سادىر جاپاروۆ بيىل اوسشك فورۋمى اياسىنداعى ىنتىماقتاستىققا 30 جىل تولعانىن ەسكە سالدى.
«30 جىل ىشىندە اوسشك ءتۇرلى وركەنيەتتەر مەن وڭىرلەردى قامتيتىن كوپجاقتى فورۋم رەتىندەگى تۇجىرىمدامادان ازيا ايماعىندا قاۋىپسىزدىك سالاسىنداعى ديالوگ پەن ىنتىماقتاستىق ءۇشىن ءتيىمدى پلاتفورما قۇرۋعا دەيىن دايەكتى جولدان ءوتتى», دەدى ول.
جاپاروۆ قىرعىزستان قازاقستاننىڭ اوسشك-گە توراعالىق ەتۋ ميسسياسىن جالعاستىرۋ تۋرالى شەشىمىن تولىق قولدايتىنىن, بۇل ونىڭ قىزمەتىنىڭ تيىمدىلىگىن ارتتىرۋعا باعىتتالعان جوسپارلاردى ىسكە اسىرۋعا مۇمكىندىك بەرەتىنىن اتاپ ءوتتى.
قىرعىزستان پرەزيدەنتىنىڭ ايتۋىنشا, بىشكەك وركەنيەتارالىق ديالوگقا جانە ازيا ءوڭىرى ەلدەرى اراسىنداعى ءوزارا تۇسىنىستىكتى نىعايتۋعا ىقپال ەتەتىن ىنتىماقتاستىقتى كەڭەيتۋ يدەياسىن قۇپتايدى.
«بۇگىنگى تاڭدا ءبىزدىڭ فورمات كەڭىستىگىندە جاڭا گيبريدتى نىسانداردا كورىنەتىن ءداستۇرلى سىن-قاتەرلەر ءالى دە ساقتالۋدا. ماسەلەن, كوروناۆيرۋستىق پاندەميانىڭ اسەرىنەن ءالى تولىق قالپىنا كەلە الماعان الەمدىك ەكونوميكا قازىر حالىقارالىق شيەلەنىستەرگە بايلانىستى جاڭا كۇيزەلىستەرگە ۇشىراۋدا. وكىنىشكە قاراي, بەدەلدى وڭىرلىك ۇيىمدار ازياداعى تۇراقتىلىققا تىكەلەي اسەر ەتەتىن قاقتىعىستاردىڭ الدىن الۋ ءۇشىن قولدا بار مۇمكىندىكتەر مەن تەتىكتەردى ىسكە اسىرۋ جولىندا جەتكىلىكسىز جۇمىس اتقارىپ ءجۇر», دەدى جاپاروۆ.
قىرعىز كوشباسشىسىنىڭ ايتۋىنشا, جاھاندىق الەمدەگى قاۋىپسىزدىك ماسەلەلەرى ءوڭىر ەلدەرى اراسىندا ەكىجاقتى جانە كوپجاقتى دەڭگەيدە سەنىمدى ىنتىماقتاستىقتى قۇرۋعا جانە تەرەڭدەتۋگە شاقىرادى.
«تەرروريزم مەن ەكسترەميزمگە قارسى كۇرەس ءۇشىن عانا ەمەس, ەسىرتكى مەن قارۋ اينالىمى, ادام ساۋداسى, قىلمىستىق كىرىستەردى جىلىستاتۋ جانە كيبەركەڭىستىكتە زاڭسىز قىزمەتپەن اينالىساتىن ترانسۇلتتىق ۇيىمداسقان قىلمىسقا قارسى حالىقارالىق كۇش-جىگەردى جانداندىرۋعا شاقىرامىز. قازىرگى ۋاقىتتا قىرعىزستان شىۇ اياسىندا بىشكەكتە حالىقارالىق ۇيىمداسقان قىلمىسقا قارسى ءىس-قيمىل ورتالىعىن قۇرۋ ماسەلەسىن پىسىقتاپ جاتىر», دەدى ول.
