مەملەكەت باسشىسى بۇگىنگى ءىس-شارا تمد ەلدەرىنىڭ COVID-19 پاندەمياسىنان كەيىنگى العاشقى تولىققاندى ءسامميتى ەكەنىن اتاپ ءوتتى.
- شاعىن قۇرامدا ءبىز ىنتىماقتاستىعىمىزدى ودان ءارى نىعايتۋدىڭ وزەكتى ماسەلەلەرى جونىندە جان-جاقتى پىكىر الماستىق, تاۋەلسىز مەملەكەتتەر دوستاستىعىن دامىتۋدىڭ نەگىزگى باسىمدىقتارىن ايقىندادىق. بۇل COVID-19-دان كەيىنگى تمد-نىڭ وفلاين فورماتتاعى العاشقى تولىققاندى ءسامميتى ەكەنىن اتاپ وتكىم كەلەدى. جالپى, استانامىزدا قايتا باس قوسۋىمىز قۋانىشتى جايت, - دەدى قاسىم-جومارت توقاەۆ.
مەملەكەتتەر باسشىلارى بىردەن رەسمي قۇجاتتارعا قول قويۋ راسىمىنە كوشۋگە كەلىستى.
- قاجەتتى قۇجاتتارعا قول قويىلىپ جاتقاندا ءبىز تمد اتقارۋشى حاتشىسى لاۋازىمىن تمد باس حاتشىسى لاۋازىمىنا وزگەرتۋ تۋرالى ماسەلەنى شاعىن فورماتتا تالقىلاعانىمىزدى جاريالاعىم كەلەدى. اتالعان ماسەلەگە قاتىستى مەن وسىنداي ۇسىنىس جاسادىم. سەبەبى كەشە ءبىز اوسشك اتقارۋشى حاتشىسى لاۋازىمىن باس حاتشى لاۋازىمىنا وزگەرتۋ تۋرالى شەشىم قابىلدادىق. بۇعان دەيىن شىۇ-نىڭ اتقارۋشى حاتشىسى دا باس حاتشى لاۋازىمىنا وزگەرتىلدى. نەگىزىندە, بۇل اتقارۋشى ورگان لاۋازىمىنىڭ مارتەبەسىن ارتتىرۋ ءۇشىن ماڭىزدى, - دەدى پرەزيدەنت.
پرەزيدەنت ءسوزىن قورىتىندىلاي كەلە, وتكىزىلگەن ءسامميتتىڭ ناتيجەلى بولعانىن ايتتى.
– قۇجاتتارعا قول قويۋ ءراسىمى اياقتالدى. وسىلايشا, ءبىزدىڭ وتىرىسىمىز ناتيجەلى بولدى دەپ ايتۋعا تولىق نەگىز بار. سونىمەن قاتار قۇجاتتاردى قابىلداۋدان بولەك دەلەگاتسيا باسشىلارى, مەنىڭ ويىمشا, تمد شەڭبەرىندەگى كوپجوسپارلى ءوزارا ءىس-ارەكەتتىڭ كەڭ اۋقىمى جانە حالىقارالىق كۇن ءتارتىبى جونىندە وتە پايدالى پىكىرتالاس وتكىزدى. وسى رەتتە ايتىلعان ماڭىزدى ۇسىنىستار مەن قارالعان قۇجاتتار تمد كەڭىستىگىندەگى ىنتىماقتاستىقتى ودان ءارى دامىتۋعا جانە جەتىلدىرۋگە باعىتتالادى. بۇل ورتاق ماقساتىمىزعا ساي كەلەدى. ءسوز سوڭىندا تمد اتقارۋ كوميتەتىنىڭ قىزمەتكەرلەرىنە, ءبىزدىڭ ساراپشىلارعا, مەملەكەتتەر باسشىلارى كەڭەسىنىڭ وتىرىسىن دايىنداۋعا جانە وتكىزۋگە تىكەلەي اتسالىسقان دوستاستىقتىڭ بارلىق ورگانىنا ريزاشىلىعىمدى بىلدىرەمىن, – دەدى قاسىم-جومارت توقاەۆ.
سونىمەن قاتار جيىندا تمد باس حاتشىسى سەرگەي لەبەدەۆ, رەسەي فەدەرالدىق جينالىسى فەدەراتسيا كەڭەسىنىڭ ءتورايىمى ۆالەنتينا ماتۆيەنكو ءسوز سويلەدى. تمد مەملەكەتتەرى باسشىلارى كەڭەسىنىڭ توراعاسى, قازاقستان پرەزيدەنتى قاسىم-جومارت توقاەۆ تاۋەلسىز مەملەكەتتەر دوستاستىعىنىڭ گراموتاسىن مەملەكەتارالىق «مير» تەلەراديوكومپانياسىنىڭ توراعاسى راديك باتىرشينگە تابىس ەتتى.
كەزدەسۋ سوڭىندا تمد-عا مۇشە مەملەكەتتەر باسشىلارى مادەنيەت سالاسىنداعى ىنتىماقتاستىقتى دامىتۋ تۋرالى مالىمدەمەگە قول قويدى. سونداي-اق دوستاستىقتى ودان ءارى دامىتۋعا باعىتتالعان بىرقاتار قۇجات قابىلداندى.
