كەزدەسۋ كەزىندە سەنات سپيكەرى مارتەبەلى مەيمانعا ۆەتنام ەلىنىڭ دەلەگاتسياسى استانادا ءوتىپ جاتقان اوسشك-ءنىڭ VI سامميتىنە قاتىسقانى ءۇشىن ريزاشىلىعىن ءبىلدىردى. سونداي-اق ماۋلەن اشىمباەۆ اتالعان ەلدىڭ الەمدىك جانە ءداستۇرلى دىندەر ليدەرلەرىنىڭ ءVIى سەزىنە كورسەتكەن قولداۋى ءۇشىن العىسىن جەتكىزدى. دىندەر فورۋمىنا ۆەتنام بۋددا سانگحاسى باسقارما كەڭەسىنىڭ وكىلدەرى بەلسەندى قاتىسقانىن ايتا كەتكەن ءجون.
سونىمەن قاتار ماۋلەن اشىمباەۆ قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىندا ديپلوماتيالىق قاتىناستىڭ ورناعانىنا 30 جىل تولعانىن, وسى ارالىقتا قالىپتاسقان ءوزارا بايلانىستىڭ دامۋ قارقىنى جوعارى ەكەنىن اتاپ ءوتتى.
«قازاقستان مەن ۆەتنام اراسىنداعى ىنتىماقتاستىقتىڭ جوعارى دەڭگەيدە قالىپتاسقانىن ايرىقشا اتاپ وتكىم كەلەدى. قازىرگى تاڭدا الەمدىك قوعامداستىق پاندەميادان بىرتىندەپ شىعىپ جاتىر. سوعان بايلانىستى ىسكەرلىك بايلانىستار قارقىنى ارتىپ وتىر. وسىعان وراي ءبىز الداعى كەزەڭدە پارلامەنتارالىق ىنتىماقتاستىقتى دا نىعايتۋ ءۇشىن بەلسەندى جۇمىس ىستەي الامىز», دەدى ماۋلەن اشىمباەۆ.
سونداي-اق سەنات توراعاسى قازاقستان پرەزيدەنتى قاسىم-جومارت توقاەۆتىڭ باستاماسىمەن ەلىمىزدە ساياسي, ەكونوميكالىق جانە الەۋمەتتىك سالالاردى جاڭعىرتۋ ءۇشىن جۇرگىزىلىپ جاتقان اۋقىمدى رەفورمالارعا توقتالدى. ماۋلەن اشىمباەۆ ەلىمىزدىڭ ىشكى ساياساتىنداعى بيىلعى باستى وقيعا – پرەزيدەنت سايلاۋىنا دا نازار اۋداردى. ول 20 قاراشادا وتەتىن سايلاۋ ەلىمىزدىڭ ساياسي جۇيەسىن قايتا جۇكتەۋ جولىڭداعى ماڭىزدى قادام ەكەنىن تىلگە تيەك ەتتى.
ءوز كەزەگىندە ۆو تحي ان سۋان ەكى ەل اراسىنداعى حالىقارالىق ىنتىماقتاستىقتى نىعايتۋدىڭ جانە ساۋدا-ەكونوميكالىق, مادەني-گۋمانيتارلىق, سونداي-اق تۋريزم باعىتىنداعى ءوزارا بايلانىستى ارتتىرۋدىڭ ماڭىزدى ەكەنىن ايتتى.
