ادەبي كەشكە پاۆلودار وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسى باسشىسىنىڭ مىندەتىن اتقارۋشى مەدەت تاۋاسقان, قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى, اقىن اقبەرەن ەلگەزەك, قازاقستان جازۋشىلار وداعىنىڭ حاتشىسى, استانا قالالىق فيليالىنىڭ ديرەكتورى, اقىن داۋلەتكەرەي كاپ ۇلى جانە ەرتىس-بايان ءوڭىرىنىڭ قالامگەرلەر قاۋىمى قاتىستى.
جينالعاندار مادەني جيىننىڭ ماڭىزدىلىعى, ۇلت كەلەشەگى مەن ادەبيەت بولاشاعىنا تيگىزەر اسەرى جايلى وي ءبولىستى. مەدەت تاۋاسقان اتالعان كەش ۇلت ۇستازىنىڭ مەرەيتويىنا ارنالعان ءىس-شارالاردىڭ قورىتىندىسى رەتىندە ۇيىمداستىرىلعانىن ايتا كەلە, اقىن-جازۋشىلاردىڭ قالامىنان تۋعان شىعارمالار – وقىرماننىڭ يگىلىگىنە اينالاتىن رۋحاني قازىنالار ەكەنىن اتاپ ءوتتى.
«ەرتىسكە تامعان ءسوز نۇرى» ادەبي كەشىندە ەرتىس-بايان ءوڭىرىنىڭ قالامگەرلەرى ادەبيەتتى دامىتۋعا قوسقان ۇلەسى ءۇشىن ادەبي سىيلىقپەن ماراپاتتالدى. ولاردىڭ قاتارىندا اۋدارماشى سەرىك ساتىبالدين, مادەنيەت قايراتكەرى مەيرام نۇعىمان, ءماشھۇر ءجۇسىپ ولەڭدەرىن ورىس تىلىنە ءتارجىمالاۋشى قانات قاناپيانوۆ, اقىن, ساتيريك الپىسباي حونج, اقىن, اۋدارماشى ايبەك ورالحان جانە التىنبەك مۇقىشەۆ, الماس اقتاسوۆ, باقبەرگەن داريعا ۇلى, نۇربەك كەڭەسباي, ەلميرا ابەتجانوۆا, ايتىسكەر اقىن بوكەن جىگەر بار.
سونىمەن بىرگە وبلىسىمىزدىڭ ءتىل جاناشىرلارىنا عىلىم جانە جوعارى ءبىلىم مينيسترلىگى ءتىل ساياساتى كوميتەتى توراعاسىنىڭ قۇرمەت گراموتاسى مەن العىسحاتى تاپسىرىلدى.
بيىل وڭىرىمىزگە بەلگىلى جەتى قالامگەر شولپان بايعالى, عابيت ساپاروۆ, اسىعات تۇرعانبەكوۆ, امانتاي تويشىباي ۇلى, جاسسەرىك سادۋاقاسوۆ, ەربول قايىروۆ, راۋزا مۇساباەۆا قازاقستان جازۋشىلار وداعى مۇشەلەرىنىڭ قاتارىن تولىقتىردى. قالامگەرلەرگە مۇشەلىك كۋالىكتى قۇرمەتتى قوناقتار تابىستادى. اقبەرەن ەلگەزەك ءسوزىن ەرتىس-بايان وڭىرىنە كوڭىل ايتۋدان باستادى. جاقىندا ومىردەن وتكەن الاشتىڭ ايتۋلى اقىنى ارمان قاني تۋرالى تەبىرەنە سويلەدى.
– ارمان قاني – ازاماتتىق ۇستانىمىنا بەرىك, قالامىن ساتپاعان, ءوزىنىڭ ومىرلىك قاعيدالارىنا ادال بولعان قازاقتىڭ قايسار اقىنى ەدى. ارمان اعا ءومىرىنىڭ سوڭىنا دەيىن شىعارماشىلىعىن ءبىر مىسقال دا تومەندەتكەن جوق, – دەدى.
ايتىپ وتەيىك, «نايزاتاس» ادەبي-كوركەم, قوعامدىق-ساياسي جۋرنالى 2012 جىلدىڭ ءساۋىر ايىنان پاۆلودار قالاسىندا جارىق كورە باستادى. وسى ۋاقىتقا دەيىن قاناتىن كەڭگە جايىپ, رەسپۋبليكا اۋماعىنا تانىلدى. جۋرنالدىڭ وزگە وڭىرلىك ءارى رەسپۋبليكالىق باسىلىمداردان ەرەكشەلىگى – كوزتارتار ەرەكشە بەزەندىرىلۋى مەن باسىپ شىعارىلاتىن قاعازىندا. مۇقابادان باستاپ, تولىق ىشكى بەتتەرى ساپالى قاعازدا, ءتۇرلى ءتۇستى ەتىپ باسىلادى. جۋرنالدا تۇراقتى ايدارلاردان بولەك, رەداكتسيا جانىنان قۇرىلعان ء«مولدىر مۋزا» جاستار شىعارماشىلىعى كلۋبىنىڭ ۇيىمداستىرۋمەن وتەتىن سۇحباتتار, اۆتورلار شىعارمالارىنا تالداۋلار, توپتامالار تۇراقتى جاريالانىپ كەلەدى.
جۋرنالدىڭ العاشقى باس رەداكتورى ارداگەر جۋرناليست عالىمبەك جۇماتوۆ. قازىرگى كۇنى بۇل ابىرويلى مىندەتتى اقپارات سالاسىنىڭ ۇزدىگى اسىل ابىشەۆ قولىنا العان. ادەبي جۋرنال «ەرتىس مەديا» حولدينگىنىڭ قۇرامىنا كىرەدى.
كەشتە كەلۋشىلەر نازارىنا بۇقار جىراۋ اتىنداعى ادەبيەت جانە ونەر مۋزەيى مەن س.تورايعىروۆ اتىنداعى وبلىستىق كىتاپحانا ۇيىمداستىرعان جەرلەس قالامگەرلەر مەن «نايزاتاس» جۋرنالىنىڭ 10 جىلدىعىنا ارنالعان ادەبي كورمەنى تاماشالادى. جيىن ەرتىس-بايان ءوڭىرى ونەرپازدارىنىڭ ءان شاشۋىمەن تۇيىندەلدى.
پاۆلودار
