ارناۋلى كۇننىڭ ماقساتى – ادامداردى تىنىس الۋ اعزالارىن ۇنەمى تەكسەرتىپ وتىرۋعا ۇندەۋ. ناتيجەسىندە مۇنداي باستاما وكپەدە بولاتىن دەرتتەردى دەر كەزىندە انىقتاپ, ەم-دوم تاعايىنداۋعا, ونىڭ ىشىندە سوزىلمالى وبسترۋكتيۆتى وكپە اۋرۋىن ء(سووا) اسقىندىرماي دياگنوستيكالاۋعا ىقپال ەتەدى.
ماماندار وكپە تەكسەرتىپ وتىرۋ – اسىرەسە, كاسىبى زياندى زاتتاردى جۇتۋعا تۋرا كەلەتىن ادامدار مەن تەمەكى شەگەتىندەرگە قاجەت ەكەنىن ايتادى.
ال سپيرومەتريا وكپە كولەمىن جانە تىنىس الۋ جىلدامدىعىن ولشەيتىن, وكپە دەنساۋلىعىن باعالاۋ ءادىسى. بۇل تىنىس الۋدىڭ بارلىق نەگىزگى كورسەتكىشتەرىن ەسەپتەپ, تىنىس الۋ پروتسەسىن كورۋگە مۇمكىندىك بەرەدى.
اتاۋلى كۇنگە وراي, كارديولوگيا جانە ىشكى اۋرۋلار عزي رەسپۋبليكالىق اللەرگولوگيا ورتالىعىنىڭ باسشىسى, اللەرگولوگ-يممۋنولوگ دارىگەر اراي باتىرباەۆا: «تىنىس الۋ اۋىرلاپ, جوتەل, جالپى السىزدىك سياقتى رەسپيراتورلىق اۋرۋ بەلگىلەرى بايقالسا سپيرومەتريادان ءوتۋ كەرەك. جانە بۇل سىرتقى تىنىس الۋ فۋنكتسياسىن, برونح دەمىكپەسىن زەرتتەۋ, دياگنوستيكالاۋ, تىنىس الۋ ورگاندارىنىڭ اۋرۋلارى كەزىندەگى ادامنىڭ تىنىس الۋ جۇيەسىنىڭ جاي-كۇيىن باعالاۋ ءۇشىن قاجەت. سونىمەن قاتار وكپەدەن اۋا اعىنىنىڭ قوزعالىسىنىڭ تۇراقتى بۇزىلۋىمەن سيپاتتالاتىن سوزىلمالى وبسترۋكتيۆتى وكپە اۋرۋىنىڭ ء(سووا) دياگنوستيكاسى ءۇشىن دە سپيرومەتريادان ءوتىپ تۇرۋ كەرەك», دەيدى.
ءسووا انىقتالۋى قيىن, ومىرگە قاۋىپ توندىرەتىن اۋرۋ. ول قالىپتى تىنىس الۋعا كەدەرگى كەلتىرەدى جانە ونى ەنتىگۋ, تىنىس الۋدىڭ قيىنداۋى, جوتەل ارقىلى بىلۋگە بولادى. ناتيجەسىندە اعزا سوزىلمالى وتتەگى جەتىسپەۋشىلىگىنەن زارداپ شەگەدى, بۇل بارلىق مەتابوليكالىق ۇدەرىستەرگە تەرىس اسەر ەتەدى جانە كوبىنەسە مۇگەدەكتىككە اكەلۋى مۇمكىن.
ءسووا بەلگىلەرى باسىندا بايقالمايتىندىقتان, اسقىنعان كەزدە ءبىر-اق ءبىلىنۋى مۇمكىن. بۇل كەسەلدىڭ ەڭ كوپ تارالعان باستى سەبەبىنىڭ ءبىرى – تەمەكى تارتۋ, بىراق شىلىمقورلاردىڭ كوبى وزدەرىن سىرقاتپىز دەپ ويلامايدى.
ءسووا دياگنوستيكاسى تىنىس الۋدىڭ كولەمدىك جانە جىلدامدىق كورسەتكىشتەرىن ولشەۋ ارقىلى جۇرگىزىلەدى. بۇل ءادىس وتە قاراپايىم, ارزان, ءدال جانە مۇلدەم اۋىرتپايدى.
ال وكپە – ادام اعزاسىنداعى ەڭ ماڭىزدى ورگانداردىڭ ءبىرى بولعاندىقتان, ونىڭ قىزمەتى قانداي ماڭىزدى ەكەندىگىن ءتۇسىندىرىپ وتىرۋدىڭ ءوزى ارتىق.
