امەريكا ءۇشىن دە ۇلگى بولارلىق مودەل

وڭتۇستىك كاليفورنيا ۋنيۆەرسيتەتى مەملەكەتتىك باسقارۋ سالاسىنىڭ قۇرمەتتى پروفەسسورى چەستەر نيۋلاند قازاقستاننىڭ مەملەكەتتىك قىزمەت ىستەرىندەگى مودەلدى اقش ءۇشىن دە ۇلگى بولاتىنداي دەپ باعالايدى. بۇل پىكىردى ول قازاقستان رەسپۋب­ليكاسىنىڭ مەملەكەتتىك قىزمەت ىستەرى اگەنتتىگىندە جۋرناليستەرمەن بولعان سۇحباتىندا ايتتى. پروفەسسوردىڭ پايىمىنشا, قازاق­ستاننىڭ مەملەكەتتىك قىزمەت جۇيەسىندەگى رەفورمالارىنا سايكەس, ساياسي مەملەكەتتىك قىزمەتكەرلەر سانى ازايىپ, ونىڭ ورنىنا 2050 جىلعا دەيىنگى ەلدىك دامۋ ستراتەگياسىن جۇزەگە اسىرۋعا بەلسەنە كىرىسەتىن اكىمشىلىك قىزمەتشىلەر سانى ارتا تۇسەتىن بولادى. «قازىرگى تاڭدا قازاقستاننىڭ مەملەكەتتىك قىزمەت جۇيەسى, مەنىڭ ويىمشا, الەمدەگى ەڭ وزىق ۇلگىلەردىڭ ءبىرى, ءتىپتى, اقش-پەن سالىستىرساق تا سولاي. 70-ءشى جىلدارى اقش ساياسي قىزمەتشىلەر سانىن ارتتىرۋ جولىن ۇستانعان بولاتىن. ال بۇل ماسەلەدە امەريكالىق ۇكىمەت بەلگىلى ءبىر دەڭگەيدە ولقىلىق جىبەردى. بىزگە, كەرىسىنشە, سىزدەردىڭ مەملەكەتتىك قىزمەت جۇيەسىندەگىدەي باعىتتا جۇمىس جاساۋ كەرەك ەدى», دەدى پروفەسسور چەستەر نيۋلاند جۋرناليستەرگە بەرگەن سۇحباتىندا. ايتا كەتەرلىگى, چەستەر نيۋلاند اقش مەم­لەكەتتىك باسقارۋ ۇلتتىق اكا­دە­مياسىنىڭ جانە اۋماقتىق باسقارۋ جونىندەگى حالىقارالىق قاۋىمداستىقتىڭ مۇشەسى بولىپ تابىلادى. 1977-1978 جىل­دارى ول اقش-تاعى مەملەكەتتىك قىز­مەت سالاسىنىڭ سوڭعى زاڭنامالىق وزگەرىستەرىنە باسشىلىق جاساعان. توقتالا كەتەتىن جايت, وسىدان از بۇرىن امەريكالىق پروفەسسور قازاقستان پرەزيدەنتى نۇرسۇلتان نازارباەۆقا حات جولداپ, وندا ول ەلباسىنىڭ تاۋەلسىزدىك جىلدارىنىڭ قيىن كەزەڭدەرىندەگى قاجىر­لى ەڭبەگى مەن ارەكەتتەرىنە ءتانتى بولعانىن جەتكىزگەن ەدى. ول, سونداي-اق, وسىنداي باتىل شەشىمنىڭ ارقاسىندا ازاماتتاردىڭ ءومىر ساپاسى جاقسارا تۇسكەنىن, قازاقستاندىقتاردىڭ كوڭىلىندە ولاردىڭ لايىقتى ومىرىنە دەگەن سەنىم مەن جىگەر ۇيالاعانىن اتاپ وتكەن بولاتىن.