ءىشى وتە جايلى وقىرمان زالىنىڭ كوڭىلدىڭ حوشىن اشاتىن قاسيەتى بار. مۇندا كوبىنە مەرزىمدى باسىلىمدار مەن سيرەك كىتاپتاردى تۇراقتى وقىپ تۇراتىندار, زەرتتەۋ جۇمىستارىمەن اينالىساتىن وقىتۋشىلار مەن ستۋدەنتتەر, وقۋشىلار كەلەتىنى بايقالادى. جان سارايىن اشاتىن كىتاپحاناداعى سوڭعى جاڭاشىلدىقتاردىڭ ەنۋىنە وقىرمان زالىنىڭ باسشىسى ساۋلە جانقارينوۆانىڭ سىڭىرگەن ەڭبەگى زور. مامان سوناۋ 1990 جىلدان بەرى مەكەمەدە قىزمەت ەتەتىنىن بىلدىك.
جالپى, وبلىستىق كىتاپحانادا بۇگىندە 400 مىڭ كىتاپ قورى بار بولسا, سونىڭ 80 مىڭدايى وقىرمان زالىندا ورنالاسقان. «اشىق كىتاپحانا» قاعيداسىن نەگىزگە العان مادەني مەكەمە بارلىق گازەت-جۋرنال مەن كىتاپتىڭ كەلۋشىلەر ءۇشىن قولجەتىمدى بولعانىن قامتاماسىز ەتۋگە كۇش سالادى ەكەن.
– وسىدان ون شاقتى جىل بۇرىن بۇل زالدا كوپشىلىك قاجەت كىتابىن نەمەسە مەرزىمدى باسىلىمداردى بىزدەن سۇراپ الىپ وقيتىن. قازىر كەز كەلگەن ادام زالدا ورنالاسقان سورەلەردەن قاجەتىن تابادى. ەگەر ىزدەگەنى ءبىزدىڭ زالدا بولماسا, قىزمەتكەرلەرىمىز وزگە بولىمدەردەن لەزدە اكەلىپ بەرەدى. زالعا جايلى ۇستەلدەر مەن ورىندىقتار قويىلعان. كەلۋشىلەردىڭ ءبىر-بىرىنە بوگەت جاساماۋ جاعى مۇقيات ويلاستىرىلعان. التى مامان قىزمەت كورسەتەمىز, ايسۇلۋ بالعاباەۆا 30, گۇلجان بۇلانباەۆا 20, ءماريا مىرزاقانوۆا 10 جىلدان استام قىزمەت اتقارىپ كەلەدى. ءبىر جاڭادان كەلگەن جاس كادرىمىز بار, وزگەلەرىنىڭ تاجىريبەسى قالىپتاسىپ قالعان, – دەيدى ساۋلە اسىلبەكقىزى.
وقىرماندار كوبىنە ءتىل ءبىلىمى, قازاق ءتىلى مەن ادەبيەتىنە قاتىستى, پوەزيا كىتاپتارىن سۇرايدى ەكەن. اپتاسىنا ءبىر-ەكى مارتە باس سۇعىپ, اباي, شاكارىم, دوستوەۆسكي ولەڭدەرىن وقىپ تۇراتىن وقۋشىلاردىڭ قاتارى دا از ەمەس كورىنەدى. ءجيى سۇرالاتىن كىتاپتار ىشىندە ءماشھۇر ءجۇسىپتىڭ كوپتومدىقتارى, مۇزافار الىمباەۆتىڭ ولەڭدەر جيناعى بار. جاڭا زاماندا شىعىپ جاتقان كىتاپتاردان گورى كەڭەستىك كەزەڭدە جازىلعان كلاسسيكالار – ءازىلحان نۇرشايىقوۆتىڭ «ماحاببات قىزىق مول جىلدار», ءابدىجامىل نۇرپەيىسوۆتىڭ «قان مەن تەر» روماندارى سۇرانىسقا يە ەكەنىن بىلدىك.
وقىرمان زالىنىڭ مۇرىندىق بولۋىمەن اپتا سايىن ءتۇرلى مادەني ءىس-شارالار ۇيىمداستىرىلادى. احمەت بايتۇرسىن ۇلى, مۇحتار اۋەزوۆ, عابيت مۇسىرەپوۆ, ماۋلەن بالاقاەۆ, امانجول شامكەنوۆتىڭ جانە وزگە دە ۇلت زيالىلارى مەن قالامگەرلەرىنىڭ شىعارماشىلىعىنا, ومىرىنە ارنالعان كونفەرەنتسيالار, تاعىلىمدى كەشتەر وتكىزىلىپ, مەكتەپ وقۋشىلارى ءوز ونەرلەرىن ورتاعا سالادى. اي سايىن ء«تىل ونەرى» وتىرىسى وتكىزىلىپ, جەرگىلىكتى جوعارى وقۋ ورىندارىنىڭ وقىتۋشىلارى وقۋشىلار مەن ستۋدەنتتەرگە ءدارىس وقيتىنى تاعى بار.
پاۆلودار
