپۋبليكالىق ماڭىزى بار قالالاردىڭ جانە رەسپۋبليكا استاناسىنىڭ اۋماقتىق سايلاۋ كوميسسيالارىنىڭ پرەزيدەنتتىككە كانديدات م.ز. قاجىكەندى قولداپ جينالعان ازاماتتاردىڭ قولدارىن تەكسەرۋ ناتيجەلەرى تۋرالى حاتتامالارى.
وسى حاتتامالارعا سايكەس پرەزيدەنتتىككە كانديدات م.ز. قاجىكەننىڭ قولداۋىنا قازاقستاننىڭ 14 وڭىرىندەگى 122 184 ازاماتتىڭ قولى جينالدى. تەكسەرۋ ناتيجەسىندە 120 055 قولدىڭ دۇرىستىعى انىقتالدى, ياعني قاجەتتى سانى, كەمىندە 1% نەمەسە 118 273 قامتاماسىز ەتىلدى.
م.ز. قاجىكەندى پرەزيدەنتتىككە كانديدات رەتىندە تىركەۋگە قاجەتتى بارلىق قۇجاتتار ورتالىق سايلاۋ كوميسسياسىنا ۇسىنىلدى جانە ولارعا قويىلاتىن تالاپتارعا تولىق سايكەس كەلەدى.
قر وسك قاۋلىسىمەن مەيرام زەكەش ۇلى قاجىكەن 2022 جىلعى 20 قاراشاعا تاعايىندالعان قازاقستان رەسپۋبليكاسىنىڭ پرەزيدەنتىنىڭ كەزەكتەن تىس سايلاۋىندا قازاقستان رەسپۋبليكاسىنىڭ پرەزيدەنتتىگىنە كانديدات بولىپ تىركەلدى, وعان ءتيىستى كۋالىك بەرىلدى.
ورتالىق سايلاۋ كوميسسياسى وتىرىسىنىڭ قورىتىندىسى بويىنشا بۇقارالىق اقپارات قۇرالدارى وكىلدەرىنىڭ قاتىسۋىمەن م.ز. قاجىكەننىڭ بريفينگى ءوتتى.
