مەملەكەت باسشىسى تۇرىكمەنستان پرەزيدەنتىنە ءىلتيپات ءبىلدىرىپ, ەكى ەلدىڭ حالقىن تاريحي جانە تۋىستىق قاتىناستار بايلانىستىراتىنىن اتاپ ءوتىپ, قازاق-تۇرىكمەن ىنتىماقتاستىعىن ودان ءارى دامىتۋ ءۇشىن مۇنىڭ ءمانى زور ەكەنىن جەتكىزدى.
– تۇرىكمەنستان – قازاقستان ءۇشىن باۋىرلاس مەملەكەت. ءبىزدىڭ تاريحىمىز بەن شەكارامىز ورتاق. ءبىزدى مادەني-گۋمانيتارلىق سالالار جانە ەكونوميكالىق مۇددە سەكىلدى كوپ باعىتتار بايلانىستىرادى, – دەدى پرەزيدەنت.
قاسىم-جومارت توقاەۆ پەن سەردار بەردىمۇحامەدوۆ قازاقستان مەن تۇرىكمەنستان اراسىنداعى ىنتىماقتاستىقتى دامىتۋ پەرسپەكتيۆالارىن تالقىلادى. ساۋدا-ەكونوميكالىق قارىم-قاتىناستاردى كەڭەيتۋگە, سونىڭ ىشىندە ەنەرگەتيكا, كولىك جانە لوگيستيكا, ونەركاسىپ, اۋىل شارۋاشىلىعى سالالارىنا ەرەكشە نازار اۋدارىلدى.
سەردار بەردىمۇحامەدوۆ قاسىم-جومارت توقاەۆقا ەلىمىزگە ساپارمەن كەلۋگە شاقىرعانى جانە قازاق جەرىندە قوناقجايلىق كورسەتكەنى ءۇشىن العىس ايتتى.
– بۇل – مەنىڭ قازاقستان رەسپۋبليكاسىنا العاشقى مەملەكەتتىك ساپارىم. ءبىز بۇل ساپاردى ەلدەرىمىزدىڭ اراسىنداعى ەكىجاقتى بايلانىستاردى دامىتۋدىڭ ماڭىزدى كەزەڭى رەتىندە قاراستىرامىز, – دەدى تۇرىكمەنستان پرەزيدەنتى.
سونداي-اق ول بيىل ديپلوماتيالىق قاتىناستاردىڭ ورناعانىنا 30 جىل تولعانىن اتاپ ءوتتى.
– وسى جىلداردا ەكى ەل اراسىنداعى قاتىناستار كەڭ اۋقىمدى باعىتتار بويىنشا تابىستى دامىدى. وسى مۇمكىندىكتى پايدالانا وتىرىپ, ءسىزدى اتالعان ماڭىزدى داتامەن قۇتتىقتاعىم كەلەدى, – دەدى سەردار بەردىمۇحامەدوۆ.
تۇرىكمەنستان پرەزيدەنتى قاسىم-جومارت توقاەۆقا تۇرىكمەنستاننىڭ ميللي گەنگەشى حالك ماسلاحاتىنىڭ توراعاسى گۋربانگۋلى بەردىمۇحامەدوۆتىڭ سالەمى مەن ىزگى تىلەگىن جەتكىزدى.
